މެންޗެސްޓާ (މެއި 21) - އޭނާ އެދެނީ އިނގިރޭސި ޕްރިމިއާ ލީގުގައި އޮފްސައިޑް ބަލަން އެކަނި ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރަން ކަމަށް މެންޗެސްޓާ ޔުނައިޓެޑްގެ ޑިފެންޑަރު ހެރީ މެގުއާ ބުނެފި އެވެ.

ޕްރިމިއާ ލީގުގައި ވީއޭއާރް ބޭނުންކުރަން ފެށީ، 2019/2020 ސީޒަނުން ފެށިގެންނެވެ. ވީއޭއާރް، އިނގިރޭސި ޕްރިމިއާ ލީގުގައި ބޭނުންކުރުން ހުއްޓާލުމަށް، އެ ލީގުގެ ކްލަބްތަކުން އަންނަ މަހު ވޯޓެއް ނަގަން ވަނީ ތާވަލުކޮށްފަ އެވެ.

ވުލްވްސް އިން އިސްނަގައި، ހުށަހެޅި މި ޕްރޮޕޯސަލްގެ ވޯޓަށް އަހާނީ އަންނަ މަހުގެ ހަ ވަނަ ދުވަހު އޮތް ބައްދަލުވުމުގަ އެވެ. އެ ގޮތުން، އެ ވޯޓުގައި، 20 ކްލަބްގެ ތެރެއިން 14 ޓީމުގެ ތާއީދު ލިބިއްޖެނަމަ، އަންނަ ސީޒަނުން ފެށިގެން ޕްރިމިއާ ލީގުގައި ވީއޭއާރް ބޭނުމެއް ނުކުރާނެ އެވެ.

ޕްރިމިއާ ލީގުން ވުލްވްސްގެ މި ހުށަހެޅުމާ ދެކޮޅަށް ވާހަކަ ދައްކާފައިވާއިރު، ބައެއް ކުޅުންތެރިން ވެސް އަންނަނީ މި ކަމާ މެދު ޝުއޫރުފާުޅުކުރަމުންނެވެ.

ޔުނައިޓެޑްގެ ޑިފެންޑަރު، މެގުއާ ބުނީ، އޭނާގެ އަމިއްލަ ވިސްނުމުގައި ދެކޭގޮތް ހިއްސާކުރާނަމަ އެދެނީ ވީއޭއާރް އޮތުމަށް ކަމަށެވެ.

"އަހަރެން އެދެން ވީއޭއާރް އޮންނަން، އެކަމަކު، އެއީ، ހަމައެކަނި އޮފްސައިޑް ބެލުމަށް. އެހެން ހުރިހާ ކަމަކަށް އަހަންނެއް ވީއޭއާރް ބޭނުންކުރަން ބޭނުމެއް ނޫން، މި ވަގުތު ލީގުގައި އެ ކުރާ ގޮތަށް. އެއީ، އެއްގޮތަކަށް ނޫން ނިންމުންތައް މި ހުންނަނީ، ކޮންމެ މީހެއްގެ އަމިއްލަ ވިސްނުމެއްގައި ހުންނަ ގޮތަަކަށް،" މެގުއާ ބުންޏެވެ.

ވީއޭއާރްގެ ކަންކަން ރަނގަޅުކުރަން ކޮންމެ ސީޒަނަކަށް ފަހު ވެސް ކްލަބްތަކާއި ޕްރިމިއާ ލީގުން މަޝްވަރާތަކެއް ކުރެ އެވެ. އެކަމަކު، ގިނަ ކޯޗުން ދެކޭ ގޮތުގައި، މި މަޝްވަރާތަކުގެ ބޭނުމެއް ނުހިފެ އެވެ.