ޓްރީޓޮޕް ހޮސްޕިޓަލުގެ އައިވީއެފް ފަރުވާ ކާމިޔާބުވެ ބަލިވެ އިން ދެމީހަކަށް ލިބުނު ދެ ކުއްޖަކު އުފަންވެއްޖެ އެވެ.

ޓްރީޓޮޕުން ބުނީ ފަރުވާގެ ދަށުން ފުރަތަމަ ކުއްޖާ އުފަންވީ އާދީއްތަ ދުވަހު ކަމަށާއި، ދެވަނަ ކުއްޖާ އުފަންވީ އިއްޔެ ކަމަށެވެ. އަދި އެ ދެ ކުދިންނާއި، މަންމަގެ ހާލުވެސް ރަނގަޅު ކަމަށް އެ ހޮސްޕިޓަލުން ބުނެ އެވެ.

މިއަދު ޓްރީޓޮޕްގައި ބޭއްވި ނޫސްވެރިންގެ ބައްދަލުވުމުގައި ޓްރީޓޮޕްގެ ސީއޯއޯ އާދިލް މޫސާ ވިދާޅުވީ މި ފަރުވާ ދޭން ފެށިތާ ފުރަތަމަކޮޅު ދަތިތައް ދިމާވި ކަމަށާއި، ނަމަވެސް ފަރުވާ ކާމިޔާބުވާތީ އެއަށް އޮތް އިތުބާރު ބޮޑުވަމުން އަންނަ ކަމަށެވެ.

"ފަރުވާ ދިނުމަށް ގައިޑްލައިންއާއި ޕޮލިސީތައް ނެތުމުން ފުރަތަމަ އުނދަގޫތައް ދިމާވި. ނަމަވެސް ހުއްދަތައް ލިބި ފަރުވާ ދޭން ފަށައި، ކާމިޔާބުވާތީ މިއަށް އޮތް އިތުބާރު އަންނަނީ ބޮޑުވަމުން،" އާދިލް ބުންޏެވެ.

މީގެއިތުރުން އާދީލް ވިދާޅުވީ ފުރަތަމަ އުފަންވި ކުއްޖާގެ މަންމައަކީ އައިވީއެފް ފަރުވާ ހަތަރު ފަހަރު ބޭރުން ހަދައި ނާކާމިޔާބުވި ޕޭޝަންޓެއް ކަމަށާއި، ނަމަވެސް ޓްރީޓޮޕުން ހެދި އައިވީއެފް ކާމިޔާބުވެފައިވާ ކަމަށެވެ.

ޓްރީޓޮޕުން ބޭއްވި ނޫސްވެރިންގެ ބައްދަލުވުމުގެ ތެރެއިން: އެ ހޮސްޕިޓަލުން ދޭ އައިވީއެފްގެ ފަރުވާގެ ދަށުން ދެ ކުދިން ވަނީ އުފަންވެފައި -- ފޮޓޯ: މިރާން ނާޝިމް / އަދަދު

ޓްރީޓޮޕްގެ ކޮންސަލްޓަންޓް އޮބްސްޓެޓްރިކަން އެންޑް ގައިނޮކޮލޮޖިސްޓު ޑރ. ޒާކިޔާ އަހުމަދު ވިދާޅުވީ އައިވީއެފް ހަތަރު ބެޗެއް މިހާތަނަށް ހަދާފައިވާއިރު، އެއްވެސް ބެކްލޮގެއް ނެތް ކަމަށާއި، ފަރުވާއަށް އޮތް ތަރުހީބު ވެސް ބޮޑު ކަމަށެވެ.

"ފަރުވާ ހޯދަމުންދާ ފިރިހެން އަދި އަންހެން ބޭފުޅުންގެ ފަރާތުން ވެސް ފެންނަނީ ދާދި އެއް މައްސަލަތަކެއް. ބައެއް ޕޭޝަންޓުން މަޑުކުރި ފަރުވާ ކާމިޔާބުވަންދެން ވެސް،" ޑރ. ޒާކިޔާ ބުންޏެވެ.

ޓްރީޓޮޕުން މިދިޔަ ޑިސެމްބަރުގައި ވަނީ އެ ހޮސްޕިޓަލުގެ ފާޓިލިޓީ ސެންޓަރުން އައިވީއެފް 16 މީހުންނަށް ހެދިކަން އިއުލާންކޮށްފަ އެވެ. އަދި އޭގެ ތެރެއިން އެމްބްރިޔޯ ޓްރާންސްފާ ހެދި 10 މީހުންގެ ތެރެއިން ހަ މީހުން މާބަނޑު ވެފައިވާކަން ވެސް އިއުލާން ކުރި އެވެ.

މިދިޔަ އަހަރުގެ ޖުލައި މަހުން ފެށިގެން ރާއްޖޭގައި ފުރަތަމަ ފަހަރަށް އައިވީއެފް ފަރުވާ ޓްރީޓޮޕުން ދޭން ފަށާފައި ވަނީ ގާއިމުކުރަން މިލިއަނެެއްހާ ޑޮލަރު ހަރަދުކޮށްގެންނެވެ. އަދި މުޅި ފަރުވާއަށް ޕޭޝަންޓުން ހަރަދުކުރަން ޖެހެނީ 46،000ރ. އެވެ.

އެ ހޮސްޕިޓަލުގެ ފާޓިލިޓީ ސެންޓަރުގައި އެންމެ ފަހުގެ ޒަމާނީ ވަސީލަތްތައް ގާއިމުކޮށްފައިވާއިރު އެތައް އަހަރެއްގެ ތަޖުރިބާ ލިބިފައިވާ ދަރިމައިވުމުގެ މައްސަލަތަކުގެ ހާއްސަ ޑޮކްޓަރުންނާއި ނަރުހުންނާއި އެމްބްރޮލޮޔޮޖިސްޓުން ތިބެ އެވެ.