އަށް ގަޑިއިރަށްވުރެ މަދުން މަސައްކަތް ކުރަން ބޭނުންވާ ސިއްހީ ދާއިރާގެ މުވައްޒަފުންނާއި ރިޓަޔާމަންޓުން އަނބުރާ އަންނަން ބޭނުންވާ މުވައްޒަފުންނަށް އެ ފުރުސަތު ދިނުމަށް ސަރުކާރުން އުސޫލެއް އެކުލަވާލައިފި އެވެ.

ކެބިނެޓު ބައްދަލުވުމުގެ ނިންމުންތައް ހާމަކޮށް ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުالله ނާޒިމް ވިދާޅުވީ ހެލްތު މިނިސްޓްރީ އިން ކެބިނެޓަށް ހުށަހެޅި ކަރުދާހުގައި، ހިދުމަތަށް އަލަށް ނުކުތުމަށް ބޭނުންވާ މީހުންނަށް ދޭނެ ލުއިތަކެއް ހިމަނާފައިވާ ކަމަށެވެ.

މި ލުއިތަކުގެ ތެރޭގައި ހިމެނެނީ:

1. މިހާރުން މިހާރަށް ވަޒީފާއަށް ނުކުތުމަށް ބޭނުންވާ މީހުންނަށް ރެކްރޫޓްމަންޓް ޕްރޮސެސްއެއް ކުރިއަށް ގެންދިޔުން

2. ފްލެކިސަބލް ވޯކިން ގަޑިއިރު ތަކެއް ކަނޑައެޅުން - އަށް ގަޑިއިރަށް ވުރެ މަދުން މަސައްކަތް މަސައްކަތް ކުރަން ބޭނުންވާ މީހުންނަށް މަސައްކަތް ކުރާ ގަޑިއަށް އުޖޫރަ ކަނޑައަޅައި ސިވިލް ސާވިސްގެ ގަވާއިދުގެ ތެރެއިން އެމީހުން ވަޒީފާއަށް ނެރުން

3. 55 އަހަރު ވެފައިވާ ނުވަތަ ރިޓަޔާ ކޮށްފައިވާ މީހުންގެ ތެރެއިން ސިއްހީ ހާލަތާއި ތައުލީމާއި ތަޖުރިބާއަށް އަދި ހުނަރަށް ބަލައި ކޮންޓްރެކްޓް އުސޫލުން މަސައްކަތަށް ނުކުންނަން ބޭނުންވާ ނަމަ އެ ފުރުސަތު ފަހި ކޮށްދިނުން ހިމެނެ އެވެ.

"މިކަންކަން ތަންފީޒުކުރުމަށް ކުރަންޖެހޭ މަސައްކަތް ހެލްތު މިނިސްޓްރީ އިން ދަނީ ކުރަމުން، މި ކަމަށް ކަނޑައެޅިފައި އޮތް ތާވަލު ހެލްތު މިނިސްޓްރީ އިން އާންމު ކުރާނެ،" ނާޒިމް ވިދާޅުވި އެވެ.

މީގެއިތުރުން ސިއްހީ ދާއިރާ ނޫން ދާއިރާތަކުގައި ވެސް މި ފަދަ އުސޫލުތަކެއް ކަނޑައެޅުމުގެ ވިސްނުން ސަރުކާރުގެ ހުރިކަން ނާޒިމް ފާހަގަ ކުރެއްވި އެވެ. އަދި މިސާލެއްގެ ގޮތުގައި ތައުލީމީ ދާއިރާ ފާހަގަކުރެއްވި އެވެ.

ހަފްތާ 14 ނިމުމުގެ ކުރިން ކަމާ ގުޅުން ހުރި ދާއިރާތަކުގެ ވެރިންނާ މަޝްވަރާކޮށް ކެބިނެޓަށް އެ ފަދަ ކަރުދާހެއް ހުށަހެޅުމަށް މަސައްކަތް ކުރާކަން ނާޒިމް ފާހަގަ ކުރެއްވި އެވެ.