ބޯހިޔާވަހިކަމުގެ ބޮޑު މަޝްރޫއެއް ހިންގުމަށްޓަކައި ހިއްކަން ނިންމާފައިވާ ފުށިިދިއްގަރުފަަޅު ކ. ގުޅީގެ އިހުތިސާސުން ވަކިކޮށްފި އެވެ.

ފުށިދިއްގަރުފަޅު ގުޅީގެ އިހުތިސާސުން ވަކިކުރީ ލާމަރުކަޒީ ގާނޫނުގެ ދަށުން ރައީސަށް ދީފައި އޮންނަ އިހުތިޔާރުގެ ދަށުން، ރައީސް ޑރ. މުހައްމަދު މުއިއްޒު ނެރުއްވި ގަރާރަކުންނެވެ.

އެ ގަރާރުގައި ރައީސް ވިދާޅުވެފައިވާ ގޮތުން ގުޅީގެ އިހުތިސާސަށް ބަދަލު ގެންނެވީ 2020 ވަނަ އަހަރު (އޭރުގެ ރައީސް އިބްރާހީމް މުހައްމަދު ސޯލިހު) ނެރުއްވި ގަރާރުން ކައުންސިލްތަކުގެ އިހުތިސާސް ކަނޑައަޅުއްވާފައި އޮތް ގޮތަށް ބަދަލު ގެންނަން ޖެހޭ ކަމަށް ފެނިވަޑައިގަންނަވާތީ އެވެ.

މިފަހަރުގެ ގަރާރުން ކަނޑައަޅުއްވާފައިވާ ގުޅީގެ އިހުތިސާސްގައި ހިމެނެނީ އެރަށުގެ ފަޅާއި ކައިރީގައި އޮތް ދެ ފަޅެއްގެ ބައެކެވެ. ކުރިން އޮތް ގޮތުން ފުށިިދިއްގަރު ފަޅުގެ ބައެއް ގުޅީގެ އިހުތިސާސްގެ ތެރޭގައި ހިމެނެ އެވެ.

ލާމަރުކަޒީ ގާނޫނު ބުނާ ގޮތުން ރަށެއްގެ އިހުތިސާސަކީ ރަށެއްގެ ރާޅުފެންފަށުން ފެށިގެން 700، މީޓަރާ ހަމައަށް އޮންނަ ސަރަހައްދުގެ ތެރެެއިން މީހުން އުޅޭ އެހެން ރަށެއްގެ ބަޔަކަށް ނުވާ އަދި ސިނާއީ މަސައްކަތެއް ކުރާ ރަށެއްގެ ބަޔަކަށް ނުވާ ސަރަހައްދެވެ. ފުށިދިއްގަރުފަޅުގެ ބައެއް ގުޅީގެ އިހުތިސާސްގެ ތެރޭގައި ހިމެނުނީ އެގޮތުންނެެވެ.

ފުށިދިއްގަރުފަޅުން ބިން ހިއްކައި އެތަނުގައި ބޮޑު އާބާދީއެއް ވަޒަންވެރި ކުރުމަކީ ރައީސް މުއިއްޒުގެ ރިޔާސީ ވައުދެކެވެ.