6 މާރިޗު 2024 - 10:37 1
އަހުމަދު އާއިދު
މުލިއާގޭގައި ހުރި ކަމަށް ބުނެ ފަތުރަމުންދާ ކަރޯކޭ ސިސްޓަމުގެ ފޮޓޯ
6 މާރިޗު 2024 - 10:37 1
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން، ސާޖިދާ މުހައްމަދު ކަރޯކޭ ކުޅުއްވާ ކަމާއި އެ ކަމަށް ރައީސްގެ ރަސްމީގެ، މުލީއާގެއަށް އަގުބޮޑު ކަރޯކޭ ސިސްޓަމެއް ގަނެ ވެއްދި ކަމަށް ބުނެ ފޮޓޯއަކާއެކު ސޯޝަލް މީޑިއާގައި އިއްޔެ ވާހަކަތައް ފަތުރަން ފެށި އެވެ. އެ ވާހަކަ ރައީސް އަބްދުﷲ ޔާމީން އުފައްދަވާ ޕީއެންއެފްގެ ޖަލްސާއެއްގައި ވެސް މީހަކު ދެއްކި އެވެ.
ދައުރު ކުރި ފޮޓޯއިން ފެންނަނީ ރަނގަޅު ފެންވަރަކަށް ހަދައި، ކާޕެޓު އަޅާފައިވާ ތަނެއްގައި ބަހައްޓާފައި ހުރި ބޮޑު ކަރޯކޭ ސިސްޓަމެކެވެ. ފޮޓޯއިން ފެންނަނަ ދެ ސްޕީކަރު އިސްކޮޅު ވަރުވެ އެވެ. އެއީ މުލީއާގެ ކަމާއި އެ ފޮޓޯއިން ފެންނަ ސިސްޓަމް ގެނައީ ސިންގަޕޫރުން ކަމާއި އަދި އޭގެ އަގަކީ 80،000 ޑޮލަރު ނުވަތަ 1.5 މިލިއަން ރުފިޔާ ކަމަށް އަޑު ފެތުރި އެވެ. އެ ފައިސާ ހަރަދު ކުރީ ވެސް ސަރުކާރުން ކަމަށް ބުނެއެވެ.
އިތުރު ކަމެއް ބެލުމުގެ ކުރިން، ދައުރުކުރި ފޮޓޯގެ ހަގީގަތް ބަލައިލި އިރު، އެއީ މުލީއާގޭގެ މަންޒަރެއް ނޫންކަން ކަށަވަރު ކުރެވުނެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގައި މުލިއާގޭގެ އިސް މަގާމުތަކުގައި ތިއްބެ ބައެއް އޮފިޝަލުން އަދި މި ސަރުކާރުގައި މުލިއާގޭގައި މަސައްކަތް ކުރައްވާ ބައެއް އޮފިޝަލުން އަދަދު ނޫހަށް ކަށަވަރުކޮށް ދެއްވި ގޮތުގައި ދައުރުކުރި ކަރޯކޭ ސިސްޓަމް ހުރި ފޮޓޯއަކީ މުލިއާގޭގެ މަންޒަރެއް ނޫނެވެ.
އިތުރަށް ހޯދި ހޯދުންތަކުން އެނގުނު ގޮތުގައި އެއީ ވިއެޓްނާމުގެ ވެބްސައިޓެއްގައި ޝާއިއުކޮށްފައިވާ ފޮޓޯ އެކެވެ. އެ ފޮޓޯ އާއި މުލިއާގެ ކަމަށް ބުނެ ފެތުރި ފޮޓޯގައި ފަރަގެއް ނެތެވެ.
ރައީސް މުއިއްޒު ނޮވެމްބަރު 17، 2023 ގައި ވެރިކަމާ ހަވާލުވެވަޑައިގެންނެވުމަށް ފަހު ފުރަތަމަ ދިރިއުޅުއްވީ އަމިއްލަގެ، މ. ދިމްޔާތުގަ އެވެ. މުލީއާގެ މަރާމާތު ކުރުމަށް ފަހު ރައީސް މުއިއްޒާއި އާއިލާ މުލީއާގެ އަށް ބަދަލުވެވަޑައިގަތީ ހުވާ ކުރެއްވިތާ އައްޑިހަ ދުވަސް ފަހުންނެވެ.
މި ލިޔުމާ ގުޅޭ ލިޔުންތައް
Comment