ގައުމީ ބާސްކެޓްބޯޅަ ލީގުގެ އަންހެން ޑިވިޝަނުގައި ރޭ ކުޅުނު މެޗުން، ކުއީންސް ބާސްކެޓްބޯލް ކްލަބުން ބޮޑު ފަރަގަކުން ސައިކްލޯން ބާސްކެޓްބޯލް ކްލަބް ބަލިކޮށްފި އެވެ.

ކުއީންސް އިން މި މެޗު ކާމިޔާބުކުރީ 95-27 އިންނެވެ.

ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ސައިކްލޯން އާއި ކުއީންސް ބައްދަލުކުރި މެޗުގެ ފުރަތަަަމަ ދެ ކުއާޓަރުގައި ކުއީންސް އިން ފަރަގު ބޮޑުކޮށް، ފަހު ދެ ކުއާޓަރުގައި އިތުރަށް ކުޅުން ރަނގަޅުކުރީ އެވެ. ކުއީންސްގެ ފަރާތުން ޖުމްލަކޮށް ބަލާއިރު، މި މެޗުގައި ރަނގަޅު ކުޅުމެއް ފެނިގެންދިޔަ އެވެ.

މެޗުގައި ކުއީންސް އަށް އެންމެ މޮޅު ކުޅުމެއް ދައްކައިިދިނީ، އައިމިނަތު އިސްރާއު އަބްދުލް ޝުކޫރު އެވެ. އޭނާ ވަނީ 27 ޕޮއިންޓް ހޯދައިފަ އެވެ. ކުއީންސްގެ އައިމިނަތު ޝިއުރާ ވަނީ 14 ޕޮއިންޓް އެއްކޮށްފަ އެވެ. އަދި އެ ޓީމުގެ ހައުމާ އުބައިދުﷲ އާއި ފާތިމަތު ރިޝްމާ، ކޮންމެ ކުޅުންތެރިއަކު، ވަނީ 13 ޕޮއިންޓް ހޯދައިފަ އެވެ.

މުބާރާތުގައި ކުއީންސް ފުރަތަމަ މެޗުން މޮޅުވީ އެލީޓް ސްޕޯޓްސް ކްލަބާ ވާދަކޮށް، 82-56 އިންނެވެ. ރޭ ކުޅުނު ދެ ވަނަ މެޗުން، ލަޔަނެސް އަތުން 90-33 އިން މޮޅުވެފަ އެވެ.

އެލީޓުން މި މެޗުގެ ފުރަތަމަ ކުއާޓަރު ނިންމާލީ 21 ޕޮއިންޓުގެ ލީޑަކާ އެކު އެވެ. މި ސްކޯ އިން ފުރަތަމަ ކުއާޓަރު ނިމުނުއިރު ލިބުނު އިތުބާރާ އެކު، ދެން ކުޅުނު ހުރިހާ ކުއާޓަރެއްގައި އެލީޓަށް ހަމަޖެހިލައިގެން ކުޅެލަން ފަސޭހަވި އެވެެ. ނަތީޖާ އަކަށްވީ ތަފާތު ބޮޑު މޮޅަކާ އެކު، މުބާރާތުގައި ކުރިއަށްދާން އެލީޓަށް ފުރުސަތު ހުޅުވުމެވެ.

ރޭގެ މެޗުގައި އެލީޓަށް އެންމެ ރަނގަޅު ކުޅުމެއް ދައްކައިދިނީ، 24 ޕޮއިންޓް އެއްކުރި ރާއީ ހަމްޒާ އެވެ.

ގައުމީ ބާސްކެޓްބޯޅަ ލީގުގައި މިރޭ ހަތެއް ޖަހާއިރު އޮތީ ގަދަހިފުމެކެވެ. އެއީ ފުރަތަމަ ދެ މެޗުން މޮޅުވެފައި އޮތް، ޓީރެކްސް އާއި ކިންގްސް އެެވެ. އެ އަށް ފަހު، 9 ޖަހާއިރު ކުޅޭނީ، ސްޓިންގާސް އާއި ރެޕްޓާސް އެވެ.