މުޅި ދައުލަތުގެ ސަރަހައްދުގައިވާ އެންމެހައި ބިންތަކާއި ފަޅުތައް ދިރާސާކޮށް، އަންނަން އޮތް ޖީލުތަކަށް ދެމި އޮންނާނެ ގޮތަކަށް ހިމާޔަތްކުރަން ޖެހޭ ތަންތަނާއި ބިންހިއްކާނެ ތަންތަން ކަނޑައަޅައި ނިންމަން ޖެހޭ ކަަމަށް ސުޕްރީމް ކޯޓުގެ ފަނޑިޔާރު ހުސްނުއް ސުއޫދު ވިދާޅުވެއްޖެ އެވެ.

ގުޅީފަޅު ހިއްކާތީ ތިމާވެއްޓަށް ގެއްލުން ލިބޭ މައްސަލަ ކޯޓަށް ވެއްދީ ތިމާވެއްޓާ ވަކާލާތު ކުރައްވާ ހުމައިދާ އަބްދުލްޣަފޫރެވެ. އެ މައްސަލައިގައި ބިން ހިއްކުން ވަގުތީ ގޮތުން ހުއްޓަން އަމުރު ނެރުނީ ހައި ކޯޓުންނެވެ.

ބިން ހިއްކުން މަޑުޖައްސާލަން ކުރި އަމުރު ބާތިލު ކުރަން ކުރި ހުކުމުގެ ތެރެއިން ފަނޑިޔާރު ސުއޫދު ދެއްވި ރައުޔުގައި ވިދާޅުވީ ހިމާޔަތްކުރަން ޖެހޭ ތަންތަނާއި ހިއްކާއްނެ ތަންތަނުގެ އިތުރުން، ތިމާވެށްޓަށް އަސަރުކުރާނެ ގޮތަށް މަޝްރޫއުތައް ހިންގާނެ ތަންތަން ވެސް ކަނޑައަޅަން ޖެހެ އެެވެ. އެއީ އޭނާ ވިދާޅުވި ގޮތުގައި ގާނޫނުއަސާސީގެ 22 ވަނަ މާއްދާއަށް ދިރުން ދިނުމަށް ޓަކައި ވެސް ކުރަން ޖެހޭ ކަމެކެވެ.

އެއީ އޭނާ ވިދާޅުވި ގޮތުގައި ބިންހިއްކުމުގެ ސަބަބުން ތިމާވެށްޓަށް ގެއްލުން ލިބުމުގެ މައްސަލަތައް ތަކުރާރު ނުވާ ގޮތަށް ދައުލަތުގެ ސިޔާސަތުތައް ތަންފީޒުކުރަން ދައުލަތަށް ދެއްވި އިރުޝާދެކެވެ.

"...މުޅި ދައުލަތުގެ ހުރިހާ ފަރާތެއް ޝާމިލުވެގެން، ގައުމީ ސްޓްރެޓެޖިކް އެންވައިރްމެންޓަލް އެސެސްމެންޓެއް ވީހާ އަވަހަކަށް އެކުލަވާލަން ޖެހޭ ކަމަށް ދެކެމެވެ. މިފަދަ ގައުމީ ސްޓްރެޓެޖިކް އެންވައިރްމެންޓަލް އެސެސްމެންޓް ހެދުމުގެ ބޭނުމަކީ މުޅި ދައުލަތުގެ ސަރަހައްދުގައިވާ އެންމެހައި ބިންތަކާއި ފަޅުތަކާއި ދިރުންތައް ދިރާސާކޮށް އަންނާން އޮތް ޖީލުތަކަށް ދެމިއޮންނާނެ ގޮތަކަށް ހިމާޔަތްކުރަން ޖެހޭ ތަންތަނާއި، ތިމާވެށްޓަށް އަަސަރުކުރާނޭ ގޮތަށް ދައުލަތުން ހިންގާނޭ މައިމަޝްރޫއުތައް ހިންގާނޭ ތަންތަން ކަނޑައަޅައި އައްޔަންކޮށް އެސެސްމެންޓް ގަރާރުކޮށް އެއަށް ތަޝްރީއީ ހިމޭންކަމެއް ދިނުމެވެ،" ރައުޔުގައި ސުއޫދު ވިދާޅުވި އެވެ.

ސައިންސްވެރިންނާއި ސައިންސުގެ އަލީގައި ކުރާ ދިރާސާތައް ރާއްޖޭގައި ނެތުމުން އެފަދަ މައްސަލަތަކުގައި ކޯޓަށް ގޮތެއް ކަނޑައަޅަން ދަތި ކަމަށް ވެސް ރައުޔުގައި ސުއޫދު ވިދާޅުވި އެވެ.