މި އަހަރު ސަރުކާރުން މުސާރައަށް 270 މިލިއަނާއި 300 މިލިއަން ރުފިޔާއާ ދެމެދު އަދަދަކަށް ފައިސާ ހަރަދު ކޮށްފައިވާ ކަމަށާއި، ބަޖެޓުގައި ފައިސާ ނެތީ އެހެންވެގެން ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރައްޔިތުންގެ މަޖިލިސް އިންތިހާބުގައި އެމްޑީޕީގެ ޓިކެޓުގައި ވާދަކުރައްވާ އަލީ ރިޒާގެ މިލަންދޫ ކެމްޕޭނު ޖަލްސާގައި ސޯލިހު ވިދާޅުވީ ސަރުކާރުން ފާއިތުވި ޖެނުއަރީ އަދި ފެބުރުއަރީ މަހު މުސާރައަށް ގާތްގަނޑަކަށް 270 މިލިއަނާއި 300 މިލިއަނާ ދެމެދުގެ އަދަދަކަށް އިތުރަށް ހަރަދު ކޮށްފައިވާ ކަމަށެވެ.
މިދިޔަ އަހަރުގެ ޖެނުއަރީ އަދި ފެބުރުއަރީ މަހު ކުރީ ސަރުކާރުން މުސާރައަށް 1.9 ބިލިއަން ރުފިޔާ ހަރަދުކުރި ނަމަވެސް، މި ސަރުކާރުން މި އަހަރުގެ ފުރަތަމަ ދެ މަސް ތެރޭގައި 2.1 ބިލިއަން ރުފިޔާ މުސާރައަށް ހަރަދު ކޮށްފައިވާ ކަމަށް ސޯލިހު ވިދާޅުވި އެވެ.
ހިތާމައަކީ ރައްޔިތުން ބޭނުންވި މިސްރާބަށް ފާއިތުވި ތިން މަހު މި ސަރުކާރުގެ މިސްރާބު ނުދާތީކަން ފާހަގަކުރައްވާ ސޯލިހު ވިދާޅުވީ ފެނިގެންދަނީ ސަރުކާރުން ސިޔާސީ މަގާމުތަކަށް ދުވަހުން ދުވަހަށް މީހުން އިތުރުކޮށް، 1500 ސިޔާސީ މުވައްޒަފުން ސަރުކާރު ތެރޭގައި ހިމެނުމަށް އަމާޒު ހިފާފައިވާ މަންޒަރު ކަމަށެވެ. އަދި ތަރައްގީގެ މަޝްރޫއުތައް ވެސް ކުރިއަށް ނުދަނީ މި ސަބަބާ ހުރެ ކަމަށް އެމަނިކުފާނު ވިދާޅުވި އެވެ.
"ކުރަން ފަށްޓާފައި ހުރި ގާގްގަނޑަކަށް ހުރިހާ މަސައްކަތެއް ހުއްޓާލައިފި. ވިދާޅުވަނީ ފައިސާ ނެތް ވާހަކަ. ކުންފުނިތަކެއް ނުހިނގާ. ވިދާޅުވަނީ ހިންގާކަށް ފައިސާއެއް ނެތޭ" ސޯލިހު ވިދާޅުވި އެވެ.
ދައުރު ނިމުނު ފަހުން، ގައުމުގެ މާލީ ހާލަތާ ގުޅޭގޮތުން ފުރަތަމަ ފަހަރަށް މިހާ ތަފްސީލީކޮށް ވާހަކަ ދައްކަވަމުން ސޯލިހު އިތުރަށް ވިދާޅުވީ ވޭތުވެދިޔަ ފަސް އަހަރު ތެރޭގައި ދިމާވި ދަތި އުނދަގުލާއެކު ވެސް ރަށްރަށުގެ ތަރައްގީއަށްޓަކައި ކޮންމެހެން ކުރަން ޖެހިފައި އޮތް މަސައްކަތްތައް ކުރުމަށް ފަހަތަށް ނުޖެހޭ ކަމަށާއި، ފައިސާ ހޯދައިގެން ރައްޔިތުން ބޭނުންވާ ކަންކަން ކުރުމުގައި އިސް ނެގި ކަމަށެވެ.
އޭގެ އިތުރުން ސޯލިހު ވިދާޅުވީ މާބޮޑެތި ތަރައްގީގެ މަޝްރޫއުތަކުގެ ވާހަކަ ދެއްކުމުގެ ބަދަލުގައި ފުރަތަމަ ކަމަކަށް ކުރަންވީ ކަމަކީ އާއިލާއާއެކު ހަމަޖެހިލައިގެން ދިރިއުޅެވޭނެ ގޮތްތަކެއް ހޯދައިދިނުން ކަމަށާއި، އެއީ މި ރާއްޖެ ތަރައްގީ ކުރުމަށް މަސައްކަތް ފަށަން ޖެހިފައި އޮތް ހިސާބު ކަމަށެވެ. އަދި އެދެވޭ ގޮތެއްގައި ރާއްޖެ ތަރައްގީ ނުކުރެވިފައި އޮތީ ތަރުތީބުވެގެން ތަރައްގީ ކުރުމަށް ފަސްޖެހޭތީ ކަމަށާއި، ދައުލަތަށް ލިބޭ އާމްދަނީގެ ބޭނުން އެންމެ ރަނގަޅަށް ބޭނުން ނުކުރާތީ ކަމަށް ސޯލިހު ވިދާޅުވި އެވެ.
