އިދިކޮޅު ފަރާތްތަކުން "އުޑުގަ ޖެހިފަ ބިމުގަ" ޖެހުނަސް އެމަނިކުފާނާ ދެކޮޅަށް ދެއްކޭނެ އެއްވެސް ކަމެއް ނޯންނާނެ ކަމަށް ވިދާޅުވެ، ލީކުވެފައިވާ ކޮރަޕްޝަނުގެ ތުހުމަތުތައް ކުރެވޭ އިންޓެލިޖެންސް ރިޕޯޓުތަކަށް ރައީސް ޑރ. މުހައްމަދު މުއިއްޒު ރައްދު ދެއްވައިފި އެވެ.

ރައީސަށް ތުހުމަތު ކުރެވޭ ރިޕޯޓުތައް ލީކުކޮށްލީ ސަރުކާރަށް ފާޑުކިޔައި އެކި މައުލޫމާތުތައް ހާމަކުރަމުންދާ "ހަސަން ކުރުސީ"ގެ އެކައުންޓުންނެވެ. އޭގެ ތެރޭގައި ހިމެނެނީ ރައީސްގެ އެކައުންޓަށް ޖަމާވި ފައިސާތަކާ ގުޅޭގޮތުން އެމްއެމްއޭގެ ފައިނޭންޝިއަލް އިންޓެލިޖެންސް (އެފްއައިޔޫ) އަދި ފުލުހުންގެ އިންޓެލިޖެންސުން އެކުލަވާލާފައިވާ ދެ ރިޕޯޓެކެވެ.

މިކަމާ ގުޅޭގޮތުން މިރޭ ބޭއްވި ކެމްޕޭން ޖަލްސާއެއްގައި ރައީސް ވިދާޅުވީ، މި ރިޕޯޓުތައް ލީކުކޮށްލީ އިދިކޮޅަށް ގޮތް ހުސްވެގެން ކަމަށާއި މިއީ އެމަނިކުފާނު މޭޔަރު އިންތިހާބާއި ރިޔާސީ އިންތިހާބުގައި ވާދަކުރެއްވި އިރުވެސް ދެއްކި ވާހަކަތަކެއް ކަމަށެވެ.

މިކަމަށް ރައްދުގައި ވެސް ދެއްކެވެން ހުރީ ކުރިން ވެސް ދެއްކެވި ވާހަތައް ކަމަށާއި ގާނޫނާއި ގަވާއިދާ ހިލާފު އެއްވެސް ކަމެއް ކުރައްވާފަ ނޯންނާނެ ކަމަށް ވެސް އެމަނިކުފާނު ވިދާޅުވި އެވެ.

"ތިބޭފުޅުން އަދި ތިގޮތަށް އަޅުގަނޑުގެ ބޮލުގަ ކަމެއް އަޅުވަން އުޅެގެން، ކުރީގަވެސް ނުވި ކަމެއް ދެނެއްވެސް ނުވާނެ، އުޑުގަ ޖެހިފަ ބިމުގަ ޖެހުނަސް އަޅުގަނޑާ ދެކޮޅަށް ދެއްކޭނެ އެއް ކަމެއް ވެސް ނޯންނާނެ،" އަޑުހަރުކޮށް ރައީސް ވިދާޅުވި އެވެ.

ރޭގަ ލީކުވި މި ރިޕޯޓުތަކާ ގުޅިގެން "އަދަދު" އިން އެއްކުރި މައުލޫމާތުތަކުން ވަނީ މިއީ ސައްހަ ރިޕޯޓުތަކެއްކަން ކަށަވަރު ކުރެވިފަ އެވެ. މިއީ މިފަހުން އެފްއައިޔޫގެ އިންޓެލިޖެންސް ރިޕޯޓެއް ލީކުވި ފުރަތަމަ ފަހަރެވެ. މިއީ 2018 ގައި ތައްޔާރުކޮށްފައިވާ ރިޕޯޓެކެވެ.

ރައީސް މުއިއްޒުގެ އެކައުންޓަށް ފެބްރުއަރީ 01, 2017 އިން ފެށިގެން އޮކްޓޯބަރު 15, 2018 ގެ ނިޔަލަށް ޖަމާވެފައިވާ ފައިސާއާ ގުޅޭ ރިޕޯޓެއް ސެޕްޓެމްބަރު 2, 2023 ގައި "އަދަދު" ނޫހުގައި ޝާއިއު ކޮށްފައިވާނެ އެވެ.

މި ފައިސާތަކާ ގުޅިގެންވެސް ރައީސް މުއިއްޒު ވަނީ މިރޭ ރައްދު ދެއްވާފަ އެވެ. އެގޮތުން އެ ފައިސާއަކީ އެމަނިކުފާނުގެ ރޯހައުސް ބޭރުގެ ކުންފުނިތަކަށް ކުއްޔަށް ދީގެން ލިބިފައިވާ ފައިސާތަކެއް ކަމަށާއި އޭގެ އިތުރަށް ހުރީ ރައީސްގެ ބައްޕަ އަވާހަރަވުމާ ގުޅިގެން ވާރުތަވި ފައިސާ ކަމަށްވެސް ވިދާޅުވި އެވެ.

"އަޅުގަނޑު އެދެނީ ހަމަ ގަދަޔަށް ތިވާހަކަ ދައްކަން، ދެއްކި ވަރަކަށް ތިބޭފުޅުން ބޭޒާރުވަނީ" އިދިކޮޅަށް އަނެއްކާވެސް އިޝާރާތް ކުރައްވާ ރައީސް ވިދާޅުވި އެވެ.

ރައީސް މިހެން ވިދާޅުވެފައިވާއިރު، އިދިކޮޅު އެމްޑީޕީ އަދި ޕީއެންއެފުން ވަނީ ރައީސްގެ މައްޗަށް ކުރެވޭ މި ބޮޑެތި ތުހުތަމުތައް ބެލުމަށް ދައުލަތުގެ ކަމާބެހޭ އިދާރާތަކަށް ގޮވާލާފަ އެވެ. ނަމަވެސް މިކަމާ ގުޅިގެން ސަރުކާރުގެ ތަހުގީގީ އެއްވެސް އިދާރާއަކުން މިހާތަނަށް ބަހެއް ބުނެފައެއް ނުވެ އެވެ.