ދުނިޔޭގެ މައި ފުޓްބޯޅަ އިދާރާ ފީފާ އާއި އޭޝިއާގެ ފުޓްބޯޅަ އިދާރާ، އޭއެފްސީ އަށް ހުށަހެޅިފައިވާ ޝަކުވާތަކެއްގެ މައްސަލަތަކެއް ބަލަމުންދާތީ، އެފްއޭއެމްގެ އިންތިހާބުގެ ކަންކަން މަޑުޖައްސާލަން އަންގައިފި އެވެ.

އެފްއޭއެމް އިންތިހާބު ބާއްވަން ތާވަލުކޮށްފައި އޮތީ، އަންނަ މަހުގެ 20 ވަނަ ދުވަހު އެވެ. އެފްއޭއެމްގެ އިންތިހާބަށް ކުރިމަތިލާން ހުޅުވާލުމުން، ކެންޑިޑެސީ ހުށަހެޅީ އެފްއޭއެމްގެ ކުރީގެ ރައީސް، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު، އަހުމަދު ތޯރިގު (ޓޮމް) އާއި އެފްއޭއެމްގެ ރައީސްކަން މިހާރު ކުރައްވަމުން އަންނަ ބައްސާމް އަދީލް ޖަލީލް އެވެ.

ތޯރިގު، ކުރިމަތިލެއްވިކަން އޭނާ މީޑިއާ އަށް ކަށަވަރުކޮށްދީފައިވާއިރު، ބައްސާމް ކެންޑިޑެސީ ހުށަހެޅިންކަން މީޑިއާ އަށް ހާމަކޮށްފައެއްނުވެ އެވެ. ތޯރިގު، ކެންޑިޑެސީ ހުށަހެޅީ ފުރަތަމަ ޑިވިޝަނުގެ ތިން ކްލަބްގެ ތާއީދު ހަމަކުރިއިރު، ކްލަބް ވެލެންސިއާ ވެސް ހިމަނައިގެންނެވެ.

ވެލެންސިއާ މި ވަގުތު، އެފްއޭއެމް އިން ދީފައިވާ ސަސްޕެންޝަނެއްގައި އޮތްއިރު، އެ ކްލަބްގެ ތާއިދު ސިޓީއާ އެކު، ޓޮމްގެ ކެންޑިޑެސީ ސައްހަވާނެތޯ ސުވާލު އުފެދެ އެވެ.

އެފްއޭއެމްގެ އެކްޓިން ޖެނެރަލް ސެކްރެޓަރީ، ޖައުޝަން ޝަރީފް (ޖައު) މިރޭ، އެފްއޭއެމްގެ ވަޓްސަޕް މީޑިއާ ގްރޫޕުގައި ލިޔުއްވި މެސެޖެއްގައިވަނީ، ފީފާ އަށް އެފްއޭއެމާ ގުޅޭ ގިނަ ޝަކުވާތަކެއް ހުށަހަޅާފައިވާތީ، އެ އިދާރާ އާއި އޭއެފްސީގެ އެންގުމުގެ މަތިން، މިހާރު ކުރަމުން އަންނަ އެފްއޭއެމްގެ އިންތިހާބުގެ ކަންކަން މަޑުޖައްސާލަން ނިންމާފައިވާ ކަމަށެވެ.

"މި ހުރި ކަންބޮޑުވުންތަކުގެ ކަންކަން ހައްލުކުރާއިރު، އޭއެފްސީ އާއި ފީފާ އަށް ދޭން ޖެހޭ ފުރިހަމަ އެއްބާރުލުން އެފްއޭއެމް އިން ދޭނެ،" ޖައުޝަން ވިދާޅުވި އެވެ.

މީގެ ކުރިން، އެފްއޭއެމް އިން 31 ޖެނުއަރީގައި ބާއްވަން އުޅުނު އިންތިހާބުގެ ކަންކަން ވެސް ހުއްޓާލަން ޖެހުނީ، ފީފާ އާއި އޭއެފްސީން އެންގުމުންނެވެ.

އެ ފަހަރުގެ އިންތިހާބު ކެންސަލްކުރަން ޖެހުނީ، އެފްއޭއެމް އިން އުސޫލާ އެއްގޮތަށް، އިލެކްޓޯރަލް ކޮމިޓީތައް އައްޔަނުކޮށްފައި ނެތުމުންނެވެ. ފަހުން، އެފްއޭއެމް އިން އެކްސްޓްރާ އޯޑިނަރީ ކޮންގްރެސްއެއް ބާއްވައި، އިލެކްޓޯރަލް ކޮމިޓީތައް ފާސްކުރި އެވެ. އެކަމަކު، އެ ކޮންގްރެސް ފީފާ އާއި އޭއެފްސީން ބަލައިގަތްކަން ކަށަވަރެއް ނޫން ކަމަށް މައުލޫމާތު އެނގޭ ބައެއް ފަރާތްތަކުން އަންނަނީ ހާމަކުރަމުންނެވެ.

އެންމެ ފަހުން ކެންސަލްކުރަން ޖެހުނު އިންތިހާބުގައި ބައްްސާމް ވާދައެއް ނުކުރެ އެވެ. އެ އިންތިހާބުގައި ވާދަކުރީ ތޯރިގު އާއި ކްލަބް އީގަލްސްގެ ވައިސް ޗެއާމަން، މުފާވިޒް ހާޝިމް (މުފާ) އެވެ.

އެފްއޭއެމް އިން ބޭއްވި އެކްސްޓްރާ އޯޑިނަރީ ކޮންގްރެސްގެ ތެރެއިން، ބޭއްވި ނޫސްވެރިންގެ ބައްދަލުވުމެއްގައި ބައްސާމް ވަނީ، އިތުރު ދައުރަކަށް އެފްއޭއެމްގެ ރައީސްގެ މަގާމަށް ކުރިމަތިލައިފާނެ ކަމުގެ އިޝާރާތެއް ދެއްވައިފަ އެވެ. އެ ގޮތުން، ބައްސާމް ވިދާޅުވީ، ވާދަނުކުރައްވާނެ ކަމަށް އިއުލާނުކުރި އިންތިހާބު މިހާރު އޮތީ ކެންސަލްވެފައި ކަމަށާއި ދެން ބާއްވާ އިންތިހާބަކާ ގުޅޭގޮތުން ވަކި ގޮތެއް ނުނިންމާ ކަމަށެވެ.

ފީފާ އާއި އޭއެފްސީން ރާއްޖޭގެ ފުޓްބޯޅަ އަށް ދޭ ފައިސާ އެފްއޭއެމްގެ ރައީސް ބައްސާމް ހިމެނޭހެން އެފްއޭއެމްގެ ބައެއް ވެރިން އަމިއްލަ މަންފާ އަށް ބޭނުންކުރި މައްސަލަތަކެއް ބަލަމުން އަންނައިރު، އޭގެއިން އެއް މައްސަލައިގައި ބައްސާމްގެ މައްޗަށް ވަނީ މަނީ ލޯންޑަރިން އާއި ހިޔާނާތުގެ ދައުވާ އުފުލައިފަ އެވެ. ފީފާ އިން އެފްއޭއެމް އަށް ދިން 1.9 މިލިއަން ޑޮލަރުގެ ކޮވިޑް ލޯންގެ ފައިސާ ބޭނުންކުރި ގޮތުގެ ކޮރަޕްޝަންގެ މައްސަލައެއް ވެސް ފުލުހުން އަންނަނީ ތަހުގީގު ކުރަމުންނެވެ.

އެފްއޭއެމް އިން ދޭން ޖެހޭ ފައިސާ ނުދީގެން، އެ އެސޯސިއޭޝަނާ ދެކޮޅަށް ގިނަ ކުންފުނިތަކަކުން ވަނީ ކޯޓަށް މައްސަލަ ހުށަހަޅައިފަ އެވެ. އޭގެ ތެރެއިން ބައެއް މައްސަލަތަކުގައި ކޯޓުން ވަނީ ހުކުމް ވެސް ކޮށްފަ އެވެ.

ފީފާ އިން އެފްއޭއެމަށް ދެމުން އައި މާލީ އެހީތެރިކަން ހުއްޓާލާފައިވާ ކަމަށް ބައެއް ފަރާތްތަކުން އަންނަނީ ހާމަކުރަމުންނެވެ. އެކަމާ ގުޅޭ ގޮތުން، "އަދަދު" އިން ކުރި ސުވާލަކަށް ޖައު ވިދާޅުވީ، ފީފާގެ ފިނޭންޝިއަލް ސަޕޯޓް އެފްއޭއެމް އަށް ހުއްޓާލިކަމެއް އަދި އަންގާފައިނުވާ ކަމަށެވެ.