ދެ ކަންފަތުން ވެސް އަޑު އިވުމުގައި އުނދަގޫތަކެއް ހުރި އަންހެނެއް ހިއަރިން އެއިޑެއް ލައްވަން ޓްރީ ޓޮޕް ހޮސްޕިޓަލަށް ދިޔުމުން ކާމިޔާބު ސާޖަރީއަކާ އެކު އަޑު އިވުމުގައި ހުރި މައްސަލަ އެއްކޮށް ހައްލުކޮށްފި އެވެ

ޓްރީޓޮޕް ހޮސްޕިޓަލުގެ ކަރުންމަތީގެ ހާއްސަ ޑރ. ރާޖޭޝް ވާލަންދު "އަދަދު" އަށް ވިދާޅުވީ އެ މީހާ ހޮސްޕިޓަލަށް އައީ ދެ ކަންފަތުން ވެސް ރަނގަޅަށް އަޑު ނީވޭތީ ހިއަރިން އެއިޑެއް ލެއްވުމަށް ކަމަށާއި އޯޑިއޯގްރާމް ހެދުމުން އެއީ "އޮޓޮސްކްލޯރޮސިސް" ކަމަށް ބެލެވުނު ކަމަށެވެ.

އޮޓޮސްކްލޯރޮސިސްއަކީ ކަންފަތް ތެރޭގައި ހުންނަ ތިން ކަށިގަނޑުގެ ތެރެއިން ތިންވަނައަށް ހުންނަ ކަށިގަނޑު އެއްގޮތަކަށް ވެސް ދުރު ނުވާތީ ދިމާވާ މައްސަލައެކެވެ. އޭގެ ސަބަބުން ކަންފަތް ތެރެއަށްދާ އަޑު ތިންވަނަ ކަށިގަނޑާ ހިސާބަށް ގޮސް މަޑުވެ އެވެ.

"ޕޭޝަންޓު އައީ ދެ ކަންފަތުން ވެސް ރަނގަޅަށް އަޑު ނީވޭތީ. އާންމުކޮށް އިވޭ އަޑުތައް އޭނާއަށް އަޑު އިވެނީ މަޑުން. އޭނާއަށް ވާހަކަ ދެއްކަނީ ވެސް ވާހަކަ ދައްކަން ޖެހޭ ވަރަށް ވުރެ އަޑު މަޑުކޮށް. އޭނާއަށް ހީވެފައި އޮތީ އޭނާއަށް ވާހަކަ ދެއްކެނީ ބާރަށޭ،" ޑރ. ރާޖޭޝް ވިދާޅުވި އެވެ.

ސާޖަރީ ކުރިއަށް ގެންދިޔަ ގޮތް

ޑރ. ރާޖޭޝް ވިދާޅުވީ އެ ސާޖަރީ ކުރީ ބަލި މީހާ ހޭނައްތައިގެން ކަމަށާއި ސާޖަރީއަށް ފަހު ބަލި މީހާއަށް ބަރާބަރަށް އަޑު އިވެން ފެށި ކަމަށެވެ.

ބައެއް ބަލި މީހުން އެ ސާޖަރީ ހޭ ނުނައްތައި ކުރުމުން، އޮޕަރޭޝަންގެ ތެރެއިން ރަނގަޅަށް އަޑު އިވެން ފަށާ ކަމަށް ވެސް އޭނާ ފާހަގަ ކުރެއްވި އެވެ.

ސާޖަރީގައި، ކަންފަތުގެ ތިންވަނަ ކަށިގަނޑު ނަގައި، އޭގައި ލޯވަޅެއް ތޮރުފައި ދެވަނަ ކަށިގަނޑުގެ އިތުރުން ކޮކްލިއާއާ ގުޅުވައިދިނެވެ. އޭގެ ސަބަބުން ފުރަތަމަ ކަށިގަނޑު ދުރުވެ، ދެވަނަ ކަށިގަނޑު ދުރުވެ އެއަށްފަހު ޕިސްޓަން ދުރުވުމުގެ ސަބަބުން އަޑު އިވެން ފެށި އެވެ.

"ބަލިމީހާ ވަނީ އެއްކޮށް ރިކަވާ ވެފައި. ފާއިތުވެ ދިޔަ ދެ އަހަރު ތެރޭގައި ދެ ކަންފަތުގައި ވެސް އެ ސާޖަރީ ވަނީ ކާމިޔާބު ކަމާ އެކީ ކޮށްފައި. ސާޖަރީގެ ސަބަބުން އޭނާއަށް ވަނީ އާދައިގެ އިންސާނަކަށް އަޑު އިވޭ ގޮތަށް އަޑު އިވެން ފަށާފައި،" ޑރ. ރާޖޭޝް ވިދާޅުވި އެވެ.

ސާޖަރީއަށް ފަހު ރިކަވާ ވަންދެން ނުކުރެވޭ ކަންކަން:

• މޫދަށް ދިޔުން
• ވައިގެ މަގުން ދަތުރު ކުރުން
• ބަރު އެއްޗެހި އުލުން
• ގަޔަށް ބާރުލާފައި ކަންކަން ކުރުން

ޑރ. ރާޖޭޝް ވިދާޅުވީ އަޑުއިވުމުގައި އެއްވެސް މައްސަލައެއް ދިމާވެ ދެ މަހަށްވުރެ ދިގު ލައިގެން ދިޔުމާއެކު އީއެންޓީ ޑޮކްޓަރަކަށް ދައްކައި އޯޑިއޯގްރާމެއް ހެދުމަކީ އެންމެ އެދެވިގެންވާ ގޮތް ކަމަށެވެ.

ފާއިތުވެދިޔަ ދުވަސްތަކުގައި ހަ ވަރަކަށް ބަލިމީހުންގެ އެ ސާޖަރީ ކާމިޔާބުކަމާ އެކީ ކުރެވުނުކަން ފާހަގަ ކުރައްވަމުން ޑރ. ރާޖޭޝް ވިދާޅުވީ ސާޖަރީއަށް ފަހު އެމީހުންނަށް ރަނގަޅަށް އަޑު އިވެމުންދާ ކަމަށެވެ.

"އަޑު އިވުމުގައި އެއްވެސް ދަތިކަމެއް ހުރިނަމަ ލަސްނުކޮށް އީއެންޓީ ޑޮކްޓަރަކަށް ދެއްކުމަކީ ވަރަށް މުހިންމު ކަމެއް. ލަސްކޮށްފިނަމަ އަޑު އިވުމުން އެއްކޮށް މަހުރޫމް ވެސް ވެދާނެ،" ޑރ. ރާޖޭޝް ވިދާޅުވި އެވެ.

ޓްރީ ޓޮޕްގެ އީއެންޓީ ހެޑް ޑރ. ޗަންދްރަޝޭކަރު ރާވަލް "އަދަދު" އަށް ވިދާޅުވީ އެ އޮޕަރޭޝަންކުރި ވައްތަރުގެ ކޭސްތައް މުޅި ދުނިޔެއިން ވެސް ފެންނަނީ ވަރަށް މަދުން ކަމަށާއި ނަމަވެސް ރާއްޖެއިން އެފަދަ ކޭސްތައް ފެންނަ މިންވަރު ދުނިޔެއަށް ބަލާއިރު ގިނަ ކަމަށެވެ.

މިގޮތުން، ހަ ވަރަކަށް އަހަރު ތެރޭގައި ޓްރީ ޓޮޕުން ހަ ވަރަކަށް އަހަރު ތެރޭގައި 12 ވަރަކަށް ސާޖަރީ ކުރިކަން ފާހަގަކުރައްވައި ޑރ. ޗަންދްރަޝޭކަރު ވިދާޅުވީ ޓްރީޓޮޕުގައި އެ ސާޖަރީ ކުރެވޭނެ ހުރިހާ ވަސީލަތެއް އެހެން ހޮސްޕިޓަލުތަކަށްވުރެ ފުރިހަމައަށް ގާއިމުވެފައި ހުރި ކަމަށެވެ.

"ރާއްޖޭގައި އެ ސާޖަރީ ކުރަން ގިނަ ތަންތަނުން ފަސް ޖެހޭ. އެކަމަކު ޓް ރީޓޮޕުގައި ހުރި ވަސީލަތްތަކަށް ބަލާއިރު އެކަން ފުރިހަމައަށް ކުރެވޭ. ގިނަ ތަންތަނުން ދެނީ ހިއަރިން އެއިޑް އެކަނި. އީއެންޓީގައި މި ސާޖަރީއަކީ ކުރެވޭ އެންމެ ރަނގަޅު އޮޕްޝަން،" ޑރ. ޗަންދްރަޝޭކަރު ވިދާޅުވި އެވެ.

ޓްރީ ޓޮޕުން ހިއަރިން އެއިޑް ލައްވައި ދިނުމުގެ ހިދުމަތް ދޭން ފަށާފައި ވަނީ 2021 ގައެވެ. އެ ވަސީލަތްތަކުގައި ސްޕީޗް ކްލެރިޓީ، ހަލުވި ސްޕީޑްގެ ބްލޫޓޫތު ކަނެކްޓިވިޓީ، ފަސޭހަކަމާއެކު ރީޗާޖު ކޮށްލުން އަދި ނޮއިސް ކެންސަލޭޝަން ފަދަ ޒަމާނީ ސިފަތައް އެކުލެވިގެންވެ އެވެ.

ޓްރީ ޓޮޕުން އަންނަނީ އެ ހޮސްޕިޓަލުން ރާއްޖޭގައި ދެމުން އަންނަ ހިދުމަތްތައް ފުޅާކޮށް އާންމު ފަހުގެ ޓެކްނޮލޮޖީތައް ތައާރަފްކޮށް ފެންވަރު ރަނގަޅު ހިދުމަތެއް ދެމުންނެވެ.