18 ފެބުރުވަރީ 2024 - 13:22 2
މުހައްމަދު ނަސީމް
ކޫއްޑޫގައި މަސްވެރިން މިއަދު މުޒާހަރާ ކުރަނީ: މިފްކޯއިން މަސްވެރިންނަށް ދޭން ޖެހޭ 290 މިލިޔަން ރުފިޔާ ނުދީ އެބަ އޮތް -- ފޮޓޯ: ވީޑިއޯ ކެޕްޗާ
18 ފެބުރުވަރީ 2024 - 13:22 2
"ފޯނުބިލު ނުދެއްކޭ، ކަރަންޓުބިލު ނުދެއްކޭ ކުދިންގެ ޓިއުޝަންފީ ނުދެއްކޭ, އަންހެނުންގެ ޕެޑްފޮށި ނުގަނެވޭ،" މިފްކޯއަށް ކިރި މަހަށް ފައިސާ ނުދޭތީ ދިރިއުޅުމުގެ ހާލަތު ހުރި ގޮތް ކިޔައިދެމުން މަސްވެރިއަކު މިއަދު ބުންޏެވެ. އޭނާއަށް ނުދެއްކި ހުރި ބިލުތަކާއި ނުގަނެވި ހުރި ތަކެތީގެ ލިސްޓް ދިގެވެ. އެހެން ނަމަވެސް އެއީ އަތް އުރާލައިގެން ގޭގައި ހުރި މަސްވެރިއެއް ނޫނެވެ.
މިދިޔަ ދެ މަސްދުވަހު އޭނާ އާއި އޭނާ ފަދަ އެތައް މަސްވެރިންނެއް ވަނީ ރަތްދައްކަ އައްވާއި ގަދަ ވަޔާއި ބޯ ވާރޭގައި މާކަނޑަށް ނުކުމެ، އެތައް ހާސް ޓަނެއްގެ މަސް ބާނައި، މިފްކޯއަށް ކިރައިފަ އެވެ. ފިޝަރީޒް މިނިސްޓަރު އަހުމަދު ޝިޔާމް ރައްޔިތުންގެ މަޖިލީހުގައި ވިދާޅުވެފައިވާ ގޮތުގައި މިފްކޯއިން މަސްވެރިންނަށް ދޭން ޖެހޭ 290 މިލިޔަން ރުފިޔާ އަދިވެސް ނުދީ އެބަ އޮތެވެ. އެއީ 11،600 ޓަނުގެ މަސް ކިލޯއަކަށް 25 ރުފިޔާގެ ރޭޓުން ގަތީމާ ދައްކަން ޖެހޭ އަގެެވެ.
ހުވަދުއަތޮޅުގެ ދެބުރިއާއި އައްޑޫ އަދި ނިލަންދެ އަތޮޅުގެ ބައެއް މަސްވެރިން އަރައިގެން އައި އިރާއެކު މިއަދު ކޫއްޑޫއަށް ފޭބީ އެ ފައިސާ ނުދޭތީ އުޅޭ ހާލުގެ ވާހަކަ އަޑުގަދަކޮށް ގޮވައިލުމަށެވެ. ކޫއްޑޫގައި ފެށި މުޒާހަރާގައި ބައިވެރިވެގެން ހުރި މުހައްމަދު ކެޔޮޅު ބުނި ގޮތުގައި މަސްވެރިންގެ އިހުތިޖާޖު ހުއްޓައިލާނީ ފައިސާގެ ކަންތައް ކޮޅެއްގައި ޖައްސައިފަ އެވެ.
"މި މުޒާހަރާ ކުރިއަށް ދާނެ އަޅުގަނޑުމެންނަށް ހަމަ ލާރި ލިބެންދެން ކޮންޓިނިއުސް ކޮށް،" މުޒާހަރާއާ ބެހޭ ގޮތުން "އަދަދު" އިން ކުރި ސުވާލަށް ޖަވާބު ދެމުން އޭނާ ބުންޏެވެ.
އޭނާ ބުނި ގޮތުގައި މިފްކޯއިން އެއްވެސް ފައިސާއެއް ދޫނުކުރާތާ މިހާރު ދެމަހާ އެއް ދުވަސް ވެއްޖެ އެވެ. ފައިސާ ނުލިބި އެހައި ދުވަސްވުމުން މަސްވެރިން ތިބީ ވަރަށް ހާލުގައި ކަމަށް ބުނެ އޭނާ ފާޅުކުރީ އެންމެ އަސާސީ ހިދުމަތްތަކުގެ މަހުރޫމު ވެދާނެ ކަމުގެ ކަންބޮޑުވުމެވެ. ފޯނުގެ ހިދުމަތާއި ކަރަންޓުގެ ހިދުމަތް އޭގެ ތެރޭގައި ހިމެނެ އެވެ.
މިއަދުގެ މުޒާހަރާގައި ބައިވެރި ނުވެވި ހުރި މަސްވެރިއެއް ކަމަށްވާ އާމިރު އަލީ ބުނި ގޮތުގައި ދައުލަތުގެ މަސްކުންފުނި މިފްކޯއިން މަސްވެރިންނަށް ދޭން ޖެހޭ އެތައް މިލިޔަން ރުފިޔާއެއް ނުދީ އޮތް އިރު ޔޫޓިލިޓީ ހިދުމަތްދޭ ކުންފުނިތަކުން އެކަމެއް ނުދަނެ އެވެ. އެއްކޮޅުން މިފްކޯއިން ފައިސާ ނުދީ އޮތް އިރު އަނެއްކޮޅުން ފެނަަކައިން ފޮނުވަނީ ކަރަންޓު ކަނޑައިލާނެ ކަމުގެ އިންޒާރެވެ.
"ކަރަންޓާ ނުލައި ނުއެއް އުޅެވޭނެތާ، އެހެންވީމާ އެގޮތް މިގޮތުން [ދަރަންޏަށް] ފައިސާ ހޯދައިގެން ކަރަންޓު ބިލު މިހާރު ދައްކައިފިން. އެކަމަކު ގެއިން އިންޓަނެޓް އެހެރީ ކެނޑިފައި،" އާމިރު ބުންޏެވެ.
އޭނާ މަހަށްދާ، ގއ. ގެމަނަ ފުށީގައި ދުއްވާ ގަސްވާ ދޯނިން 28 މީހަކު މަހަށް ދެ އެވެ. އެ 28 މީހުން ބަލަހައްޓާ 28 އާއިލާއަށް ވެސް އާމިރަށް އޮތް ފަދަ ދަތިކަން އެބަ އޮތެވެ.
"ޑިސެމްބަރު 18، އިން ފެށިގެން އެންމެ ބިލަކަށް ވެސް ފައިސާ ދީފައެއް،" ކުރިއަށް އޮތީ ރޯދަމަސްކަން ފާހަގަކުރަމުން، އިންތިހާ ދަރަޖައިގެ ކަންބޮޑުވުމާ އެކު އޭނާ ބުންޏެވެ.
މަސްވެރި ރަށްރަށުގައި ދުވަހުން ދުވަހަށް ގަންނަން ޖެހޭ ތަކެތި ހޯދުމުގައި މަސްވެރިންނާއި ވިޔަފާރިވެރިންނާ ދެމެދު އޮންނަނީ އިތުބާރުގެ މައްޗަށް ބިނާވެފައިވާ ލޭންދޭނަށް ދޫކުރުމުގެ ނިޒާމެކެވެ. ފިހާރަތަކުން މަސްވެރިންނަށް ތަކެތި ދޫކުރަނީ މިފްކޯއިން ފައިސާ ދޫކުރުމާ އެކު ދައްކާނެތީ އެވެ. ކަންތައްތައް ރަނގަޅަށް އޮތް ޒަމާނުގައި އެއީ ގިނަވެގެން ދެ ހަފުތާގެ ތެރޭގައި ނިމޭ މުއާމަލާތެކެވެ. އެހެން ނަމަވެސް މަސްވެރިންނަށް ފައިސާއެއް ނުލިބި ދެމަސް ދުވަސް ވުމުން އެކަން ވެސް އޮތީ ބޮއްސުންލައިފަ އެވެ.
މިފްކޯއިން މަސްވެރިންނަށް ނުދީ ހުރި ފައިސާއާ ބެހޭ ގޮތުން ފިޝަރީޒް މިނިސްޓަރު އަހުމަދު ޝިޔާމް ރައްޔިތުންގެ މަޖިލީހުގެ މެމްބަރުންނަށް ފެބްރުއަރީ 12، ގައި ބޭއްވި ޖަލްސާގައި ޖަވާބުދެއްވި އެވެ. އޭނާ ވިދާޅުވީ މަސްކިރާތާ 48 ގަޑިއިރުގެ ތެރޭގައި ފައިސާ ދިނުމަކީ މި ސަރުކާރުގެ ވައުދެއް ކަމަށާއި އެކަން ހަނދާން ނުނެތޭ ކަމަށެެވެ.
"އެ ވައުދު ހާސިލުކުރުމަށް ޓަކައި އަަޅުގަނޑުމެން މިހާރު މަސައްކަތް ކުރަމުން މިދަނީ،" ޝިޔާމް އެދުވަހު ވިދާޅުވި އެވެ.
އޭނާ ވިދާޅުވި ގޮތުގައި މަސްގަންނަ އަގު 25 ރުފިޔާއިން 20 ރުފިޔާއަށް ތިރިކުރުމަކީ އެގޮތުން އެޅި ފިޔަވަޅެކެވެ. މި ސަރުކާރު އައި އިރު މަސްވެރިންނަށް ދޭން ޖެހޭ ފައިސާގެ ބޮޑު "ބެކްލޮގެއް" އޮތް ކަމަށާއި މިހާރު އޮތް ދަތި ކަން ގުޅިފައި އޮތީ އެ ބެކްލޮގާ ކަމަށް ވެސް ޝިޔާމް އެދުވަހު ވިދާޅުވި އެވެ.
"އެ އުނދަގުލުން އަރައިނުގަނެ މިއުޅެނީ، އެހެން ނަމަވެސް އިރާދަކުރެއްވިއްޔާ މާ ލަސްތަކެއް ނުވެ މިއުނދަގުލުން އަޅުގަނޑުމެން އަރައިގަނެ، މަސްވެރިންނަށް ދޭން އޮތް ފައިސާގެ ބެކްލޮގް އިރާދަކުރެއްވިއްޔާ އަޅުގަނޑުމެން ފިލުވައިލާނަން،" ޝިޔާމް ވިދާޅުވި އެވެ.
މިނިސްޓަރު އެ ޖަވާބު ދެއްވި އިރު މަސްވެރިންނަށް އެހައިތަށް ދޫނުކޮށް އޮތް ފައިސާގެ އަދަދަކީ 270 މިލިޔަން ރުފިޔާ އެވެ. އެހެން ނަމަވެސް އޭގެ ފަހުން ކިރި މަހަށް ދޭން ޖެހޭ ފައިސާއާ އެކު މިހާރު އެ އަދަދު އޮތީ 308 މިލިޔަނުގަ އެވެ.
"އަދަދު" ން ކުރި ސުވާލަކަށް ޖަވާބު ދެއްވަމުން މިނިސްޓަރު ޝިޔާމް މިއަދު ވިދާޅުވީ މާޗް 5، ގެ ކުރިން އެ ހުރިހާ ފައިސާއެއް ދޫކޮށް ހަލާސްކުރާނެ ކަމަށެވެ.
Comment