ސީރިޔާ ހަނގުރާމައިގައި ބައިވެރިވާން ދިޔަ ދިވެހިންގެތެރެއިން މިއަދު ރާއްޖެއަށް ގެނެވުނު ފަސް އާއިލާގެ މީހުން ރިހެބިލިޓޭޓްކުރެވޭނެކަމުގެ ޔަގީންކަން އޮތް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

ސީރިއާގައި ތިބި 21 ދިވެއްސަކު ރާއްޖެގެނައުމަށް ފަހު މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރު އިހުސާން ވިދާޅުވީ، މީގެ ކުރިން ސީރިއާއިން ދިވެހި އެއް އާއިލާއެއް ރާއްޖެ ގެނެސް ހިންމަފުށީގައި ހުންނަ އިންޓަގްރޭޝަން ސެންޓަރުގައި ބައިތިއްބައިގެން ފަރުވާ ދެވި މިހާރު މުޖްތަމައަށް ދޫކޮށްލެވިފައިވާކަމަށެވެ.

އެ އާއިލާގެ ކަންކަން ފަސް އަހަރަށް ގާތުން ބަލާނެކަން ފާހަގަކުރައްވަމުން މިނިސްޓަރު ވިދާޅުވީ، އެ އާއިލާ މުޖްތަމައަށް ދޫކޮށްލިތާ އަހަރަކަށްވުރެ ގިނަ ދުވަސްވެފައި ވާއިރު، އެމީހުންގެ ފަރާތުން އެއްވެސް ނުރައްކަލެއް ކުރިމަތިވެފައި ނުވާކަމަށެވެ.

"ދުނިޔޭގެ އެކި ގައުމުތަކުގައި މި މަސައްކަތް ވަރަށް ފުޅާ ދާއިރާއެއްގައި ކުރެވޭ. ސަކްސެސްފުލީ ވަަރަށް ގިނަ ގައުމުތަކުގައި އެބަ ހުރި ރިހެބިލިޓޭޓް ކުރެވިފަ ރިއިންޓަގްރޭޓް ކުރެވިފައި." މިނިސްޓަރު އިހުސާން ވިދާޅުވި އެވެ.

އަދި އެމީހުން އުޅެމުން ދަނީ ވެސް އާދައިގެ ދިރިއުޅުމެއްކަން ފާހަގަކޮށް އިހުސާން ވިދާޅުވީ، މިއަދު ރާއްޖެ ގެނައި ހުރިހާ އެންމެނަށްވެސް ފަރުވާދެވޭނެކަމުގެ ފުރިހަމަ ޔަގީންކަން އޮތް ކަމަށެވެ.

ސީރިއާއަށް ގޮސް ތިބޭ ދިވެހިން ރާއްޖެ ގެނައުމުގެ ކުރިން އެމީހުންނަކީ ދިވެހިންތޯ ޔަގީންކުރުމަށް ޑީއެންއޭ ޓެސްޓު ހަދަ އެވެ.

އިހުސާން ވިދާޅުވި ގޮތުގައި އެ އެންމެންނަކީ ވެސް އެކި މިންވަރަށް ހަނގުރާމައިގެތެރެއަށް ވަދެވި، އެފަދަ ފިކުރުތައް ހުރި މީހުންނަށް ވާތީ، ފަރުވާ ދެމުން ގެންދާނީ އެސެސްމެންޓަކަށް ފަހު، އެމީހަކަށް އެންމެ ބޭނުންތެރި ފަރުވާ ދެނެގަނެވިގެން ކަމަށެވެ.

"އެކި މީހުން އެކްސްޕޯސްކުރެވިފައި، އެކި ޓްރޯމާ، އެކި ވައްތަރުވައްތަރުގެ ކަންކަން މިހުންނަނީ. ސައިކޮލޮޖިކަލީ ކިހާވަރެއްގެ އިމްޕެކްޓެއްތޯ ކޮށްފައި ހުރީ، މި ހުރިހާ އެސްޕެކްޓަކުން ބަލާފައި އަޅުގަނޑުމެން މިހަދާ އެސެސްމެންޓުގެ ޒަރިއްޔާއިން ދެނެގަންނާނީ ކޮން ޕްރޮގްރާމެއްތޯ، ޕްރޮގްރާމު ހިންގަން ފެށީމަ ރިކަވަރީއަކީވެސް އެކި މީހުން ރެސްޕޮންޑު ކުރަނީ އެކި ވަރުވަރަށް" އިހުސާން ވިދާޅުވި އެވެ.

ސީރިއާއިން ގެންނަ ދިވެހިންގެ ތެރޭގައި ތިބި ކުޑަކުދިން، މުޖްތަމައަށް ނެރެވޭވަރު ވުމުން ހިންމަފުށީ ސްކޫލުގައި ކިޔަވައިދިނުމަށް ވެސް ވަނީ ނިންމާފަ އެވެ. އެކުދިންނަށް ކިޔަވައިދިނުމަށް އެރަށު ސްކޫލުގެ ޓީޗަރުން ތިބީ ފުރިހަމައަށް ތަމްރީންކުރެވިފައިކަމަށާއި، ބެލެނިވެރިންނާއި ދަރިވަރުން ހޭލުންތެރިކުރުވުން ވެސް ކުރިއަށް ގެންދާނެ ކަމަށް މިނިސްޓަރު ވިދާޅުވި އެވެ.

ސީރިއާގެ ބައެއް ސަރަހައްދުތައް އިސްލާމިކް ސްޓޭޓް (އައިއެސް) އާއި އަލްގައިދާއިން ކޮންޓްރޯލްކުރި ދުވަސްވަރު އެ ޖަމާއަތްތަކާ ގުޅެން ދިވެހިންގެ އެތައް ބަަޔަކު ދިޔަ އެވެ. އޭގެ ތެރެެއިން ބައެއް މީހުން ދިޔައީ އަނބިދަރިން ވެސް ގޮވައިގެންނެވެ. އެ މީހުންގެ ތެރެއިން އެތައް ބަޔަކު މަރުވެފައި ވާއިރު، އަދިވެސް ކޭމްޕުތަކުގައި ދިވެހިން އެބަ ތިއްބެވެ. އެކަމަކު އެ ދިވެހިންގެ އަދަދު އެނގޭ އެއްވެސް މުއައްސަސާއެއް ނެތެވެ.

ސީރިއާގެ ކޭމްޕުތަކުގައި ތިބި ދިވެހިން ގެނައުމުގެ މަސައްކަތް ފެށީ ކުރީ ސަރުކާރުންނެވެ. އެގޮތުން 2022 ގެ ކުރީކޮޅު ގެނައި އާއިލާއެއް މިހާރު ވަނީ ރިހެބިލިޓޭޓު ކޮށް ނިންމުމަށްފަހު މުޖުތަމައަށް ދޫކޮށްލާފަ އެވެ. ސީރިއާގައި ތިބި މީހުން ގެންނަން މި ގައުމުގައި ތިބި އެ މީހުންގެ އާއިލާތަކުން މަސައްކަތް ކުރާތާ ވެސް ދުވަސްތަކެއް ވެއްޖެ އެވެ.