ވެލާނާ އިންޓަނޭޝަނަލް އެއާޕޯޓުގައި ލަގެޖު އުފުލާ ވެހިކަލެއް ދުއްވަން އިން މީހަކު މަރުވެއްޖެ އެވެ.

ފުލުހުން ބުނީ އެ މީހާ ދުއްވަން އިން ވެހިކަލް ވަނީ މިއަދު ހެދުނު އެއާޕޯޓުގެ ލައިޓާއި ކެމެރާ ހަރުކޮށްފައި ހުރި ސްޓްރަކްޗާއެއްގައި ޖެހިފައި ކަމަށެވެ. އެ މީހާ ކްލިނިކަށް ގެންގޮސް އައިޖީއެމްއެޗް އަށް ގެންދިޔައީ އެ ހާދިސާ ހިނގުމުން ހެދުނު 9:30 ހާއިރު ކަމަށެވެ.

އަދި، އެއާޕޯޓުގައި ހުންނަ ކްލިނިކަށް އޭނާ ގެންދިޔައިރުވެސް މަރުވެފައިވާ ކަމަށާއި އިތުރަށް ބެލުމަށް އައިޖީއެމްއެޗް އަށް ގެންދިއުމުން ބޭރުފުށުން އެއްވެސް އަނިޔާއެއް ފެންނަން ނެތް ކަމަށެވެ. ބެލެވޭ ގޮތުގައި އޭނާ ދުއްވި ވެހިކަލް ކޮންޓްރޯލުން ނެއްޓުނީ ވެސް ސިއްހީ ކުއްލި ހާލަތެއް ދިމާވެގެންނެވެ.

މި ހާދިސާގައި މަރުވީ 45 އަހަރުގެ ދިވެހި ފިރިހެނެއް ކަމަށްވެ އެވެ. ނަމަވެސް އިތުރު ތަފުސީލެއް މިހާތަނަށް ލިބިފައި ނުވެ އެވެ.

ފުލުހުން ބުނީ މި ހާދިސާއާ ގުޅިގެން އިތުރަށް ބަލަން ޖެހޭ ކަންކަން ބަލަމުންދާ ކަމަށެވެ.