ނޫސްވެރިޔާ އަދި 'ދަ ޕްރެސް' ނޫހުގެ އެޑިޓަރު އަލީ ސަމްއާންއަށް މި ސަރުކާރުން ސްޓޭޓް މިނިސްޓަރުކަން ދީފި އެވެ.

ފެހިވިލާގެ، ހއ. ކެލާ, ސަމްއާންއަށް ސްޓޭޓް މިނިސްޓަރުކަން ދިނީ ކުރީގެ ނޫސްވެރިޔާ އިބްރާހީމް ވަހީދު (އަސްވާޑު) މިނިސްޓަރުކަން ކުރައްވާ ޔޫތު އެމްޕަވަމެންޓް، އިންފޮމޭޝަން އެންޑް އާޓްސް މިނިސްޓްރީ އިންނެވެ. އޭނާ ވަނީ މި ހަފްތާ ތެރޭގައި މިނިސްޓްރީއަށް ވަޒީފާއަށް ނުކުންނަން ފަށާފަ އެވެ.

'ދަ ޕްރެސް' ނޫހުގެ އެޑިޓަރުގެ އިތުރުން ސަމްއާނަކީ މޯލްޑިވްސް ޖާނަލިސްޓް އެސޯސިއޭޝަންގެ އެއް ފައުންޑަރެވެ. އަދި ނޫސްވެރިކަމުގައި އިސްކޮށް އުޅުއްވާ ބޭފުޅުން ހިމެނިވަޑައިގަންނަވާ ޖަމްއިއްޔާއެއް ކަމަށްވާ އެޑިޓާސް ގިލްޑުގެ ވެސް މެންބަރެކެވެ.

ސަމްއާން ވަނީ 2020 ވަނަ އަހަރު, ނޫސްވެރިކަމުގެ ދާއިރާއިން ހިތްވަރު ދިނުމުގެ ގައުމީ އިނާމު ވެސް ހާސިލުކޮށްފަ އެވެ.

ސަމްއާނަށް ޔޫތު މިނިސްޓްރީން މަގާމެއް ދީފައިވާއިރު, އެ މައުލޫމާތު ސަރުކާރުގެ އިސްވެރިންގެ މައުލޫމާތު އާންމުކުރާ ރައީސް އޮފީހުގެ ވެބްސައިޓުގައި އަދާހަމަކޮށްފައި ނުވެ އެވެ. އެ ވެބްސައިޓުގައިވާ ގޮތުން ޔޫތު މިނިސްޓްރީގައި ތިއްބަވަނީ ދެ ސްޓޭޓް މިނިސްޓަރުންނެވެ.