މޯލްޑިވްސް ނެޝަނަލް ޔުނިވާސީޓީ (އެމްއެންޔޫ)ގެ މެޑިކަލް ސްކޫލް ދަރުމަވަންތަ ހޮސްޕިޓަލުން، އެ ޔުނިވާސިޓީގެ މައި ކެމްޕަހަށް ބަދަލު ކުރަން ނިންމި ނިންމުން ސަރުކާރުން މިއަދު އަނބުރާ ގެންގޮސްފި އެވެ.

ރައީސް އޮފީހުން ބުނީ އެމްއެންޔޫގެ ދަރިވަރުންގެ ޔޫނިއަންގެ އިލްތިމާސަށް އިޖާބަ ދެއްވައި، ސްކޫލް އޮފް މެޑިސިންގައި ތައުލީމު ހާސިލްކުރާ ދަރިވަރުންގެ ކިޔެވުން މިހާރެކޭވެސް އެއްގޮތަށް ދަރުމަވަންތަ ހޮސްޕިޓަލުގައި ކުރިއަށްގެންދަން ރައީސް ޑރ. މުހައްމަދު މުއިއްޒު ހަމަޖައްސަވައި، އެކަން ކަމާ ބެހޭ އިދާރާތަކަށް އަންގާފައިވާ ކަމަށެވެ.

އެމްއެންޔޫގެ ދަރިވަރުންގެ ޔޫނިއަނުން ސްކޫލް އޮފް މެޑިސިންގައި ކިޔަވަމުންދާ ދަރިވަރުންގެ ކަންބޮޑުވުންތަކާ ގުޅިގެން ރައީސް މުއިއްޒުއަށް އެޕްރިލް، 23 ގައި ސިޓީއެއް ފޮނުވާފައިވާއިރު، ރައީސް އޮފީހުން ވަނީ އެޕްރިލް، 26 ގައި ސްކޫލް އޮފް މެޑިސިންގެ ދަރިވަރުންނާއި، ޔޫނިއަންގެ އިތުރުން ކަމާ ބެހޭ ފަރާތްތަކާއެކު ބައްދަލުކޮށްފަ އެވެ.

ރައީސް މުއިއްޒު މި ނިންމެވުން ނިންމެވީ މިއަދު ރައީސް އޮފީހުގައި ބޭއްވި ބައްދަލުވުމެއްގައި ކަމަށް ރައީސް އޮފީހުން ބުނެ އެވެ.

"ކިޔަވާ ކުދީންނާއި ގުޅުންހުރި މިފަދަ ކޮންމެ ކަމެއްގައި، އަދި ސިއްހީ ހިދުމަތުގެ ހާލަތު ރަނގަޅުކުރެއްވުމުގައި، ދައުލަތުގެ އާމުދަނީއާ ފުދުންތެރިކަމާ ހާލަތު ތަންދިން މިންވަރަކުން، ވީ އެންމެ ހެޔޮ ބަދަލުތަކެއް ގެނަސްދެއްވުމަށް ރައީސުލްޖުމްހޫރިއްޔާ ވަރަށް އިސްކަން ދެއްވާ،" ރައީސް އޮފީހުން ބުންޏެވެ.

އެގޮތުން، ސްކޫލް އޮފް މެޑިސިންގެ ދަރިވަރުން ތައުލީމު ހާސިލްކުރަން ބޭނުންވާނެ ޒަމާނީ ވަސީލަތްތަކާއެކު، ދިރާސާތައްވެސް ކުރެވޭނެ ހާއްސަ ތައުލީމީ ބިނާއެއް ކުރުމަށް މިހާރުވެސް ދަނީ މަސައްކަތްކުރަމުން ކަމަށް ރައީސް އޮފީހުން ބުންޏެވެ.

އޭގެއިތުރުން, ރައީސް އޮފީހުން ބުނީ އައިޖީއެމްއެޗާއި ދަރުމަވަންތަ ހަސްފަތާލުގައި ބަލިމީހުންނަށް ޖާގަ އާއި އެނދު އިތުރުކޮށް، ސިއްހީ އައު ހިދުމަތްތައް އެ ދެ ހޮސްޕިޓަލުގައި ތައާރަފު ކުރުމުގެ މަސައްކަތްވެސް ޖާގަ އާއި ވަސީލަތްތައް ތަންދިން އެންމެ އެކަށޭނަ ގޮތަކަށް ހަލުވިކަމާއެކު ކުރަމުންދާ ކަމަށެވެ.

މެޑިކަލް ސްކޫލް ދަރުމަވަންތަ ހޮސްޕިޓަލުން، އެ ޔުނިވާސިޓީގެ މައިކެމްޕަހަށް ބަދަލު ކުރުމުން 1،000 އަށްވުރެ ގިނަ ދަރިވަރުންގެ ކިޔެވުމަށް އަސަރު ކުރާނެ ކަމަށް ދަރިވަރުންގެ ޔޫނިއަންއިން މީގެ ކުރިން ބުނި އެވެ.

އެކަމާ ގުޅިގެން ދަރިވަރުންގެ ކިޔެވުމަށް ބުރޫ ނާރާނެ ގޮތަށް އިންތިޒާމުތައް ހަމަޖައްސަމުން އަންނަ ކަމަށް އެމްއެންޔޫއިން ކުރިން ބުނި އެވެ.