21 ޑިސެންބަރު 2023 - 13:56 0
މުހައްމަދު ޝަހްޒާން
ރައީސް ޔާމީންއަށް ކުރީ ސަރުކާރުން ދިން ލުއިގެ ދަށުން ގެއަށް ބަދަލު ކުރެއްވި ދުވަހު މާލެއަށް ފާބައިވަޑައިގަންނަވަނީ -- ފޮޓޯ: އަބްދުﷲ އިޔާން / އަދަދު
21 ޑިސެންބަރު 2023 - 13:56 0
ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުالله ޔާމީން އަބްދުލްގައްޔޫމް ބަންދުގައި ހުންނަވާ މުއްދަތުގައި ކަރެކްޝަންސް އިން ނުދޭން ނިންމީ ޓީވީ ޕްރޮގުރާމުތަކުގައި ބައިވެރިވުމާއި ޕާޓީ އޮފީހަށް ގޮސް މީހުންނާ ބައްދަލު ކުރުމުގެ ހުއްދަ ކަމަށް އެމަނިކުފާނުގެ ލޯޔަރު، އާދަމް ޝަމީމް ވިދާޅުވެއްޖެ އެވެ.
އެކްސްގައި ޝަމީމް ކުރެއްވި ޕޯސްޓެއްގައި މިއަދު ވިދާޅުވީ ރައީސް ޔާމީންގެ ބަންދަށް ކުރިން ދިން ލުއިތެކެކޭ އެއްގޮތަށް ފަހުން އެދުނު ލުއިތައް ދިނުމަށް ވެސް ގާނޫނީ އެއްވެސް ހުރަހެއް ނެތް ކަމަށެވެ.
ރައީސް ޔާމީންގެ ފަރާތުން ހޯދުމަށް އެދި ހުށަހަޅާފައި ވަނީ ދެ ލުޔެކެވެ. އޭގެތެރެއިން ފުރަތަމަ ކަމަށް އެދިފައި ވަނީ ރައީސް ޔާމީނާއެކު ކަރެކްޝަންސްއިން ވެފައިވާ އިގުރާރުގައި ޓީވީ ސްޓޭޝަންތަކަށް ގޮސް ޓީވީ ޕްރޮގުރާމުތަކުގައި ބައިވެރިވުން މަނާކޮށްފައި އޮތް އޮތުމަށް ލުޔެއް ދިނުމަށެވެ. އެގޮތުން ޔާމީންގެ ގެއަށް ނުވަތަ އޮފީހަށް ނޫސްވެރިޔަކު ގޮސް ކުރާ ސުވާލުތަކަކަށް ޖަވާބު ދިނުން ނުވަތަ އިންޓަވިއު ދިނުމުގެ ހުއްދަ ދިނުމަށް އެމަނިކުފާނުގެ ފަރާތުން އެދިފައިވެ އެވެ.
ދެވަނަ ކަމަށް އެދިފައި ވަނީ ރައީސް ޔާމީން ބައްދަލު ކުރަން އެދޭ މީހުންނާ އެމަނިކުފާނު އިސްވެ ހުންނަވައި އުފެއްދުމުގެ މަސައްކަތް ކުރާ ޕާޓީގެ އޮފީހުގައި ބައްދަލު ކުރުމުގެ ހުއްދަ އަށެވެ. ސަބަބެއްގެ ގޮތުގައި ބުނެފައި ވަނީ ޔާމީން ބައްދަލު ކުރަން އެދޭ މީހުންނާ ގެއިން ބައްދަލު ކުރުމަކީ ފަސޭހަ ކަމެއް ނޫން ކަމަށެވެ.
ޔާމީންގެ ފަރާތުން އެދިލެއްވި ލުއިތައް ނުދޭން ކަރެކްޝަންސް އިން ނިންމީ އެކަން ކުރުމަށް ގާނޫނީ ގޮތުން ފުށުއެރުންތަކެއް ހުރި ކަމަށް ބުނެ އެވެ. ނަމަވެސް އެކަމާ ގުޅޭ އިތުރު ތަފުސީލެއް އެ މުއައްސަސާއިން ހާމަކޮށްފައެއް ނުވެ އެވެ.
ރައީސް ޔާމީންއަށް ކޮށްފައިވާ ހުކުމަކީ ސިޔާސީ ހުކުމެއް ކަމަށާއި އެމަނިކުފާނު ބަންދުގައި ހުންނެވީ ކުރީގެ ސަރުކާރުން ޝަރުއީ ނިޒާމުގެ ތެރެއަށް އަތް ބާނައި، ނުފޫޒު ފޯރުވަމުން ގެންދިޔަ ދިޔުމުގެ ސަބަބުން ކަމަށް ރިޔާސީ ކެމްޕޭނު ދުވަސްވަރު ރައީސް ޑރ. މުހައްމަދު މުއިއްޒު ވިދާޅުވެފައިވެ އެވެ. އަދި ވެރިކަން ލިބިވަޑައިގެންފި ނަމަ ޔާމީން މިނިވަން ކުރައްވާނެ ކަމަށް ވެސް ރައީސް މުއިއްޒު އޭރު ވައުދުވެވަޑައިގެންނެވި އެވެ.
ނަމަވެސް ވެރިކަމުގެ ހުވާ ކުރެއްވުމަށްފަހު މިއަދާ ހަމައަށް ވެސް ޔާމީންއަށް ކުރީގެ ސަރުކާރުން ދިން ލުއި ފިޔަވައި އިތުރު އެއްވެސް ލުޔެއް މިސަރުކާރުން ދީފައެއް ނުވެ އެވެ. ރައީސް ޔާމީން މިނިވަން ކުރުމަށް މި ސަރުކާރުން އެއްވެސް މަސައްކަތެއް ވެސް ކޮށްފައި ނުވާ ކަމަށް ޔާމީންގެ އަރިސް ބޭފުޅުން ތުހުމަތު ކުރައްވާފައިވެ އެވެ.
މި ވެރިކަމަށް ހަތަރު ވަނައަށްވީ ދުވަހު ރައީސް ޔާމީންއާއި ޕީއެންސީ/ޕީޕީއެމްގެ އިސްބޭފުޅުންނާ އުފެދުނު ހިޔާލުތަފާތުވުންތަކުގައި ރައީސް ޔާމީން ވަނީ ޕީޕީއެމުން ވަކިވެވަޑައިގެން އައު ޕާޓީއެއް އުފެއްދުމުގެ މަސައްކަަތް ފަށްޓަވައިފަ އެވެ.
Comment