އަޕްޑޭޓް ކުރަން ކަމަށް ބުނެ ސަރުކާރުގެ މަޝްރޫއުތަކުގެ އަދާހަމަ ގެނެސްދޭ އައިލްސް ވެބްސައިޓަށް ނުވަދެވޭ ގޮތް ހަދައިފި އެވެ.
އައިލްސް ވެބްސައިޓުގައި މިހާރު ޖަހާފައި އިންނަނީ "2025 ވަނަ އަހަރުގެ ބަޖެޓާ ގުޅުން ހުރި މަސައްކަތްތަކެއް ކުރުމަށް މި ވެބްސައިޓް އަޕްޑޭޓް ކުރުމުގެ މަސައްކަތް ކުރިއަށްދަނީ" ކަމަށެވެ.
ބަޖެޓުގެ މަސައްކަތެއް ކުރި ނަމަވެސް މަޝްރޫއުތަކުގެ އަދާ ހަމަ ގެނެސްދިނުން ހުއްޓާލަންޖެހޭ ސަބަބެއް އެ ވެބްސައިޓުގައި ޖަހާފައިވާ އިއުލާނަކުން ނޭނގެ އެވެ.
އައިލްސް ވެބްސައިޓަކީ ރައީސުލްޖުމްހޫރިއްޔާގެ އޮފީހުން ހިންގާ ވެބްސައިޓެކެވެ. އެ ވެބްސައިޓުން ކޮންމެ އަތޮޅެއް އަދި ރަށެއްގައި ހިންގާ ހުރިހާ ޕްރޮޖެކްޓުތަކެއް ބަލައިލެވެ އެވެ. އެ ޕްރޮޖެކްޓުތައް އޮތް ހިސާބު ވެސް އެ ވެބްސައިޓުން ފެނެ އެވެ.
އައިލްސް ވެބްސައިޓަށް ނުވަދެވޭ ގޮތް ހަދާފައި މި ވަނީ ރަށްރަށުގައި ކުރިއަށް ގެންދިޔަ 1720 ޕްރޮޖެކްޓެއް މި ސަރުކާރުން ހުއްޓާލާފައިވާ ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީން ބުނަމުންދަނިކޮށެވެ.
"މި މަޝްރޫއުތަކަކީ ރައްޔިތުންގެ އަސާސީ ހައްގުތަކާ ގުޅޭ ވަރަށް މުހިންމު މަޝްރޫއުތަކެއް. އަޅުގަނޑުމެން އަމަލު ކުރާ މި ގާނޫނުއަސާސީ ދައުލަތަށް، ރައީސްއަށް ލާޒިމު ކުރަނީ ރައްޔިތުންގެ ޓެކްސް ފައިސާ ހަރަދު ކުރުމުގައި އިސްކަންދޭންވާނީ ގާނޫނުއަސާސީގައި ބަޔާންކުރާ ރައްޔިތުންގެ އަސާސީ ހައްގުތައް ފުރިހަމަކޮށްދިނުމަށް ކަމަށް،" އިއްޔެ ބޭއްވި ނޫސްވެރިންގެ ބައްދަލުވުމެއްގައި އީސާ ވިދާޅުވި އެވެ.
ސަރުކާރުން ހިންގާ ތަރައްގީގެ މަޝްރޫއުތަކުގެ އަދާހަމަ ބެލޭނެ ގޮތަށް ވެބްސައިޓު ތައްޔާރު ކުރީ ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. އެއީ އެމަނިކުފާނުގެ ސަރުކާރުން ހިންގި "ރަށްވެހި ތަރައްގީ" ޕްރޮޖެކްޓުގެ ދަށުންނެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ވެސް އެ ވެބްސައިޓު ހިންގި އެވެ.
