މީގެ ދެ އަހަރު ކުރިން ފުލުހުން ހިންގި ހާއްސަ ޑްރަގު އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ދައުވާކުރި ހަތަރު މީހުންގެ މައްޗަށް ވެސް ކުށް ސާބިތުކުރެވޭނެ ވަރުގެ ހެކި ހުރި ކަމަށާއި، އެވަރުގެ މަސައްކަތެއް ކުރެވިފައިވާ ކަމަށް ފުލުހުން ބުނެފި އެވެ.

މި މައްސަލައިގައި ކުށް ސާބިތުވީ ދައުވާކުރި މީހުންގެ ތެރެއިން ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރަށް އެކަންޏެވެ. އަދި ޒުބައިރުގެ މައްޗަށް 25 އަހަރުގެ ޖަލު ހުކުމެއްގެ އިތުރަށް 100،000 ރުފިޔާއިން ޖޫރިމަނާ ކުރަން މިދިޔަ މާޗު 21، ގައި ކްރިމިނިލަ ކޯޓުން ވަނީ ހުކުމް ކޮށްފަ އެވެ.

ކްރިމިނަލް ކޯޓުން ނިންމީ ދެން ދައުވާކުރި، ގދ. ހޯނޑެއްދޫ އިރމަތީގެ، އަހުމަދު ސުނައިނު އަދި، ގދ. ހޯނޑެއްދޫ އަލޯރާ އަހުމަދު މުޖާހިދުގެ މައްޗަށް ކުށް ސާބިތުނުވާ ކަމަށެވެ.

މަސްތުވާތަކެތި އަތުލައިގަތް ދުވަހުގެ ހަވީރު މި މައްސަލައިގައި ދެން ތުހުމަތު ކުރެވޭ ގދ. ހޯނޑެއްދޫ ދޯދި، މުހައްމަދު އަކްރަމް އަބްދުލް ހަންނާން ވަނީ ރާއްޖެއިން ބޭރަށް ފުރައިގެން ގޮސްފަ އެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި މައުލޫމާތުދެއްވަމުން ޗީފް ސުޕަރިޓެންޑެންޓް އޮފް ޕޮލިސް އަހުމަދު ޝާކިރު ވަނީ، ޑިސެމްބަރު 12، 2021 އަދި ޑިސެމްބަރު 14، 2021 ގައި މާލެ ސަރަހައްދުން އަތުލައިގަތް 119 ކިލޯގެ ޑްރަގް މައްސަލައިގައި ޝާމިލުވާ ހަތަރު މީހުންގެ މައްޗަށް ވެސް ކުށް ސާބިތުކުރެވޭނެ މިންވަރަށް ފުލުހުންގެ ތަހުގީގުން ހެކި ހޯދާފައިވާކަމަށް ވިދާޅުވެފަ އެވެ.

"އަޅުގަނޑުމެން ގަބޫލުކުރަނީ މި ކޭސްގަ މީގެ ތެރޭގަ ހިމެނޭ ހަތަރު މީހުންނަށް ވެސް އެއީ ރާއްޖެއިން ފުރައިގެން ގޮސްފައިވާ ފަރާތް ވެސް ހިމެނޭހެން، އަދި މީގަ ހިމެނޭ އަހުމަދު ސުނެއިހު އަދި އަހުމަދު މުޖާހިދުގެ މައްޗަށް ކުށް ސާބިތުކުރެވޭ ވަރުގެ މަސައްކަތެއް ތަހުގީގަށް ކުރެވިފަވާކަމަށް،" ޗީފް ސުޕަރިޓެންޑެންޓް އޮފް ޕޮލިސް އަހުމަދު ޝާކިރު މިއަދު ވިދާޅުވި އެވެ.

މިއަދުގެ ނޫސްވެރިންގެ ބައްދަލުވުމުގައި ފުލުހުން ވަނީ މި މައްސައިލައިގައި ހިމެނޭ ހަތަރު މީހުން 119 ކިލޯގެ މަސްތުވާތަކެތި ރާއްޖެއަށް އެތެރެކޮށް، މާލޭގައި ރައްކާކުރުމަށްޓަކައި ކުރި މަސައްކަތް ދެނެގަތުމަށް ފުލުހުންގެ ތަހުގީގަށް ހޯދިފައިވާ ސީސީޓީވީ ފުޓޭޖް އަދި ފޮޓޯތައް ހިމެނޭ ވީޑިއޯ ޕްރެސެންޓޭޝަނެއް ވެސް ދައްކައިފަ އެވެ.

ކަނޑުގެ މަގުން ރާއްޖެ އެތެރެކޮށްފައިވާ މަސްތުވާތަކެތި މާލެ ގެނައުމަށް ލޯންޗެއްގައި ދަތުރުކުރީ އަލީ ޒުބެއިރު އަދި އަކްރަމް އަބްދުލް ހަންނާން އެވެ. އަދި އެ ތަކެތި ރައްކާކޮށް ފޮރުވުމުގައި ހަތަރު މީހުން ވެސް ބައިވެރިވެފައިވާކަން ވީޑިއޯއިން ހާމަވެ އެވެ.

"މި ކަންތައްތަކުން ތަހުގީގަށް ބެލެވެނީ މީ ހަތަރު ފަރާތުން ގުޅިގެން އެތެރެކޮށްފަވާ މަސްތުވާތަކެތި ކަމަށް،" ވީޑިއޯއަށް ރިއާޔަތްކޮށް މި މައްސަލައިގެ ކޭސް އައިއޯ ސަބް އިންސްޕެކްޓާ މަމްދޫހު ހަސަން ވިދާޅުވި އެވެ.

ގދ. ހޯނޑެއްދޫ އަލޯރާ އަހުމަދު މުޖާހިދުގެ މައްޗަށް ކުށް ސާބިތުކުރުމަށް އޭނާ ދުއްވި ކާރުން ފެނުނު އޭނާގެ ދަރުފުޅުގެ ސިއްހީ ލިޔެކިޔުންތަކަށް ކޯޓުން ބުރަދަނެއް ދީފައިނުވާކަމަށް ވެސް ފުލުހުން ފާހަގަކުރި އެވެ.

މީގެ އިތުރުން ތަހުގީގީ ބޭނުމަށް މި މައްސަލައިގައި ޝާމިލުވާ މީހުންގެ ފޯނުތައް ބެލުމަށް ކްރިމިނަލް ކޯޓުންނާއި ހައިކޯޓުން އަމުރު ނުދިންކަން ޝާކިރު ފާހަގަކުރެއްވި އެވެ. އަދި ތަހުގީގަށް ލިބުނު މުއްދަތުގެ ތެރޭގައި ޑީއެންއޭގެ ނަތީޖާ ނުލިބޭކަމަށް ވިދާޅުވި އެވެ.

ޗީފް ސުޕަރިޓެންޑެންޓް ޝާކިރު އިތުރަށް ވިދާޅުވީ މި މައްސަލަ ހައިކޯޓުގައި އެޕީލްކުރެވޭނެ ކަމަށެވެ. އަދި މަސްތުވާތަކެތީގެ ބޮޑެތި މައްސަލަތަކުގެ ތަހުގީގާއި ގުޅޭ އިންޓާނަލް އޮޑިޓެއް ހެދުމުގެ މަސައްކަތް ވެސް ފުލުހުން ކުރަމުން އަންނަ ކަމަށެވެ،