އެތުލެޓިކްސް އެސޯސިއޭޝަން އޮފް މޯލްޑިވްސްގެ އިންތިހާބުގައި އެ އެސޯސިއޭޝަނުގެ ރައީސްގެ މަގާމަށް، މިހާރު ވެސް އެކްސްކޯގައި ހިމެނޭ މެމްބަރު، މުސްތަފާ މުހައްމަދު (މުސްތޮ) ކުރިމަތިލައްވައިފި އެވެ.

އިއްޔެގެ 12:00 ގެ ނިޔަލަށް، އެތުލެޓިކްސްގެ އިންތިހާބަށް ކެންޑިޑެސީ ހުށަހަޅަން ހުޅުވާލި ފުރުސަތުގެ ސުންގަނޑި ހަމަވިއިރު، ކޮންމެ މަގާމަކަށް ވެސް ކުރިމަތިލާފައިވަނީ، އެންމެ ފަރާތެކެވެ.

އިންތިހާބު އޮތީ މި މަހު 24 ވަނަ ދުވަހު އެވެ.

އެ ގޮތުން، ރައީސްގެ މަގާމަށް ކުރިމަތިލެއްވި، މުސްތަފާ އަކީ، އެތުލެޓިކްސްގެ ހިންގާ ކޮމިޓީގައި ދެ ދައުރެއް ފުރިހަމަކޮށްފައިވާ ފަރާތެކެވެ. ޔޫތު މިނިސްޓްރީގައި މީގެ ކުރިން ވަޒީފާ އަދާކުރެއްވި މުސްތަފާ އަކީ، މި ފަހުން އެތުލެޓިކްސްގެ އިސް ފަރާތެއްގެ ގޮތުގައި ވެސް މަސައްކަތް ކުރައްވަމުން އަންނަ ހިންގާ ކޮމިޓީގެ މެމްބަރެކެވެ.

މޯލްޑިވްސް އޮލިމްޕިކް ކޮމިޓީ (އެމްއޯސީ) އިން އެންމެ ފަހުން، ބޭއްވި އަހަރީ އާންމު ޖަލްސާގައި އެސޯސިއޭޝަންގެ ފަރާތުން ބައިވެރިވެވަޑައިގެންނެވީ މުސްތަފާ އެވެ. ބައިނަލްއަގުވާމީ ކުޅިވަރު މުބާރާތްތަކުގައި މިދިޔަ އަހަރު އެތުލެޓިކްސް އިން ވާދަކުރިއިރު، އެތުލީޓުންނާ ގާތުން މުސްތަފާ ވަނީ މަސައްކަތް ކުރައްވައިފަ އެވެ. އެ ގޮތުން، މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ޓީމުގެ މެނޭޖަރެއްގެ ގޮތުގައި ވެސް މަސައްކަތް ކުރެއްވި އެވެ.

އެތުލެޓިކްސް އެސޯސިއޭޝަންގެ ރައީސްކަން މިދިޔަ 12 ވަރަކަށް އަހަރު ފުރުއްވީ، މިހާރުގެ ކޮމިޝަނާ އޮފް ސްޕޯޓްސް މުހައްމަދު ތޮލާލް އެވެ. ކޮމިޝަނަރުގެ މަގާމަށް އައްޔަނުކުރެއްވުމާ އެކު، ތޮލާލް ވަނީ އެތުލެޓިކްސް ރައީސްގެ މަގާމުން އިސްތިއުފާ ދެއްވައިފަ އެވެ. ތޮލާލް އަށް ފަހު، އެތުލެޓިކްސްގެ ރައީސްގެ ޒިންމާ ނެންގެވީ، މިހާރުގެ ނައިބު ރައީސް، އަހުމަދު އަޒީލް އެވެ.

ކުރިއަށް އޮތް އިންތިހާބުގައި ވެސް ނައިބު ރައީސަކަށް ކުރިމަތިލެއްވީ އަޒީލް އެވެ.

ހިންގާ ކޮމިޓީގެ އެހެން މަގާމުތަކަށް ކުރިމަތިލި ފަރާތްތަކަށް ބަލާއިރު، ހަޒާންދާރުގެ މަގާމަށް ކުރިމަތިލެއްވީ ހަސްނާއު ރަޝީދު ހުސައިން އެވެ. އަދި އާންމު މެންބަރުންގެ ގޮތުގައި ކުރިމަތިލެއްވީ މިހާރު ވެސް އެ މަގާމު ފުރުއްވަމުން އަންނަ ހުސެއިން އަމީންގެ އިތުރުން، ކުރިން އެ މަގާމުގެ މަސްއޫލިއްޔަތު އަދާކުރެއްވި ދެ މެންބަރުން ކަމަށްވާ މުޙައްމަދު ޝާހިދު (ޝާޑު) އާއި މުޙައްމަދު ޝުޖާއު (ސުޖާ) އެވެ.

މީގެ އިތުރުން، ހިންގާ ކޮމިޓީގެ އަންހެން މެންބަރަކަށް ކުރިމަތިލެއްވީ ކުރީގެ އެއް ވަނަ ދުވުންތެރިޔާ، އަދި ކޯޗެއްގެ ގޮތުގައި މަސައްކަތް ކުރަމުން އަންނަ ޔަޒުނީ ނަޝީދާ (ޔަޒޫ) އެވެ. ޔަޒޫ ވަނީ، އެންމެ ފަހުން، 2020 ވަނަ އަހަރު ބޭއްވި އިންތިހާބުގައި ރައީސަކަށް ކުރިމަތިލައްވައިފަ އެވެ. އެ އިންތިހާބުގައި ޔަޒޫ އަށް އެއް ވޯޓު ލިބުނުއިރު، އިންތިހާބު ކާމިޔާބުކުރެއްވި ތޮލާލް އަށް 15 ވޯޓު ލިބިވަޑައިގެންނެވި އެވެ.

މިހާރު މި އޮތް ގޮތުން، މި އަަހަރު ރާއްޖޭގެ ތިން ކުޅިވަރު އެސޯސިއޭޝަނެއްގެ ރައީސަކު ހޮވަން ބޭއްވި އިންތިހާބުތަކުގައި ވާދަކުރެއްވީ، ވާދަވެރިއަކު ނެތި، އެންމެ ކެންޑިޑޭޓެކެވެ. އެ ގޮތުން، ވޮލީ އެސޯސިއޭޝަންގެ ރައީސަކަށް މުހައްމަދު ލަތީފް އިންތިހާބުވީ ހަމައެކަނި ކެންޑިޑޭޓްގެ ގޮތުގައި، ކުރިމަތިލައްވައިގެންނެވެ. އަންނަ މަހު އެއް ވަނަ ދުވަހު، ބާއްވާ ސްވިމިން އެސޯސިއޭޝަން އިންތިހާބުގައި ވާދަކުރައްވަނީ މިހާރުގެ ވެސް ރައީސް މުހައްމަދު އަބްދުއްސައްތާރު (ޗަމްޕީ) އެވެ. އެތުލެޓިކްސް އިން ރައީސަކަށް ހޮވުމުގެ ފުރުސަތު ބޮޑީ، އެ މަގަމަށް ނަން ހުށަހެޅުއްވ ހަމައެކަނި ކެންޑިޑޭޓް، މުސްތަފާ އެވެ.