މަންޓާ އެއާލައިންގެ ފްލައިޓެއްގައި މިދިޔަ ހޯމަ ދުވަހު މާކަނައެއް ޖެހި، ލިބުނު ގެއްލުންތަކަށް ފަހު މަރާމާތުކޮށްގެން އަލުން އޮޕަރޭޝަނަށް ނެރެފި އެވެ.

މަންޓާ އެއާގެ ސީއީއޯ މުހައްމަދު ހަލީލް "އަދަދު" އަށް މިއަދު ވިދާޅުވީ، ގެއްލުން ލިބުނު ފްލައިޓް މިހާރު އޮޕަރޭޓްކުރަމުން އަންނަ ކަމަށެވެ.

"އެ ފްލައިޓް މިހާރު އެބަ އުދުހޭ އިނގޭތޯ،" ހަލީލް ވިދާޅުވި އެވެ.

މި ހާދިސާގައި މާކަނާ މުޑިއެރުމުގެ ސަބަބުން މަންޓާގެ އޭޓީއާރް 72-600 އަށް ވަނީ ގެއްލުންތަކެއް ލިބިފަ އެވެ. ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަ ގޮތުގައި މާކަނާ ޖެހުމުގެ ސަބަބުން އެ ބޯޓުން ބައެއް ކަފައިގެން ދިޔަ އެވެ.

ހާދިސާއަށް ފަހު ފްލައިޓް ޖެއްސީ ދަރަވަންދޫ އެއާޕޯޓަށެވެ.