މެޑިކަލް ޗެކަޕް ހެދުމާއި އައިވީއެފް ހިމެނޭހެން ދަރިމައިވުމުގެ ފަރުވާ އަދި ބޯންމެރޯ ޓްރާންސްޕްލާންޓް ހެދުމުގެ ހިދުމަތް އާސަންދައިގެ ދަށުން ދިނުމަށް ވެވަޑައިގެންނެވި ވައުދުތައް ތަންފީޒުކުރައްވަން އާސަންދައިގެ ގަވާއިދު އިސްލާހުކޮށް, އުސޫލު އެކުލަވާލައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު ވިދާޅުވީ އެމަނިކުފާނުގެ ކެމްޕޭން ތެރޭގައި ވައުދުވެވަޑައިގެންނެވި ފަދައިން އައިވީއެފް ޓްރީޓްމަންޓް ހިމެނޭހެން ދަރިމައިވުމާ ގުޅޭ ފަރުވާގެ ހިދުމަތްތައް އާސަންދަ މެދުވެރިކޮށް ލިބޭނެ އިންތިޒާމު ހަމަޖައްސަން މިއަދު ބޭއްވި ވަޒީރުންގެ މަޖިލީހުގެ ބައްދަލުވުމުގައި ދިރާސާކޮށް ނިންމާފައިވާ ކަމަށެވެ.

"އެކަން [އައިވީއެފް ޓްރީޓްމަންޓް ހިމެނޭހެން ދަރިމައިވުމާ ގުޅޭ ފަރުވާގެ ހިދުމަތްތައް] ހިމެނޭހެން އާސަންދަ ސްކީމުގެ ގަވައިދު އިސްލާހުކޮށް ގެޒެޓު ކުރާނަން. އަދި އައިވީއެފް, އައިޔޫއައި ދެވޭގޮތުގެ އުސޫލެއް އެކުލަވާ އިއުލާނު ކުރާނަން،" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި މި ފަރުވާތައް އަމިއްލަ ހޮސްޕިޓަލްތަކުން ވެސް ހިދުމަތް ދެވޭ ގޮތް ހަމަޖައްސަވައި އަދި އެ މަސައްކަތް ނިމޭއިރު އާސަންދަ ކަވާ ކުރާ ހޮސްޕިޓަލްތައް ކަނޑައަޅާނެ ކަމަށެވެ.

ވަޒީރުންގެ މަޖިލީހުގެ ބައްދަލުވުމަށްފަހު ނޫސްވެރިންނާ ބައްދަލުކުރައްވާ ރައީސް ވިދާޅުވީ ދަރިމައިވުމުގެ ފަރުވާގެ އިތުރުން ރާއްޖޭގައި ފާޓިލިޓީ ކެއާއަށް ހާއްސަ ސެންޓަރެއް އެކުލަވާލާ, އެކަމަށް ހާއްސަ ފަންޑެއް ވެސް އެކުލަވާލައްވާނެ ކަމަށެވެ.

"ފާޓިލިޓީ ކެއާއަށް ހާއްސަ ސެންޓަރެއް ގާއިމްކުރެވިގެންދާނެ. އަދި އެކަމަށް ހާއްސަ ފަންޑެއް, 30 މިލިއަން ރުފިޔާގެ ފަންޑެއް ދައުލަތުގެ ބަޖެޓުން ގާއިމްކުރެވޭނެ،" ރައީސް ވިދާޅުވި އެވެ.

މެޑިކަލް ޗެކަޕް ވެސް އާސަންދައިގެ ދަށުން

ރައީސް ވިދާޅުވީ, މެޑިކަލް ޗެކަޕް ހިދުމަތެއްގެ ގޮތުގައި ހިމަނައިގެން އާސަންދައިގެ ދަށުން ހެދޭނެ އިންތިޒާމު ހަމަޖައްސަން ނިންމާފައިވާ ކަމަށެވެ. އަދި އެކަން ކުރާނީ އެކި އުމުރުފުރާތަކަށް ބަހާލައިގެން އެކި ކަހަލަ ޕެކޭޖުތައް ތައާރަފުކޮށްގެން ކަމަށް އެމަނިކުފާނު ވިދާޅުވި އެވެ.

"ޑޮކްޓަރުން ލަފާ ދީފި ނަމަ, އެ ލަފާގެ މައްޗަށް އަހަރަކު ދެފަހަރު އާސަންދައިގެ ތެރެއިން އެކި ކަހަލަ ޕްރޮފައިލްތައް ހަދާދޭނެ،" ރައީސް ވިދާޅުވި އެވެ.

އެމަނިކުފާނު ވިދާޅުވީ ސަރުކަރުގެ ހޮސްޕިޓަލްތަކާއި ސިއްހީ މަރުކަޒުތަކުގެ އިތުރުން, ހިދުމަތް ލިބެންހުރި އަދި އާސަންދަ ސްކީމުގައި ރަޖިސްޓްރީ ކޮށްފައި ހުންނަ އަމިއްލަ ހޮސްޕިޓަލުތަކާއި މަރުކަޒުތަކުން ވެސް ހިދުމަތް ލިބޭނެ ގޮތް ހަމަޖައްސަން ނިންމާފައިވާ ކަމަށެވެ.

"އަޅުގަނޑުމެންގެ އެއް ސިޔާސަތު، ބަލި ޖެހުމުގެ ކުރިން ބަލިން ރަނގަޅު ކުރާނަމޭ. އެއަށް ވަރަށް ބޮޑު އިސްކަމެއް ދޭނެ،" އެމަނިކުފާނު ވިދާޅުވި އެވެ.

ރިޔާސީ އިންތިހާބުގެ ކެމްޕޭނުގައި ރައީސް ވައުދުވެވަޑައިގެންނެވި އަނެއް ކަމަކީ ބޯންމެރޯ ހަދާ ކުދިން, ފެންވަރު ރަނގަޅު ހޮސްޕިޓަލްތަކަށް ބަދަލުވެއްޖެ ނަމަ ދައްކަންޖެހޭ ފައިސާ އާސަންދަ ސްކީމުގެ ދަށުން ދެއްކޭނެ އިންތިޒާމު ހަމަޖެއްސުމަށެވެ.

ރައީސް ވިދާޅުވީ އެކަމަށް ދިރާސާ ކުރުމަށްފަހު މިއަދު ނިންމީ, އާސަންދަ ސްކީމުގައި އެންރޯލް ކޮށްފައިވާ ބޭރުގެ ހޮސްޕިޓަލްތައް ގްރޭޑްކުރުމަށް ކަމަށެވެ. އަދި ބަލިމީހާ ބޭނުންވާ ހާލަތުގައި ހޮސްޕިޓަލް ބަދަލުވާއިރު, ގްރޭޑިންއަށް އަންނަ ތަފާތުގެ ސަބަބުން އިތުރަށް ދައްކަން ޖެހޭ ފައިސާ އާސަންދައިގެ ސްކީމުގެ ތެރެއިން ހަރަދު ހަމަޖައްސާ ގޮތަށް ނިންމާފައިވާ ކަމަށް ވިދާޅުވި އެވެ.

އާސަންދައާ ބެހޭ މި ނިންމުންތަކާއެކު ނޫސްވެރިޔަކު ސުވާލުކުރީ އާސަންދަ ސްކީމުގެ ދަށުން ސިޔާސީ ބޭނުންތަކަށް ކުރާ ހަރަދުތަކަށް ހޯއްދަވައިދެއްވާނެ ހައްލަކާ ބެހޭގޮތުންނެވެ. ޖަވާބުގައި ރައީސް ވިދާޅުވީ އެކަމުގެ މައުލޫމާތު ކެމްޕޭން ތެރޭގައި ލިބިވަޑައިގެންނި ކަމަށާއި, ޗެކް އެންޑް ބެލެންސް ނިޒާމެއްގެ ތެރެއިން އާސަންދަ ބޭނުން ކުރެވޭގޮތް ހައްދަވައިދެއްވާނެ ކަމަށެވެ.

"ސީދާ ޗެކް އެންޑް ބެލެންސް ނިޒާމެއްގެ ތެރެއިން އާސަންދަ ބޭނުންކުރެވޭގޮތް ހަދާނަން،" އެމަނިކުފާނު ވިދާޅުވި އެވެ.