ވެލާނާ އިންޓާނޭޝަނަލް އެއާޕޯޓުގައި އަލުން އީ-ގޭޓް ގެ ހިދުމަތް ބޭނުންކުރަން ފަށައިފި އެވެ.

އިމިގްރޭޝަނުން މިއަދު ކުރި ޓްވީޓެއްގައި ބުނެފައިވަނީ ބައިނައްލަގުވާމީ ދަތުރުފަތުރު ކުރާ ދިވެހިންނަށް "އިމުގާ" ޓްރެވެލާ ޑިކްލެރޭޝަން ފޯމު ފުރިހަމަ ކުރަން ނުޖެހޭ ގޮތަށް ހަމަޖެހުމާއި ގުޅިގެން އީ-ގޭޓްގެ ހިދުމަތް ވެސް ފަސޭހަކަމާއެކު މިހާރު ލިބޭނެ ކަމަށެވެ.

މި ހިދުމަތާއެކު ޕާސްޕޯޓްގައި އިމިގްރޭޝަން ތައްގަނޑު ޖަހަން މަޑުކުރާކަށް ނުޖެހޭނެ އެވެ.

އީ-ގޭޓް ބޭނުންކުރާނީ ކިހިނެއް؟

• ބޯޑިން ޕާހުގެ ބާކޯޑު އިންނަ ފަރާތް ސްކޭނަރުގައި ޖައްސާލުމަށްފަހު، ޕާސް ރީޑް ކުރިކަމުގެ ހެޔޮ ފާހަގަ ސްކްރީނަށް އެރުމުން ޕާސް ނަންގަވާ,
• ޕާސްޕޯޓުގެ ބަޔޯ ޑާޓާ ސަފުހާ ސްކޭނަރުގައި ޖައްސާލުމަށްފަހު، ރީޑް ކުރިކަމުގެ ހެޔޮ ފާހަގަ ސްކްރީނަށް އެރުމުން ޕާސްޕޯޓު ނަންގަވާ,
• ޝަހާދަތް އިނގިލި ނުވަތަ ޕާސްޕޯޓާއި ހަވާލުވި ވަގުތު ވެރިފިކޭޝަނަށް ނަގާފައިވާ އިނގިލި ފިންގާ ޕްރިންޓް ރީޑަރުގައި ޖައްސާލުމަށްފަހު، ގޭޓް ހުޅުވުމުން ގޭޓް ހުރަސްކޮށް ވަޑައިގަންނަވާށެވެ.