ލ. ކައްދޫގައި އޮންނަ އެއާޕޯޓު އިތުރަށް ތަރައްގީ ކުރުމަށާއި ލ. ގާދޫގައި އިންޓަގްރޭޓެޑް މެރިޓައިމް ހަބެއް ގާއިމުކުރުމުގެ އެއްބަސްވުމެއްގައި ސަރުކާރުގެ ފަރާތުން ޗައިނާ ކުންފުންޏަކާ އެކު ސޮއިކޮށްފި އެވެ.

އެމްޕީއެލްގެ ފަރާތުން މި ފަހުމުނާމާގައި ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހު އިބްރާހިމް އެވެ. މި މަޝްރޫއު ކުރިއަށްގެންދަން ހަވާލުކުރީ ޗައިނާ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ) އާއެކު އެވެ.

މި މަޝްރޫއުގެ ދަށުން އިކޯ ޓޫރިޒަމް ރިސޯޓެއް ތަރައްގީ ކުރާއިރު އެތަނުގެ މުވައްޒަފުން ބޭސްވެފައި ތިބޭނީ ލ. ފޮނަދޫގައި ކަމަށް އެމްޕީއެލްއިން ބުނެ އެވެ. މި ރިސޯޓު ތަރައްގީ ކުރާނީ ގާދޫ އާއި ފޮނަދޫއާއި ދޭތެރޭ އޮންނަ ފަޅުގަ އެވެ.

ގާދޫއަކީ ހިމާޔަތްކޮށްފައި އޮންނަ ރަށެކެވެ. އެ ރަށުގައި ބަނދަރު އަޅަން ނިންމުމުން ތިމާވެށީގެ ދިފާއުގައި މަސައްކަތް ކުރާ ޖަމިއްޔާތަކުން ވަނީ ކަންބޮޑުވުން ވެސް ފާޅުކޮށްފަ އެވެ. މި މަޝްރޫއު ހިންގާއިރު ގާދޫގެ 80 ޕަސެންޓުގައި އަތްނުލާނެ ކަމަށާއި އަދި ހިމާޔަތް ކުރާނެ ކަމަށް ވެސް އެމްޕީއެލުން ބުނެ އެވެ.

ކްރޫޒް ޓާމިނަލްގައި ކަސްޓަމްސް އާއި އިމިގްރޭޝަނާއި ޑިއުޓީ ފްރީ އަދި ލ. އަތޮޅުގެ ރަށްތަކަށް ދެވޭ ޝަޓަލް ހަބެއް ގާއިމުކުރާނެ ކަމަށް ވެސް އެމްޕީއެލުން ބުނެ އެވެ.

އޭގެ އިތުރުން ޔޮޓް މެރީނާއަކާއި އޮފްޝޯ ބަންކަރިންގެ ހިދުމަތް ވެސް އެތަނުން ދޭނެ ކަމަށް އެމްޕީއެލުން ބުނެ އެވެ. މިއީ ދުނިޔޭގެ އިރުން ހުޅަނގަށް އަދި އިރުން ހުޅަނގަށް ކަނޑުމަގުން މުދާ ގެންދާ އެންމެ މައިގަނޑު އެއް ރޫޓެވެ.

މި މަޝްރޫއުގައި މިރޭ ސޮއިކުރި ނަމަވެސް އެމްޕީއެލުން ވަނީ އަމަލީ މަސައްކަތް ނުފަށަނީސް މުވައްޒަފުން ހޯދަން އިއުލާނުކޮށްފަ އެވެ. މިއީ ރައީސް މުއިއްޒުގެ ސަރުކާރުގެ ފުރަތަމަ 100 ދުވަހުގެ ތެރޭގައި އަމަލީ މަސައްކަތް ފަށަން އޮތް މަޝްރޫއުއެކެވެ.

އޭގެ އިތުރުން, ކައްދޫ އެއާޕޯޓު ތަރައްގީކުރަން ވެސް ވަނީ ސޮއިކޮށްފަ އެވެ. ޗައިނާ ސީއޭއެމްސީ އިންޖިނިއަރިން ކޮމްޕެނީ ލިމިޓެޑް (ސީއޭއެމްސީއީ) އާއެކު މި ފަހުމުނާމާގައި ސޮއިކުރެއްވީ އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބު އެވެ.

ކައްދޫގެ އެއް ބަޔަކީ ޓޫރިޒަމަށް ހާއްސަކުރުމުގެ ވިސްނުން ގެންގުޅުއްވާ ކަމަށް ރައީސް ޑރ. މުހައްމަދު މުއިއްޒު މިރޭ ހާމަކުރެއްވި އެވެ. ކައްދޫ އިންޓަނޭޝަނަލް އެއާޕޯޓު މިހާރު ރީޖަނަލް އެއާޕޯޓްސްގެ ދަށަށް ބަދަލުކުރައްވާފައިވާ ކަމަށް ވެސް ރައީސް ވިދާޅުވި އެވެ.

ކައްދޫ އެއާޕޯޓަކީ ރާއްޖޭގައި އޮތް އެންމެ ދުވަސްވީ ޑޮމެސްޓިކް އެއާޕޯޓުތަކުން އެއާޕޯޓެކެވެ. އެ އެއާޕޯޓަށް ގިނައިން ދަތުރުކުރަނީ ލާމުގައި އޮންނަ ރިސޯޓުތަކަށް ދާ ފަތުރުވެރިންނެވެ.

ކުރީ ސަރުކާރުން ވަނީ ކައްދޫ އިންޓަނޭޝަނަލް އެއާޕޯޓަކަށް ހެދުމުގެ މަސައްކަތް ފަށާފަ އެވެ. އެ މަސައްކަތް ކުރަން ކްރޮސް ސަބްސިޑީ އުސޫލުން ފައިސާ ދޭނެ ބަޔަކު ހޯދަން ޖެނުއަރީގައި އިއުލާންކުރުމަށް ފަހު، އެއާޕޯޓަށް ބޭނުންވާ ބިން ހިއްކުމުގެ މަސައްކަތް އޮގަސްޓު 2023, ގައި ވަނީ އެމްޓީސީސީއާ ހަވާލުކޮށްފަ އެވެ.