ރިޔާދު (12 މެއި) - ސައުދީ ޕްރޯ ލީގުގައި ރޭ އަލް ހާޒެމް އަތުން 4-1 އިން މޮޅުވެ، އަލް ހިލާލް 19 ވަނަ ފަހަރަށް ސައުދީ ޕްރޯ ލީގުގެ ޗެމްޕިއަންކަން ހޯދައިފިއެވެ. އަލް ހިލާލް ޗެމްޕިއަންކަން ހޯދީ ލީގުގައި ކުޅުނު އެއްވެސް މެޗަކުން ބަލިނުވެ އެވެ.

ސައުދީ ޕްރޯ ލީގުގައި ބާކީ ތިން މެޗު އޮތްއިރު، އަލް ހިލާލް ޗެމްޕިއަންކަން ކަށަވަރުކުރީ ކްރިސްޓިއާނޯ ރޮނާލްޑޯ ކުޅޭ އަލް ނަސްރުގެ މައްޗަށް 12 ޕޮއިންޓްގެ ލީޑެއް ހޯދައިގެނެވެ.

އަލްް ހިލާލްގެ ދަނޑުގައި ރޭ ކުޅުނު މެޗުގައި އެ ޓީމުގެ ސާބިއާ ފޯވަޑް އެލެކްސަންޑާ މިޓްރޮވިޗް ވަނީ ދެ ލަނޑު ޖަހައިފައެވެ. އަދި އަހުމަދު އަލް ޖުވެއިދު އާއި ސެރްގޭ މިލިންކޮވިޗް ސަވިޗްވެސް ވަނީ ލަނޑު ޖަހައިފައެވެ.

އަލް ހިލާލް އިން ސައުދީ ލީގުގެ ޗެމްޕިއަންކަން މި ހޯދީ ލީގުގައި މިހާތަނަށް ކުޅުނު 31 މެޗުގެ ތެރެއިން 29 މެޗުން މޮޅުވެގެންނެވެ. އެއްވަރުވީ ދެ މެޗެވެ.

އަލް ހިލާލްގެ އަމާޒަކީ މި ސީޒަންގައި ތިން ތަށި ހޯދުމެވެ. އަލް ހިލާލް ވަނީ މި ސީޒަންގައި ސައުދީ ސުޕަ ކަޕް ކާމިޔާބުކޮށްފައެވެ. އަދި އެ ޓީމު އޮތީ ސައުދީ ކިންގްސް ކަޕްގެ ފައިނަލްގަ އެވެ. -- އޭއެފްޕީ