އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އެމަނިކުފާނު ޖަލުގައި ބަހައްޓަން ބޭނުން ނުވާނެ ކަމަށާއި އެމަނިކުފާނު މިނިވަން ކުރަން މިއަދުގެ ސަރުކާރަށް ދަތިވެގެން އުޅެނީ ކޮންކަމާ ގުޅިގެންތޯ ސުވާލު އުފައްދަވައި ވެރިކަން ކުރާ ޕީޕީއެމް/ޕީއެންސީ ކޯލިޝަންގެ ލީޑާޝިޕާ މެދު ކުރީގެ ރައީސް އަބްދުالله ޔާމީން ހިތްހަމަނުޖެހުން ފާޅުކުރައްވައިފި އެވެ.
ރޭ އެމަނިކުފާނު އަލަށް އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) ގެ އޮފީހުގައި ރައްޔިތުންގެ މަޖިލީހަށް ވާދަކުރައްވާ ކެންޑިޑޭޓުންތަކެއް ތައާރަފު ކުރުމަށް ބޭއްވި ޖަލްސާގައި ޔާމީން ވަނީ އަދިވެސް އެމަނިކުފާނު ބަންދުގައި ހުންނެވި ސަބަބާ ގުޅޭގޮތުން ސުވާލު އުފައްދަވާފަ އެެވެ.
"އެމްޑީޕީއެއް ނޫން ވެރިކަމުގައި މިތިބިކީ. އެހެންވީމާ އެމީހުން ކޮންމެހެން ބޭނުމެއް ނުވާނެ އަޅުގަނޑު ޖަލުގައި ބަހައްޓަން. ނޫނިއްޔާ އަޅުގަނޑާއި އަޅުގަނޑުގެ ވޯޓަރުންނާ ވާހަކަ ދެއްކުން މަނާކުރަން އެމީހުން ބޭނުމެއް ނުވާނެ ކޮންމެހެނެއް," ޔާމީން ޝުއޫރު ފާޅުކުރައްވަމުން ވިދާޅުވި އެވެ.
މިހާރު އޮތް ސަރުކާރަކީ އެމަނިކުފާނުގެ ސަޕޯޓަރުން ވެސް ހިމެނޭހެން ގެނައި އެމަނިކުފާނުގެ ފިކުރުގެ ތާއިދާއެކު ވެރިކަމަށް އައި ސަރުކާރެއް ކަމަށް ޔާމީން ވިދާޅުވި އެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ކެމްޕޭނުގައި އެންމެ ބޮޑަށް ހުށަހެޅުއްވީ ޔާމީންގެ ސިޔާސަތުތަކެވެ.
"އެހެންވީމާ ކޮން ބަޔަކަށްހޭ މިހާރު އަޅުގަނޑަށް މި ދެންނެވި ފުރިހަމަ މިނިވަންކަން, އަޅުގަނޑާއި އަޅުގަނޑުގެ ވޯޓަރުންނާ ވާހަކަ ދެއްކުމުގެ މިނިވަންކަން ނުދޭން, މި ދަތިވެގެން އުޅެނީ ކޮން ބަޔަކަށްތޯ," ޔާމީން އެއްސެވި އެވެ.
ކޯޓުގެ އަމުރާ އެކު ލީޑާޝިޕްގެ އަޑު ކެނޑުނު
ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ޔާމީންގެ މައްޗަށް އޮތީ އިއްވާފަ އެވެ. އެ ހުކުމުގެ ސަބަބުން ޕީޕީއެމް/ޕީއެންސީގެ ޓިކެޓު ލިބިވަޑައިގެންނެވި ނަމަވެސް އިންތިހާބުގައި ޔާމީނަށް ވާދަ ނުކުރައްވަ އެވެ.
އެއީ, އެ ޖަލު ހުކުމުގެ ސަބަބުން ޔާމީންގެ ކިބައިގައި ކެންޑިޑޭޓަކަށް ވުމުގެ ޝަރުތު ފުރިހަމަ ނުވާ ކަމަށް ސުޕްރީމް ކޯޓުން ކަނޑައެޅުމުންނެވެ. އެ ހުކުމާ އެކު ޕީޕީއެމް/ޕީއެންސީގެ ލީޑާޝިޕްގެ އަޑު ކެނޑިގެން ދިޔަ ކަމަށް ޔާމީން ވިދާޅުވި އެވެ.
"ހަމަ މުޅިން ކެނޑިގެން ދިޔައީ [އަޑު]. އަޅުގަނޑުގެ ވިސްނުމުގައި ސުޕްރީމް ކޯޓުން ވެސް އަލުން އެ ބޭފުޅުން ނިންމެވި ނިންމެވުން މުރާޖާ ކުރެއްވުމުގެ ފުރުސަތު ލިބޭނީ އަޅުގަނޑުމެން ސިޔާސީ ޕާޓީއަކަށް ވެގެން އަޅުގަނޑުމެން ފިރާސި ވަރުގަދައަށް އެކަމަށް އިހުތިޖާޖުކޮށްގެން," އެ އަމުރާ ގުޅޭގޮތުން ފުރަތަމަ ފަހަރަށް ލައިވް ޓީވީއެއްގައި ވާހަކަ ދައްކަވަމުން ޔާމީން ވިދާޅުވި އެވެ.
އެކަން ކުރެވެން އޮތީ އިންތިހާބު ބޮއިކޮޓް ކޮށްގެން ކަމަށް ދެކެވަޑައިގެންނެވި ކަމަށާއި އެއީ ސުޕްރީމް ކޯޓަށް "މި ހެދުނީ ގޯހެއްކަން ވިސްނި" އަލުން އެ މައްސަލަ ރިވިއު ކުރުމުގެ ފުރުސަތު އޮންނާނީ އޭރުން ކަމަށް ދެކެވަޑައިގަންނަވާތީ ކަމަށް ޔާމީން ވިދާޅުވި އެވެ. ޕީޕީއެމްގައި ގިނަ އަދަދެއްގެ މެމްބަރުން ތިބުމުން އެ ފުރުސަތު އޮންނާނެ ކަމަށް ޔާމީން ގަބޫލުކުރައްވަ އެވެ.
"އެ މަސައްކަތް ވެސް އަޅުގަނޑުމެން ޕާޓީގައި ތިއްބެވި ބޭފުޅުން ބޭނުމެއް ނުވޭ [ކުރައްވާކަށް],"
"ސަރުކާރުގެ ވެރިންނަށް ފޯނު ނަގަން ކެރިވަޑައެއްނުގަންނަވާ"
ލީޑަރުންގެ ގޮތުގައި ތިބޭ މީހުން ދައްކާ ވާހަކަ ބަދަލުވެގެން ދިޔުމުން ސުވާލު އުފެދެނީ އެ ވާހަކަތައް ދެއްކެވި ބޭފުޅުންގެ ނިޔަތާ މެދު ކަމަށް ވެސް ޔާމީން ވިދާޅުވި އެވެ.
"މިއިން އެއްވެސް ބޭފުޅަކު ބޭނުމެއް ނުވޭ މެސެޖަކަށް ޖަވާބު ދެއްވާކަށް ވެސް އަދި ފޯނަކަށް ޖަވާބު ދެއްވާކަށް ވެސް ބޭނުންފުޅެއް ނުވޭ, ކެރިވަޑައިގައެއް ވެސް ނުގަންނަވާ. އެހެންވީމާ އެ ގުޅުމެއް ނޯވޭ. ކީއްވެގެންތޯ އޯވާނައިޓް (އެއްރެއިން) މި ހުރިހާ ކަމެއް ބަދަލުވެގެން ދިޔައީ," ސަރުކާރުގެ ވެރިންނާ މެދު ފާޅުކުރެއްވި ހިތްހަމަނުޖެހުންތަކުގެ ތެރެއިން ޔާމީން ވިދާޅުވި އެވެ.
ރިޔާސީ ކެމްޕޭނުގައި ވީ އެންމެ ބޮޑު ވައުދަކީ ކުރީގެ ރައީސް އަދި ޕީޕީއެމް/ޕީއެންސީގެ އޭރުގެ ލީޑަރު އަބްދުﷲ ޔާމީން މިނިވަން ކުރެއްވުމެވެ. އޭރު ރައީސް މުއިއްޒު އާއި އެ ކޯލިޝަންގެ ލީޑަރުން ވިދާޅުވަމުން ގެންދެވީ ޔާމީން ޖަލަށް ލާފައި ހުރީ ކުށެއް ކޮށްގެން ނޫން ކަމަށާއި، މިިނިވަން ނުވެ ހުރީ އޭރު ސަރުކާރުން ކޯޓުތަކަށް ނުފޫޒު ފޯރުވާތީ ކަމަށެވެ.
ޔާމީން އަދިވެސް މިނިވަން ނުވެ ހުންނެވިއިރު، އެ ވައުދު ފުއްދިފައިވާ ކަމަށް މި ސަރުކާރުން ބުނެފައިވެ އެވެ. އެ މަނިކުފާނު އަދިވެސް ހުންނެވީ މާލޭ ބަންދުގަ އެވެ. ކުރިން އިވެމުންދިޔަ ހަރާމް ހުކުމުމުގެ އަޑުވެސް ވަނީ ކެނޑިފަ އެވެ.
