ރާއްޖެއަށް ސުލްހައިގެ މާނައަކީ ތިމާވެށީގެ ސަލާމަތާއި ރައްކާތެރިކަން ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވިދާޅުވެއްޖެ އެވެ.

އަސްލަމް މިހެން ވިދާޅުވީ އެކި ގައުމުތަކުގެ ގާނޫނު ހަދާ މަޖިލީސް ހިމެނޭ އިންޓަ ޕަލިމަންޓޭރިއަން ޔޫނިއަންގެ 148 ވަނަ އެސެމްބްލީގައި ތަގުރީރުކުރައްވަމުންނެވެ. އެ އެސެމްބްލީގެ މިއަހަރުގެ ޝިއާރަކީ "ޕާލިމަންޓްރީ ޑިޕްލޮމެސީ: ބިލްޑިން ބްރިޖެސް ފޯ ޕީސް އެންޑް އަންޑަސްޓޭންޑިން" އެވެ.

އެ އެސެމްބްލީގައި ވާހަކަދައްކަވަމުން އަސްލަމް ވިދާޅުވީ ރާއްޖެއަށް ސުލްހަ މާނަ ކުރުމުގައި ތިމާވެށީގެ ސަލާމަތާއި ރައްކާތެރިކަން ހިމެނޭ ކަމަށެވެ. ކުޑަ ޖަޒީރާ ގައުމެއްގެ ހައިސިއްޔަތުން، މޫސުމަށް އަންނަ ބަދަލުތަކުގައި ރާއްޖޭގެ ހިއްސާ ކުޑަނަމަވެސް، މޫސުމަށް އަންނަ ބަދަލުތަކުގެ ސަބަބުން ރާއްޖެއަށް ވަރަށް ބޮޑު ގެއްލުމެއް ލިބެމުން ދާކަން އަސްލަމް ފާހަގަކުރެއްވި އެވެ.

"މޫސުމީ ރެފިއުޖީންނަށް ވާން އަޅުގަނޑުމެން ބޭނުމެއް ނޫން, އަޅުގަނޑުމެންގެ ސަގާފަތެއް އެބައޮތް، ބަހެއް އެބައޮތް، އައިޑެންޓިޓީއެއް އެބައޮތް، އަޅުގަނޑުމެން ބޭނުންވަނީ މި ރީތި ރާއްޖޭގައި އަބަދަށް ދެމިތިބެން" އަސްލަމް ވިދާޅުވި އެވެ.

ފަސް ލައްކައަށްވުރެ ގިނަ މީހުން ދިރިއުޅޭ ގައުމެއްގެ ހައިސިއްޔަތުން ގެދޮރު ގެއްލުމަކީ ރާއްޖެއަށް އޮތް ގޮތެއްނޫން ކަމަށް ވެސް އެމަނިކުފާނު ވިދާޅުވި އެވެ.

ޓެރަރިޒަމާއި, މަސްތުވާތަކެތީގެ މައްސަލައިގެ އިތުރުން ގާނޫނު ހަދާ މަޖިލީހުގައި އަންހެނުންގެ ބައިވެރިވުން މަދުވުމުގެ މައްސަލައަށް ވެސް އެ ތަގުރީރުގައި އަސްލަމް އަލިއަޅުއްވައިލެއްވި އެވެ. ފަލަސްތީނަށް ދެމުންދާ ހަމަލާތައް ހުއްޓައިލަން ވެސް އެމަނިކުފާނު ގޮވައިލެއްވި އެވެ.