މާލޭގެ މޭޔަރަކު ހޮވުމަށް މިއަދު ބޭއްވި އިންތިހާބު ބޮޑު ތަފާތަކުން އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓު އާދަމް އާޒިމް ކާމިޔާބު ކުރައްވައިފި އެވެ.
ހަތަރު ކެންޑިޑޭޓުންނާ ވާދަ ކުރައްވައި އާޒިމް އިންތިހާބު އާޒިމް ކާމިޔާބު ކުރެއްވީ 7،621 ވޯޓުންނެވެ.
ސަރުކާރުގެ ހިންގާ ކޯލިޝަން ޕީއެންސީ/ޕީޕީއެމްއިން ނުކުތް ކެންޑިޑޭޓު، ކުރީގެ ބަންޑާރަ ނައިބު އައިޝަތު އާޒިމާ އަށް ލިބިވަޑައިގަތީ 5،035 ވޯޓެވެ.
ދަ ޑިމްރެޓްސްއިން ވާދަ ކުރެއްވި މުހައްމަދު ސައިފް ފާތިހު އަށް 2343 ވޯޓު ލިބިވަޑައިގެންނެވިއިރު، ކުރީގެ ރައީސް ޔާމީންގެ ތާއިދާއެކު އަމިއްލަ ގޮތުން ވާދަ ކުރެއްވި ކުރީގެ ޕޮލިސް ކޮމިޝަނަރު ހުސައިން ވަހީދަށް ލިބިވަޑައިގަތީ 1،888 ވޯޓެވެ. އަމިއްލަ ގޮތުން ވާދަ ކުރެއްވި ޝުވައިބު އަލީ ހޯއްދެވީ 125 ވޯޓެވެ.
މި އިންތިހާބުގައި ވޯޓުލުމުގެ ހައްގު 54،680 މީހުންނަށް ލިބިފައިވާ ވާއިރު، ވޯޓުލާން ނުކުތީ 31.84 ޕަސެންޓު މީހުންނެވެ. އެއީ 17،410 މީހުންނެވެ. އޭގެ ތެރެއިން 402 މީހުންގެ ވޯޓު ވަނީ ބާތިލުވެފަ އެވެ. އެހެންވެ، ސައްހަ ވޯޓުގެ ޖުމުލަ އަދަދަކީ 17،008 އެވެ.
މާލޭގެ މޭޔަރުގެ މަގާމު އެމްޑީޕީގެ ކެންޑިޑޭޓަކަށް މި ލިބުނީ ރިޔާސީ އިންތިހާބުގައި އެ ޕާޓީއަށް މާލެއިން ބޮޑު ނާކާމިޔާބީއެއް ލިބިފައި އޮއްވަ އެވެ. އެހެންވެ، އެމްޑީޕީން ވަނީ ވަރަށް ބޮޑަށް އެކަމުގައި އުފާ ފާޅުކޮށްފަ އެވެ.
ރައީސް އިބްރާހިްމ މުހައްމަދު ސޯލިހުގެ ވެރިކަމުގައި އެންމެ ގިނަ ޕްރޮޖެކްޓްތައް ހިންގި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ މަގާމު އަދާކުރެއްވި އާޒިމް އެމްޑީޕީ އަށް ގުޅިވަޑައިގަތީ ދާދި ފަހުންނެވެ.
ޕާޓީއާ ގުޅިވަޑައި ނުގަތަސް އެމްޑީޕީއާއެކު އާޒިމް މަސައްކަތް ކުރައްވަން ފެއްޓެވީ، ކުރީގެ ރައީސް އަބްދުﷲ ޔާމީންގެ ވެރިކަމުގައި އޭނާގެ ބޭބެ، ކުރީގެ ޑިފެންސް މިނިސްޓަރު މުހައްމަދު ނާޒިމް ބަންދުކޮށް ޖަލަށްލި ހިސާބުންނެވެ.
އާޒިމް ކެރިއަރު ފެށީ ކޫޕާސް އެންޑް ލައިބްރޭންޑުން އިންޓާނަލް އޮޑިޓަރެއްގެ ގޮތުގައެވެ. އަމިއްލަ ވިޔަފާރީގެ އިތުރުން ސަރުކާރުގެ އެކި މަގާމުތަށް އާޒިމް އަދާކުރެއްވި އެވެ. އެގޮތުން މެނޭޖަރ-އެކައުންޓްސް، ޑެޕިއުޓީ ފައިނޭންސް މެނޭޖާ (ހެޑް އޮފް ފައިނޭންސް) އަދި އައިލެންޑް ބެވަރޭޖްސް މޯލްޑިވްސް ޕްރައިވެޓް ލިމިޓެޑްގެ ޑެޕިއުޓީ ސީއީއޯގެ މަގާމު އަދާކުރެއްވި އެވެ.
އެމްޓީސީސީގެ ސީއީއޯގެ މަގާމަށް އައްޔަން ކުރެއްވުމުގެ ކުރިން އާޒިމް ވަނީ ޑިސެމްބަރު، 2018 އިން ޖެނުއަރީ، 2020 އަށް މޯލްޑިވްސް ވޯޓާ އެންޑް ސެވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރުގެ މަގާމާއި، ނޮވެމްބަރު، 2013 އިން ފެބްރުއަރީ، 2015 އަށް ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ގެ މެނޭޖިން ޑިރެކްޓަރުގެ މަގާމު އަދާކުރައްވާފަ އެވެ.
