ހއ. ދިއްދޫއަށް ރޭ ބޯކޮށް ވާރޭ ވެހުނު ގަޑިއެއްގައި ގަދަޔަށް ވައި ޖެހި ނަގޫރޯޅިއެއް ކަހަލަ އެއްޗެއް އަރައި، އެ ރަށުގައި މީހުން ދިރިއުޅެމުން ދިޔަ ހަ ގެއެއްގެ ފުރާޅު އެއްލާލައިފި އެވެ.

ދިއްދޫ ކައުންސިލުގެ ރަސްމީ ފޭސްބުކް އެކައުންޓުގައި ހިއްސާކޮށްފައިވާ ޕޯސްޓެއްގައި ބުނެފައި ވަނީ، އެ ރަށު ފްލެޓު ސަރަހައްދުގައި ހުރި ގެތަކުގެ ޓިނުތައް އުކާލައި، ގެތަކަށް އެކި ވަރުގެ ގެއްލުން ލިބިފައިވާ ކަމަށެވެ.

މިކަމާ ގުޅޭ މައުލޫމާތު ދެމުން ދިއްދޫ ކައުންސިލުގެ ރައީސް އަބްދުﷲ ރަޝީދު "އަދަދު" އަށް ވިދާޅުވީ ފަތިހު އެންމެ ގަދަޔަށް ވައި ޖެހުނު ގަޑީގައި ފުރާޅު އެއްލާލުމާ ގުޅިގެން، ގެތަކަށް ފެން ވަން ވަދެ، ތަކެއްޗަށް ގެއްލުން ވެފައިވާ ކަމަށެވެ.

"ހަ ފްލެޓު ވަރު ހަމަ އެއްކޮށް ފުރާޅު އެއްލާލާފައި ވަޔަށް، ދެން އެ ގޭގެ ސީލިން ވެސް ހަލާކުވެ، ވާރޭ ވެހުނީމައި ގޭގެ ފަރުނީޗަރުތައް ވެސް ހަލާކުވެފައި އެބަހުރި،" އޭނާ ވިދާޅުވި އެވެ.

މި ގޭގޭގައި ދިރިއުޅެމުން ދިޔަ މީހުން ވަގުތީ ގޮތުން އާއިލީ ގެތަކުގައި އުޅެމުން އަންނައިރު، ކައުންސިލުން އަންނަނީ އެ ގެތަކުގައި މީހުން ދިރިއުޅެވޭ ވަރު ކުރުމުގެ ގޮތުން ފުރާޅު ހަރުކޮށްދިނުމުގެ މަސައްކަތް ކުރަމުންނެވެ.

އަބްދުﷲ ރަޝީދު ވިދާޅުވީ ލިބެން ހުރި ބާ ޓިނު ބޭނުންކޮށްގެން އެ މަސައްކަތް ކައުންސިލުން ކުރަމުން އަންނަ ކަމަށެވެ. އަދި ނޭޝަނަލް ޑިޒާސްޓާ މެނޭޖްމަންޓް އޮތީރިޓީ (އެމްއެންޑީއޭ) އާ ވާހަކަދެކެވި، ގެއްލުން ލިބުނު މީހުންނަށް އެހީ ދިނުމާ ގުޅޭ ކަންކަން ވެސް ކުރިއަށް ގެންދާނެ ކަމަށް އޭނާ ވިދާޅުވި އެވެ.

ދިއްދޫއަށް ބޯކޮށް ވާރޭ ވެހި ގެއްލުންތަކެއް ލިބިފައިވާއިރު، މި ދުވަސްވަރަކީ ރާއްޖޭގެ ހުރިހާ ސަރަހައްދަކަށް ވެސް މޫސުން ގޯސް ދުވަސްވަރެވެ. ސަބަބަކީ މިއީ ހުޅަނގު މޫސުން ފެށޭ ދުވަސްވަރަށް ވުމެވެ.

މެޓް އޮފީހުން ވަނީ މިއަދު ހެނދުނު ވެސް މުޅި ރާއްޖެއަށް ހުދު ސަމާލެއް (ވައިޓް އެލާޓެއް) އަދި ބައެއް ސަރަހައްދުތަކަށް ރީނދޫ ސަމާލެއް (ޔެލޯ އެލާޓެއް) ނެރެފަ އެވެ. ރޭގެ ވަގުތެއްގައި ތ. އަތޮޅުން ފެށިގެން ލ. އަތޮޅާ ހަމައަށް އޮރެންޖު އެލާޓެއް ވެސް ނެރުނެވެ.