އަފްގާނިސްތާނުގެ ޕްރޮވިންސެއް ކަމަށްވާ ބަގްލަންއަށް ބޯކޮށް ވާރޭވެހި ފެންބޮޑުވެގެން 50 މީހުން މަރުވެއްޖެ އެވެ.

އަފްގާނިސްތާނުގެ މިނިސްޓްރީގެ އޮފް އިންޓީރިއާގެ ތަރުޖަމާން އަބްދުލް މަތީން ގަނީއާ ހަވާލާދީ އަލްޖަޒީރާއިން ބުނީ ބަގްލާންގެ ފަސް ޑިސްޓްރިކްޓަށްވުރެ ގިނަ ޑިސްޓްރިކްޓުގައި ފެންބޮޑުވެފައިވާ ކަމަށެވެ.

ހާލުގައި ޖެހިފައި ތިބި މީހުންނަށް ސަރުކާރުން އެހީތެރިކަން ފޯރުކޮށްދެމުންދާ ކަމަށާއި، ބައެއް މީހުން ގެތަކުގައި ތާށިވެފައިވާ ކަމަށް ރިޕޯޓުތައް ލިބެމުން އަންނަ ކަމަށް ވެސް އަބްދުލް މަތީން ވިދާޅުވި އެވެ.

"މިނިސްޓްރީ އޮފް އިންޓީރިއާއިން ވަނީ އެ ސަރަހައްދަށް ޓީމުތަކާއި ހެލިކަޕްޓަރުތައް ފޮނުވާފައި. އޮޕަރޭޝަން ކާމިޔާބު ކަމާއެކު ކުރިއަށް ގެންދެވޭނެ ކަމަށް އުންމީދު ކުރެވޭ. ނަމަވެސް އެ ސަރަހައްދުގެ ހާލަތް އޮތް ގޮތުން ދަތިތައް ދިމާވާނެ،" އަބްދުލް މަތީން ބުންޏެވެ.

ނެޗުރަލް ޑިޒާސްޓާ މެނޭޖްމަންޓުން ބުނީ ފެންބޮޑުވުމުގެ ހާދިސާގައި މަރުވި މީހުންގެ އަދަދު އިތުރުވާނެ ކަމަށް ލަފާ ކުރެވޭ ކަމަށާއި، ބަގްލަން ޕްރޮވިންސަށް ބޮޑެތި ގެއްލުންތަކެއް ވެފައިވާ ކަމަށެވެ.

އަފްގާނިސްތާނުގައި މިދިޔަ އެޕްރިލް މަހު ފެންބޮޑުވެގެން 10 ޕްރޮވިންސަކުން 100 މީހުން ވަނީ މަރުވެފަ އެވެ. އަދި ބައެއް ދަނޑުތަކަށް ވެސް ވަނީ ބޮޑެތި ގެއްލުންތައް ވެފަ އެވެ.

އޭޝިއާ ސަރަހައްދުގެ އެކި ގައުމުތަކުގައި ފެންބޮޑުވުމުގެ ހާދިސާތައް ގިނަވަމުން އަންނައިރު، ބައެއް ގައުމުތަކުން މަރުވަމުން އަންނަ މީހުން ވެސް ދަނީ އިތުރުވަމުންނެވެ.