ރާއްޖޭގެ ފުޓްބޯޅައިގެ ހާލަތު ދަށްވެ، ގޯސް ހާލަތަކަށް ވެއްޓެމުން އަންނަތާ އަހަރުތަކެއް ވެފައިވާ ކަމަށާއި އެކަން އެ ގޮތަށް ހިނގަމުން އައިއިރު، ފުރަތަމަ ޑިވިޝަންގެ ކްލަބްތަކުން ތިބީ އެފްއޭއެމްގެ ރައީސް ބައްސާމް އަދީލް ޖަލީލް އަށް ސަނާ ކިޔަން ކަމަށް ކޯޗު ސޮބާހު މުހައްމަދު (ސޮބާ) ބުނެފި އެވެ.

އޭއެފްސީ ކަޕްގައި ރާއްޖޭގެ ކްލަބްތަކަށް ކުރިއެރުމެއް ލިބެން އޮތީ ލީގު ވަރުގަދަވެގެން ކަމަށް ބުނެ، ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު ބޮސްނިއާގެ މިލޮމީރް ސެސްލިޖާ (މިލޯ) ވަނީ ބުނެފަ އެވެ.

މިލޯގެ އެ އެ ވާހަކަތަކާ މެދު ސޮބާ ވަނީ އޭނާގެ ޝުއޫރުފާޅުކޮށްފަ އެވެ.

ސޮބާ ބުނީ ރާއްޖޭގެ ފުޓްބޯޅަ މިހާރު ވެއްޓިފައި މި އޮތް ހާލަތުގެ ޒިންމާ ނަގާނެ އެއްވެސް މީހެއް އަދި ކްލަބެއް ވެސް ނެތް ކަމަށާއި ސަރުކާރު ވެސް އޮތީ "ނުކުޅެދިފައި" ހައްޕު ކިޔައިގެން ބަލަހައްޓައިގެން ކަމަށެެވެ.

"ދުވަހަކު ވެސް ރާއްޖޭގައި މި ލެވަލް އަށް މިކަން ނުދޭ.. މިކަން ހިނގާތާ ކިތަންމެ އަހަރެއް. އަދި ކިރިޔާ ބައެއް ކްލަބްތަކަށް މިކަން ރެޔަކާ ލީ. އަދިވެސް މި ވާހަކަ ދައްކަދައްކާ ތިބެންވީތޯ. މިކަން ދެން ވެސް ހައްލުކޮށް ދެވޭނީ ހަމަ ރާއްޖޭގެ ފަސްޓް (ފުރަތަަމަ) ޑިވިޝަން ކްލަބްތަކަށް ގަވާއިދު ބުނާގޮތުން. ވަރަށް ދެރަކަމެއް މިއީ އެއްވެސް ހައްލެއް ލިބިފައި ނެތް،" ގައުމީ ޓީމަށް ގިނަ އަހަރުތަކެއް ކުޅެ، ފުރަތަމަ ޑިވިޝަނުގައި ނިއު ރޭޑިއަންޓް ސްޕޯޓްސް ކްލަބް، ކްލަބް ގްރީން ސްޓްރީޓްސް އަދި ކްލަބް ވެލެންސިއާ އަށް ކޯޗުކޮށްދިން ސޮބާ ބުންޏެވެ.

"ރާއްޖޭގެ ފަސްޓް (ފުރަތަމަ) ޑިވިޝަން ކްލަބްތަކުން އެންމެ ފުރިހަމަ ޒިންމާ ނެގިނަމަ މި ދުވަސް ނުފެނުނީސް ފުނޑާލިއިރު ވެސް ތިބީ ސަނާ ކިޔަން،"

އެފްއޭއެމްގެ ރައީސް ބައްސާމް އަދީލް ޖަލީލް އާއި އޭނާގެ ލީޑަޝިޕާ ގުޅޭ ޖިނާއީ ތަހުގީގެއް ހިނގަމުން އަންނައިރު، ފުލުހުން އެދިގެން ބައްސާމްގެ ޕާސްޕޯޓް ވަނީ ހިފަހަައްޓައިފަ އެެވެ. އެފްއޭއެމްގެ ރައީސް ބައްސާމް އާއި އޭނާގެ ލީޑަޝިޕުން އެފްއޭއެމަށް ލިބޭ ފައިސާ ނަހަމަ ގޮތުގައި އަމިއްލަ މަންފާ އަށް ބޭނުންކުރާ މައްސަލައިގެ ތަހުގީގު ކުރިއަށްދާއިރު، ވަރަށް އަަަވަހަށް ދައުވާ ކުރަން ފޮނުވޭނެ ކަމަށް ޕްރޮސެކިއުޓާ ޖެނެރަލް އޮފީހުން ވަނީ ބުނެފަ އެވެ.

އަމިއްލަ ކުންފުނިތަކާ އެކު އެފްއޭއެމުން ހިންގާފައިވާ މާލީ މުއާމަލާތްތަކުގައި ކޮންޓްރެކްޓާ ހިލާފުވެފައިވާތީ، އެފްއޭއެމާ ދެކޮޅަށް ސިވިލް ކޯޓުގައި ވަނީ ގިނަ މައްސަލަތަކެއް ރަޖިސްޓްރީ ކޮށްފަ އެވެ. މީގެ ތެރެއިން ބައެއް މައްސަލަތަކުގައި އެފްއޭއެމާ ދެކޮޅަށް ވަނީ ދައުވާކޮށްފަ އެވެ. އެކަމަކު، ކޯޓުގެ ހުކުމާ އެއްގޮތަށް ފައިސާ ދެވޭނެ މަގެއް ނެތުމުން، އެފްއޭއެމް އޮތީ ކޯޓުގެ އެންގުމާ ވެސް ހިލާފުވެފަ އެވެ.

ގައުމީ ޓީމުތަކަށް އިރުޝާދުދިން ބިދޭސީ ކޯޗުންނަށް މުސާރަ ނުދޭ މައްސަލައިގައި އެފްއޭއެމާ ދެކޮޅަށް ފީފާ އިން ވަނީ ނިންމުންތަކެއް ނިންމައިފަ އެވެ. އޭގެ އިތުރުން، އެފްއޭއެމުން އެ އިދާރާގެ މުވައްޒަފުންނަށް މުސާރަ ނުދޭތާ ހަތް މަހެއްހާ ދުވަސްވެފައިވާ މައްސަލައިގައި، ގިނަ މުވައްޒަފުންތަކެއް ތިބީ، "ހަޅުތާލެއް"ގަ އެވެ. އެހެންވެ، ފުޓްބޯޅަ ސީޒަނުގެ މެޗުތައް ވެސް ކުރިއަށްދަނީ، ކިރިޔަކިރިޔާ އެެވެ.

ދެ ވަނަ ޑިވިޝަން ފުޓްބޯޅަ މުބާރާތަށް 15 ކްލަބަކުން ބޮޑު ހޭދައެއް ކޮށްގެން ތައްޔާރުވެފައިވާއިރު، އަދިވެސް އެ މުބާރާތް ފެށޭނެ ތާރީހެއް އެފްއޭއެމަށް ސީދާ ބުނެއެއް ނުދެވެ އެވެ.