ލަންޑަން (ޑިސެމްބަރު 15) - ވީޑިއޯ އެސިސްޓަންޓް ރެފްރީ (ވީއޭއާރު)ގެ ސަބަބުން ކުޅުންތެރިން ރެފްރީންނަށް ކުރާ އިތުބާރު ގެއްލި، ގިނަ ރެފްރީންތަކެއް ފުޓްބޯޅައާ ދުރަށް ޖެހުން ގާތްކަމަށް އިނގިރޭސި ކުރީގެ ރެފްރީ މާކް ކްލެޓެންބާގް ބުނެފި އެވެ.

އިނގިރޭސި ޕްރިމިއާ ލީގަށް 2019 ވަނަ އަހަރު ޖޫން މަހު، ވީއޭއާރް ތައާރަފްކުރި ފަހުން، މި ޓެކްނޮލޮޖީ އަށް އެންމެ ބޮޑު ފާޑުކިޔުމެއް އަމާޒުވާ ފަހަރަކަށް މި ސީޒަން ވާނެ އެވެ. ވީއޭއާރުން ނިންމާ ނިންމުންތަކުގެ ސަބަބުން ގިނަ ބަޔެއްގެ ފާޑުކިޔުންތައް ރެފްރީންނަށް އަމާޒުވަމުން އަންނައިރު، ޓީމްތަކުގެ މެނޭޖްމަންޓުން ވެސް އަންނަނީ އެކަން ފާހަގަ ކުރަމުންނެވެ.

އިނގިރޭސި ފުޓްބޯޅައިގެ ކުރީގެ މަޝްހޫރު ރެފްރީ ކްލެޓެންބާގް ބުނީ ރެފްރީންގެ ނިންމުންތައް ގޯސްވެގެން އަބަދުވެސް އެ ވާހަކަ މީހުން ދައްކާ ކަމަށާއި، ނަމަވެސް މި ސީޒަނަކީ އާދަޔާ ހިލާފަށް އެކަން ފާހަގަވާ ސީޒަނެއް ކަމަށެވެ.

އޭނާ ބުނީ މި ސީޒަންގައި އެންމެ ބޮޑަށް ފާހަގަވަނީ ވީއޭއާރުން އެކި މެޗުތަކުގައި އެކި ގޮތަށް ނިންމުންތައް ނިންމުން ކަމަށާއި، މިކަމުގެ ސަބަބުން ކުޅުންތެރިންގެ އިތުބާރު ވެސް ގެއްލެމުން އަންނަ ކަމަށެވެ. އަދި މިއީ ފުޓްބޯޅަ އަށް ހުރި ގެއްލުމެއްގެ ގޮތުގައި އޭނާ ސިފަކުރި އެވެ.

އެ ގޮތުން، 2004 އިން ފެށިގެން 2017 ވަނަ އަހަރާ ހަމައަށް އިނގިރޭސި ޕްރިމިއާ ލީގުގައި ރެފްރީކަންކުރި ކްލެޓެންބާގް ބުނީ ރެފްރީންނަށް އަމާޒުވަމުން އަންނަ ފުރައްސާރައިގެ ސަބަބުން ގިނަ ރެފްރީންތަކެއް ރެފްރީކަން ކުރުމުން ދުރަށްދިޔުމަކީ ވެސް ގާތްކަމެއް ކަމަށެވެ. އެކަން ހުއްޓުވޭނީ ރެފްރީންނަށް ރައްކާތެރި މާހައުލެއް ގާއިމުކުރެވިގެން ކަމަށް ވެސް އޭނާ ބުނެފައިވެ އެވެ.

ކްލެޓެންބާގް ވަނީ ބައެއް ރެފްރީން ވީއޭއާރަށް މާބޮޑަށް ބަރޯސާވާތީ އެކަން ވެސް ފާހަގަކޮށްފަ އެވެ. މި ގޮތުން މެޗު ކުރިއަށްދާއިރު ބައެއް ރެފްރީން ގަސްތުގައި ފައުލް ނުދައްކައި ވީއޭއާރުން އެންގުމެއް އަންގަންދެން މަޑުކުރާކަން ފާހަގަކުރެވޭކަމަށް އޭނާ ބުންޏެވެ.