ކޮރަޕްޝަންގެ މުއާމަލާތްތަކުގެ ތެރެއިން ދައުލަތަށް ގެއްލުނު 50 މިލިއަނަށް ވުރެ ގިނަ ރުފިޔާ ހޯދަން މިދިޔަ އަހަރު އެދިފައިވާ ކަމަށާއި މިދިޔަ އަހަރު ދައުލަތަށް އަނބުރާ ހޯދުނީ އޭގެ ތެރެއިން އެންމެ ދެ ލައްކަ ރުފިޔާ ކަމަށް އެންޓި ކޮރަޕްޝަން ކޮމިޝަން (އޭސީީސީ) އިން ބުނެފި އެވެ.

އޭސީސީން އިއްޔެ އާންމު ކުރި އެ ކޮމިޝަނުގެ އަހަރީ ރިޕޯޓުގައި ބުނާ ގޮތުން، ދައުލަތަށް ގެއްލުނު ފައިސާގެ ތެރެއިން 50،370،521 ރުފިޔާ ހޯދަން އެދުނެވެ. އޭގެ ތެރޭގައި ގިނައީ ދައުލަތުން ހިންގާ ކުންފުނިތަކުގައި އެދުނު ވަރެވެ. ކުންފުނިތަކުން އެކަނި 50،345،542 ރުފިޔާ އަނބުރާ ހޯދަން އޭސީސީން އެދިފައިވެ އެވެ.

އޭސީސީގެ އަހަރީ ރިޕޯޓް ދައްކާ ގޮތުން ކުންފުނިތަކުން އެ ކޮމިޝަނަށް ހޯދުނީ 181،352 ރުފިޔާ އެވެ. ދެން ހޯދީ ކުރީގެ އަހަރުތަކުގައި ހޯދަން މަސައްކަތް ކުރި 53،180 ރުފިޔާ އެވެ. އެއީ ޖުމުލަ 234،532 ރުފިޔާ އެވެ.

ފައިސާ އަނބުރާ ހޯދި ތަންތަން:

• އެޑިއުކޭޝަން މިނިސްޓްރީ - 29،120 ރުފިޔާ
• ސިޓީ ކައުންސިލްތައް - 10،500 ރުފިޔާ
• ރަށު ކައުންސިލްތައް - 13،559.42 ރުފިޔާ
• ކުންފުނިތައް - 181،352.15 ރުުފިޔާ

ފައިސާ ހޯދަން އެދުނު ތަންތަން

• ހެލްތު މިނިސްޓްރީ - 7،779.75 ރުފިޔާ
• އިސްލާމިކް މިނިސްޓްރީ - 2،200 ރުފިޔާ
• މިނިވަން މުއައްސަސާތައް - 15،000 ރުފިޔާ
• ކުންފުނިތައް - 50،345،542 ރުފިޔާ

މިދިޔަ ފަސް އަހަރުގެ ތެރޭގައި، އޭސީސީން މުއައްސަސާތަކުގައި ޖުމުލަ 263 މިލިއަން ރުފިޔާ ހޯދުމަށް އެދިފައިވެ އެވެ. އޭގެ ތެރެއިން 160 މިލިއަނަކީ 2019 ވަނަ އަހަރު އޭސީސީން އެދިފައިވާ ވަރެވެ. މިދިޔަ އަހަރަކީ، ފާއިތުވި ފަސް އަހަރުގެ ތެރޭގައި ދެވަނައަށް އެންމެ ގިނަ އަދަދަށް ފައިސާ ހޯދަން އެދުނު އަހަރެވެ.