ސްޓޮކްހޯލްމް، ސްވިޑެން (ޖެނުއަރީ 15) - ސްވިޑެން ގައުމީ ފުޓްބޯޅަ ޓީމުގެ ކޯޗުކަން ހަވާލުކުރަން މެންޗެސްޓާ ޔުނައިޓެޑްގެ ކުރީގެ ކޯޗު، ނޯވޭގެ އޮލެ ގުނަ ސޯލްޝެއާއާ މަޝްވަރާކޮށްފައިވާ ކަމަށް ރިޕޯޓްތައް ބުނެފި އެވެ.

އެންމެ ފަހުގެ ވޯލްޑް ކަޕާއި މި ފަހަރުގެ ޔޫރޯ ފުޓްބޯޅަ މުބާރާތުން ސްވިޑެން އަށް ފުރުސަތު ނުލިބުމުން، އެ ގައުމުގެ ފުޓްބޯޅަ ޓީމުގެ ކޯޗަކަށް ހުރި ޖޭން އެންޑަސަން ވަނީ މަގާމުން ދުރުވެފަ އެވެ. އެ މަގާމަށް އާ ކޯޗަކު ގެންނަން ސްވިޑެން އެފްއޭ އިން ކުރަމުން އަންނަ މަސައްކަތުގައި ސޯލްޝެއާއާ ވަނީ މަޝްވަރާކޮށްފަ އެވެ.

ޔުނައިޓެޑްގެ ކޯޗުކަމުން، 2021 ވަނަ އަހަރުގެ ނޮވެމްބަރު މަހު ވަކިވި ފަހުން، ސޯލްޝެއާ ހުރީ ޓީމަކާ ހަވާލުނުވެ އެވެ. ދާދި ފަހުން ދި އެތުލެޓިކް އަށް ދިން އިންޓަވިއުއެއްގައި ސޯލްޝެއާ ބުނީ، ސައުދީ އަރަބިއްޔާ އާއި ތުރުކީގެ ކްލަބްތަކުން ދާދި ފަހުން، ވެސް ހުށަހެޅުން ލިބުނު ކަމަށެވެ.

އެކަމަކު، މި ވަގުތު ފުޓްބޯޅައިގައި ކުރަމުން އަންނަ މަސައްކަތްތަކަށް ބަލާއިރު، ޔޫރަޕްގެ ފުޓްބޯޅައިގެ މައި އިދާރާގެ ޓެކްނިކަލް އޮބްސާވަރު/ކޮންސަލްޓަންޓެއްގެ ގޮތުގައި ހަރަކާތްތެރިވާއިރު، ކަންތައްތަކެއް ދަސްވަމުން އަންނަ ކަމަށެވެ.

ކުރިން ޕްރިމިއާ ލީގުގައި ކާޑިފް ސިޓީ އަށް ކޯޗުކޮށްދިން ސޯލްޝެއާ ޔުނައިޓެޑްގެ ކޯޗުކަމާ ހަވާލުވީ 2018 ވަނަ އަހަރުގެ ޑިސެމްބަރު މަހު މޮރީނިއޯ ވަކިކޮށް ވަގުތީ އެއްބަސްވުމެއްގެ ދަށުންނެވެ. ވަގުތީ ކޮންޓްރެކްޓެއްގައި ތިން މަސް ދުވަސް ހޭދަކުރިއިރު، ސޯލްޝެއާގެ މަސައްކަތް ޔުނައިޓެޑަށް ރަނގަޅުވުމުން އެ ޓީމުން އޭނާ އަށް ދާއިމީ އެއްބަސްވުމެއް ދިނެވެ. އެ ފަހަރު އޭނާ ސޮއިކުރީ ތިން އަހަރުގެ އެއްބަސްވުމެއްގަ އެވެ. ޔުނައިޓެޑްގައި ސޯލްޝެއާ އަށް ތަށްޓެއް ނުލިބުނަސް ނެރުނު ނަތީޖާތަކާއި ހޯދި ކުރިއެރުން ބަަލައި އޭނާ އަށް 2021/2022 ވަނަ އަހަރުގެ ސީޒަން ފެށުމުގެ ކުރިން އިތުރު ކޮންޓްރެކްޓެއް ދިނެވެ. އެކަމަކު، އެ އެއްބަސްވުމަށް ފަހު، ޓީމުގެ ހާލަތު ދަށްވަމުން ގޮސް، ނަތީޖާ ނުނެރެވި ގޯސް ހާލަތު ދިގުލައި، ސޯލްޝެއާ އަށް ވަޒީފާ ގެއްލުނީ އެވެ.