އަންނަ މަހުގެ އެއް ވަނަ ދުވަހު ބާއްވަން ނިންމާފައިވާ ސްވިމިން އެސޯސިއޭޝަން އޮފް މޯލްޑިވްސްގެ އިންތިހާބުގައި ވާދަކުރަން ހުޅުވާލި ފުރުސަތު ހަމަވިއިރު، ރައީސަކަށް ކުރިމަތިލެއްވީ މިހާރު ވެސް އެ މަގާމުގައި ހުންނެވި، މުހައްމަދު އަބްދުއްސައްތާރު (ޗަމްޕީ) އެކަނި ކަމަށް ސްވިމިން އެސޯސިއޭޝަނުން ހާމަކޮށްފި އެވެ.

މިދިޔަ ތިން ދައުރުގައި ވެސް ސްވިމިން އެސޯސިއޭޝަންގެ ރައީސްގެ މަގާމު ފުރުއްވި ސައްތާރު، އެންމެ ފަހުން، 2020 ވަނަ އަހަރުގެ ޖުލައި މަހު ބޭއްވި އިންތިހާބު ވެސް ކާމިޔާބު ކުރެއްވީ ހަމައެކަނި ކެންޑިޑޭޓުގެ ހައިސިއްޔަތުން، ނެގި ފެންނަ ނުފެންނަ ވޯޓު ކާމިޔާބު ކުރައްވައިގެންނެވެ.

ސްވިިމިން އެސޯސިއޭޝަންގެ އިންތިހާބުގައި ވާދަކުރަން ކެންޑިޑެސީ ހުށަހަޅަން ހުޅުވާލި ފުރުސަތު މިއަދު 13:00 އަށް ހަމަވިއިރު، ކޮންމެ މަގާމަކަށް ވެސް ކުރިމަތިލާފައިވަނީ އެންމެ ފަރާތެކެވެ.

އެ ގޮތުން، އެސޯސިއޭޝަންގެ ރައީސްގެ މަގާމަށް، މޯލްޑިވްސް އޮލިމްޕިކް ކޮމިޓީގެ ވެސް ރައީސް، ސައްތާރު ކުރިމަތިލެއްވިއިރު، ނައިބު ރައީސަކަށް ކުރިމަތިލެއްވީ، މިހާރު ވެސް އެ މަގާމު ފުރުއްވަމުން އަންނަ، އިސްމާއިލް އަލީ އެވެ.

ދެން ހުޅުވާލި މަގާމުތަކަށް ބަލާއިރު، ފަރުދީ މެންބަރުން ރިޕްރެޒެންޓްކުރާ އަންހެން މެންބަރަކަށް ރަހީމާ އާދަމް ކުރިމަތިލެއްވިއިރު، ފަރުދީ މެމްބަރުން ރިޕްރެޒެންޓްކުރާ ފިރިހެން މެމްބަރަކަށް ނަން ހުށަހެޅީ މުހައްމަދު ނައްވާރު އިބްރާހިމް އެވެ. ޓެކްނިކަލް އޮފިޝަލުން ތަމްސީލްކުރާ މެމްބަރުކަމަށް ކުރިމަތިލީ، ހަސަން ސިރާރު އެވެ. އަދި ކޯޗުން ތަމްސީލްކުރާ މެމްބަރަކަށް އަހުމަދު ފިރާސް އަފީފް ކުރިމަތިލެއްވިއިރު، ހަޒާންދާރަކަށް ކުރިމަތިލީ، އަލީ ޝަމީމް އެވެ.

ސްވިމިން އެސޯސިއޭޝަންގެ އިންތިހާބުގައި ކުލަބް ރެޕްރެޒެންޓޭޓިވްގެ މަގާމަށް ވާދަކުރުމަށް އެއްވެސް ފަރާތަކުން ފޯމު ހުށަހަޅާފައިނުވެ އެވެ. އެހެންވެ، ސްވިމިން އެސޯސިއޭޝަންގެ އިލެކްޓޯރަލް ކޯޑުގެ 2 ވަނަ މާއްދާގެ (ބ)ގައި ބަޔާންކޮށްފައިވާ ގޮތުގެ މަތިން، ފޯމު ހުށަހެޅުމުގެ ދެ ވަނަ ފުރުސަތު، މާދަމާ އިން ފެށިގެން ހުޅުވާލާނެ އެވެ. އަދި އެ ފުރުސަތުގެ ސުންގަނޑި ހަމަވާނީ، މި މަހު 16 ވަނަ ދުވަހު، 13:00 އަށެވެ.