މިހާރު ކުރިއަށްދާ ވޮލީބޯލް އެސޯސިއޭޝަން ކަޕުގެ ފިރިހެން ޑިވިޝަނުގެ ތިން ވަނަ ސެމީގައި ކްލަބް އާބަންކޯ ބަލިކޮށް ކުލަބް ވެމްކޯ އިން ފައިނަލުގެ ފަހު ޖާގަ ހޯދައިފި އެވެ.

ވެމްކޯ އިން ތިން ވަނަ ސެމީ އިން ފުރުސަތު ހޯދީ ފުރަތަމަ ސެމީގައި އެންމެ ފަހުގެ ޗެމްޕިއަން، ސްޕޯޓްސް ކުލަބް ސިޓީ ބަލިކޮށެވެ. އާބަންކޯ އަށް ތިން ވަނަ ސެމީ ކުޅެން ޖެހުނީ ފުރަތަމަ ސެމީގައި ސިޓީ ސްޕޯޓްސް ކުލަބް އަތުން ބަލިވުމުންނެވެ.

ރޭ ޒުވާނުންގެ މަރުކަޒު އެތެރޭ ކޯޓުގައި ކުޅުނު ސެމީގެ ފަހު މެޗު ވެމްކޯއިން ކާމިޔާބުކުރީ ވާދަވެރި ކުޅުމަކަށްފަހު 3-2 ސެޓުންނެވެ. ރޭގެ މެޗުގެ ސެޓުތައް ގޮސްފައިވަނީ 25-21, 19-25, 27-25, 21-25 އަދި 15-12 އިންނެވެ.

ވެމްކޯ އާއި އާބަންކޯ، ގްރޫޕް ސްޓޭޖުގައި ކުޅުނު މެޗުން ވެސް ވެމްކޯ މޮޅުވީ ފަސް ސެޓަށް ގޮސްގެންނެވެ.

މި މެޗުގެ ފުރަތަމަ ސެޓުގެ ކުރީކޮޅު އާބަންކޯ އިން ވަނީ ހަތަރު ޕޮއިންޓްގެ ލީޑެއް ނަގައިފަ އެވެ. އެކަމަކު، މަޑުމަޑުން ވެމްކޯ އިން ވަނީ މެޗުގެ ތެރެއަށް ވަދެ ފަރަގު ކުޑަކޮށްފަ އެވެ. މި ސެޓުގެ މެދު ތެރެއިން ވެމްކޯއިން ވަނީ 13-13 އިން ހަމަހަމަކޮށްފަ އެވެ. އެއާ އެކު އާބަންކޯއިން ވަނީ ޓައިމް އައުޓް ނަގައިފަ އެވެ. އެކަމަކު، އެ ޓައިމް އައުޓްގެ ބޭނުން އާބަންކޯ އަށް އެންމެ ރަނގަޅަށް ހިފޭ ގޮތް ނުވެ ވެމްކޯއިން ވަނީ ސެޓުގެ ފަހު ކޮޅު ލީޑުކޮށްފަ އެވެ. މި ސެޓު ވެމްކޯއިން ގެންދިޔައީ 25-20 އިންނެވެ.

ދެ ވަނަ ސެޓު ފަށައިގެން އާބަންކޯ އިން ވަނީ އެ ޓީމުން ފުރަތަމަ ސެޓުގައި ހެދުނު ގޯސްތައް ރަނގަޅުކޮށްފަ އެވެ. އަދި ސެޓުގެ ކުރީކޮޅު އާބަންކޯގެ އިސްމާއިލް ސާޖިދު (ކުޑަކާއްޓޭ) ގެ މޮޅު ސާވިސްތަކުން އާބަންކޯ އަށް ވަނީ ހަ ޕޮއިންޓްގެ ލީޑެއް ލިބިފަ އެވެ. އާބަންކޯ އިިން ވަނީ ސެޓުގެ ކުރީކޮޅު ލިބުނު ލީޑު މުޅި މި ސެޓުގައި ވެސް ހިފަހައްޓައިފަ އެވެ. އެއާ އެކު، މި ސެޓު އާބަންކޯއިން ކާމިޔާބުކުރީ 25-19 އިންނެވެ.

މުޅި މެޗުގައި ވެސް ފެނިގެންދިޔަ އެންމެ ފޯރިގަދަ ސެޓަކީ ތިން ވަނަ ސެޓެވެ. މި ސެޓު ފަށައިގެން އާބަންކޯއިން ވަނީ އެއް ޕޮއިންޓްގެ ލީޑެއް ނަގާގެން ކުޅެފަ އެވެ. އެކަމަކު، ސެޓުގެ ފަހު ކޮޅު ވެމްކޯއިން ކައިރިކައިރީ ދެ ޕޮއިންޓް ސްކޯކޮށް އެ ޓީމު ކޮޅަށް 19-18 އިން ސްކޯ ބަދަލުކޮށްލި އެވެ. އެއާ އެކު އާބަންކޯއިން ވަނީ ޓައިމް އައުޓެއް ނަގައިފަ އެވެ. އަދި މި ސެޓު ނިންމަން އެންމެ ފުރަތަމަ ފުރުސަތު ލިބުނީ އާބަންކޯއަށެވެ. އެކަމަކު، ސެޓު ނުނިންމި ވެމްކޯއިން އޭގެ ފައިދާ ނަގާ 27-25 އިން މި ސެޓު ކާމިޔާބުކުރި އެވެ.

މެޗުގެ ހަތަރު ވަނަ ސެޓުގައި ވެމްކޯގެ ފަރާތުން އާދައިގެ ކުޅުމެއް ފެނިގެންދިޔައިރު، މި ސެޓުގައި އެ ޓީމުގެ ގިނަ ކުޅުންތެރިންގެ ފަރާތުން އާދައިގެ ގޯސްތައް ހެދުނެވެ. އޭގެ ފައިދާ ނަގާ އާބަންކޯއިން މި ސެޓު ކާމިޔާބުކުރީ 25-21 އިންނެވެ. މެޗުގެ ފަހު ސެޓުގެ ފުރަތަމަ އަށް ޕޮއިންޓް ހޯދާ ކޯޓުގެ ފަޅި ބަދަލުވިއިރު، ކުރީގައި އޮތީ އާބަންކޯ އެވެ. އެކަމަކު މި ސެޓުގެ ފަހުކޮޅު އާބަންކޯގެ ކުޅުންތެރިންގެ ފަރާތުން ގިނަ ގޯސްތަކެއް ހެދުނުއިރު، ސެޓުގެ ފަހު ކޮޅު ވެމްކޯގެ އަލީ ހުޒާމް (ހުޒަންޓެ)ގެ މޮޅަށް ކުޅެ ގިނަ ޕޮއިންޓްތަކެއް ސްކޯކުރި އެވެ. މި ސެޓު ވެމްކޯއިން ކާމިޔާބުކުރީ 15-12 އިންނެވެ.

މި މުބާރާތުގެ ފައިނަލުގެ ފުރަތަމަ ޖާގަ ހޯދި ސިޓީއާ ވެމްކޯ ބައްދަލުކުރާ ފައިނަލް މެޗު ކުޅޭނީ މާދަމާ ރެޔެވެ.