މިދިޔަ ފެބްރުއަރީ މަހު ތ. މަޑިފުށްޓަށް މަސްތުވާތަކެތި އެތެރެކުރަން އުޅެނިކޮށް ފުލުހުން ހައްޔަރުކުރި މީހެއްގެ މައްޗަށް ކުށް ސާބިތުވެ، 27 އަހަރަށް ޖަލަށް ލާން ހުކުމް ކޮށްފި އެވެ.

ފުލުހުން މިއަދު ނޫސްތަކަށް މައުލޫމާތު ދިން ގޮތުގައި ހުކުމް ކޮށްފައިވަނީ އެ ރަށު ދޮންވެލި، ހުސައިން ޝަރޫން އަށެވެ. އޭނާ ހައްޔަރުކުރީ ފެބްރުއަރީ ފަސްވަނަ ދުވަހު އެވެ.

މަޑިފުށްޓަށް މަސްތުވާތަކެތި އެތެރެކުރަން އުޅޭކަމުގެ މައުލޫމާތު ލިބިގެން ފުލުހުން ހިންގި އޮޕަރޭޝަނެއްގައި ޝަރޫން ހައްޔަރުކުރީ އެރަށު ބަނދަރުމަތިން ކަމަށާއި އޭނާގެ އަތުން އެ ދުވަހު މަސްތުވާތަކެތި ފެނުނު ކަމަށްވެސް ފުލުހުން ބުންޏެވެ.

ނަމަވެސް އޭނާގެ އަތުން ފެނުނު މަސްތުވާތަކެތީގެ ބަރުދަން ނުވަތަ ތަފުސީލެއް ފުލުހުން މިއަދަކު ނުދެ އެވެ.

މި މައްސަލާގައި ދައުލަތުން ކުރި ދައުވާ ސާބިތުވެ ޝަރޫންގެ މައްޗަށް 27 އަހަރާއި 11 މަހާއި 20 ދުވަހުގެ ޖަލު ހުކުމެއް އިއްވާފައިވަނީ މަޑިފުށީ މެޖިސްޓްރޭޓް ކޯޓުންނެވެ.