އައްޑޫ އީކުއެޓޯރިއަލް ހޮސްޕިޓަލުގެ ސީއީއޯގެ މަގާމަށް ޑރ. އިބްރާހިމް ޔާސިރު މިއަދު ހަމަޖައްސައިފި އެވެ.

ސީއީއޯގެ މަގާމަށް ޑރ. ޔާސިރު ހަމަޖެއްސީ މާޗް 4، ގައި ކަމަށް އެ ހޮސްޕިޓަލުން މިއަދު ސޯޝަލް މީޑިއޯ ޕްލެޓްފޯމް އެކްސްގައި ކުރި ޕޯސްޓެއްގައި ބުނެފައިވެ އެވެ.

ޑރ. ޔާސިރަކީ އެތެރެހަށީގެ ހާއްސަ ޑޮކްޓަރެކެވެ. އޭނާ ރާއްޖޭގައި މަސައްކަތް ކުރާތާ މިހާރު 27 އަށް ވުރެ ގިނަ އަހަރުވެއްޖެ އެވެ. އޭނާ ހާއްސަ ސަމާލުކަމެއް ދެނީ ޑަޔަބެޓޮލޮޖީ، ތައިރޮއިޑް ބަލި، ރިއުމެޓޮލޮޖީ އަދި އިންފެކްޝަސް ޑިޒީސްއަށެވެ.

ގާތްގަނޑަކަށް 20،000 މީހުންގެ އާބާދީއަކާއެކު އައްޑޫއަކީ މާލެ ފިޔަވައި ރާއްޖޭގެ އެންމެ ބޮޑު އާބާދީއެއް އޮންނަ އަތޮޅެވެ. ނަމަވެސް އައްޑޫ ހޮސްޕިޓަލުން ދޭ ހިދުމަތާމެދު ގިނަ ބަޔަކު އަބަދު ވެސް ފާޑުކިޔަ އެވެ.

އެގޮތުން، ހިދުމަތް ދިނުމަށް ބޭނުންވާ ބައެއް ސާމާނު ހޮސްޕިޓަލުގައި ނެތުމާއި ޑޮކްޓަރުން މަދުވުމަކީ އެންމެ ގިނައިން ކުރާ ޝަކުވާ އެވެ. އަދި ދޭ ހިދުމަތުގެ ފެންވަރު ދަށް ކަމަށް ވެސް މީހުން ބުނެ އެވެ.