އުތުރާއި ދެކުނުގައި އިންޓަގްރޭޓަޑް ޑިވެލޮޕްމަންޓް ޒޯނަކާއި ހަތް ސަރަހައްދެއްގައި އުމްރާނީ ބިނާވެށީގެ ހަތް ބިނާވެށި (އާބަން ސެންޓަރު) ތަރައްގީކުރަން ރާވާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހާމަކުރައްވައިފި އެވެ.
ރައީސް ކަމުގެ ހުވާކުރެއްވުމަށް ފަހު ދެއްވި ތަގުރީގައި، ރާއްޖޭގެ ތަރައްގީއަށް އެމަނިކުފާނު ގެންގުޅުއްވާ ޕްލޭން ހިއްސާކުރައްވަމުން، ރައީސް މުއިއްޒު ވިދާޅުވީ ދެމެހެއްޓެނިވި އަދުލުވެރި ތަރައްގީގެ ނިޒާމެއް ބޭނުންވާ ކަމަށާއި ތަރައްގީގެ މަސައްކަތް ކުރިއަށް ދާނީ އެ ވިސްނުމުގެ ތެރެއިން ކަމަށެވެ.
"އެއީ ސަރަހައްދީ ތަރައްގީ ނުވަތަ ރާއްޖޭގެ އެކި ސަރަހައްދުތަކަށް ތަރައްގީ އާއި ރަށްވެހިކަމުގެ މަންފާ ބެހެވިގެންދާ ގޮތަށް އެކަށައެޅޭ ޒަމާނީ މަފްހޫމެއް. އެކަމަށްޓަކައި މެދު ރާސްތާގެ އަމާޒުތަކަކާއި ދުރު ރާސްތާގެ އަމާޒުތަކެއް ކަނޑައަޅާލެވޭނެ" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ތަރައްގީގެ ޕްލޭން އެކުލަވާލާނީ ރައްޔިތުންގެ ފުރިހަމަ ބައިވެރިވުމާ އެކީ އެވެ. މިކަމުގައި އިލްމީ އަދި ފަންނީ އެކި ދާއިރާތަކުގެ ބޭފުޅުންގެ ދިރާސާތަކާއި ތަޖުރިބާއިން ސަރުކާރަށް އެހީތެރިވެދިނުމަށް ވެސް އެމަނިކުފާނު އެދިވަޑައިގަތެވެ.
"ބޭނުމަކީ ދިވެހި ރައްޔިތުންގެ ހުވަފެންތަކާއި ތަސައްވުރުތަކުގެ އެހީގައި ރައްޔިތުންގެ އެދޭ ގޮތަށް ދިވެހިރާއްޖޭގެ މުސްތަގުބަލު ކުރަހާ ބައްޓަންކުރުން" އެމަނިކުފާނު ވިދާޅުވި އެވެ.
މިގޮތުން ރައްޔިތުންގެ ހިޔާލު ހޯދަން ވަރަށް އަވަހަށް ފުރުސަތު ހުޅުވާލާނެ ކަަމަށް ވިދާޅުވަމުން ރައީސް މުއިއްޒު ވަނީ ކުރިއަށް އޮތް 20 އަހަރުގެ ތަރައްގީގެ މާސްޓާޕްލޭން އެކުލަވާލާނީ މި ހިޔާލަތުތަކުގެ މައްޗަށް ބިނާކޮށް ކަމަށް ވިދާޅުވެފަ އެވެ. އަދި މި މާސްޓާޕްލޭނަށް ގާނޫނީ ބާރުވެރިކަން ދެއްވާނެ ކަމަށް ވެސް އެމަނިކުފާނު ވިދާޅުވި އެވެ.
ރައީސް މުއިއްޒުގެ މެނިފެސްޓޯގައިވާ ގޮތުގައި ހއ. އަތޮޅާއި، ހދ. އަތޮޅު އަދި ށ. އަތޮޅު ހިމެނޭ އުތުރުގެ ތަރައްގީގެ ޒޯނުގައި، މައި ހަބަކީ ހދ. ކުޅުދުއްފުއްޓެވެ. އަދި ގއ. އަތޮޅާއި، ގދ. އަތޮޅާ، ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްގީގެ ޒޯނުގައި، މައި ހަބަކީ އައްޑޫ ސިޓީ އެވެ.
ހަތް އާބަން ސެންޓަރު ތަރައްގީ ކުރަނީ މާލޭން އުތުރުގައި ތިނެއް އަދި ދެކުނުގައި ހަތަރު ބިނާވެއްޓެވެ.
