އައިޖީއެމްއެޗްގައި ވަޒީފާ އަދާކުރަމުން ދިޔަ ފިލިޕީންސްގެ ނަރުސް މޭރީ ގްރޭސް މަރާލި މައްސަލާގައި ދައުވާކުރާ ހަލީމަތު ލަމްހާ "މަނާ" ބޭސްތަކެއް ގެންގުޅުނު ކަމަށް ބާރު ލިބިދޭ ހެކިތައް އެއް ކުރުމުގައި ފުލުހުންގެ ތަހުގީގުގައި ގޯސްތަކެއް ހެދުނު ކަން މިއަދު ޝަރީއަތުގައި ހާމަވެއްޖެ އެވެ.

މޭރީ މަރުވީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަމަށް އޮޓޮޕްސީ ރިޕޯޓުން ދައްކަ އެވެ. ފުލުހުންގެ ތަހުގީގު ނިންމުމަށް ފަހު އޭނާ މަރާލުމުގެ ދައުވާ އުފުލީ ފިރިމީހާ މާވިން އެސްވައި ވާގަސްގެ މައްޗަށެވެ. މަރާލުމުގައި ބައިވެރިވުމުގެ ދައުވާ އުފުލާފައިވާ ލަމްހާއަކީ މާވިންގެ ލޯބިވެރިޔާ އެވެ.

މިއަދު ޝަރީއަށް ހާޒިރުކޮށް ހެކިބަސް ނެގީ، ދައުލަތުން ހުށަހަޅާފައިވާ ތިން ހެކިވެރިޔެއްގެ ހެކިބަހެވެ. އެއިން ދެ ހެކިވެރިންނަކީ ފުލުހުންގެ ހިދުމަތުގައި "ސީން އޮފް ކްރައިމް އޮފިސަރު" ގެ ގޮތުގައި މަސައްކަތް ކުރާ ދެ މީހުނެވެ.

ފުރަތަމަ ހެކިބަސް ދިން އޮފިސަރަކީ ލަމްހާގެ ގެއިން ފެނުނު ބޭސްތަކުގެ ފޮޓޯ ނެގި އޮފިސަރެވެ. ފުލުހުން ތުހުމަތު ކުރާ ގޮތުގައި އެއީ އައިޖީއެމްއެޗުން "ވަގަށް" ގެންގޮސްފައިވާ ތަކެއްޗެވެ. އަދި މޭރީ މަރާލީ އެ ބޭސްތައް ބޭނުންކޮށްގެން ކަމަށެވެ.

ހެކިވެރިޔާ ޝަރީއަތަށް ކިޔައިދިން ގޮތުގައި، އޭނާ ކުށުގެ ވެއްޓަށް ދިޔަ ވަގުތު އެ ތަނަށް ހާޒިރުވެ ތިބި ފުލުހުން ވަނީ މޭޒުމަތިން ބައެއް ބޭސްތައް ނަގައި "އެވިޑެންސް ބޭގް" އަށް ލައިފަ އެވެ.

ދެން ފަހުން ދަބަހުން ބޭސްތައް ނަގައި މޭޒު މަތީގައި ބެހެއްޓި ކަމަށް ހެކިވެރިޔާ ބުންޏެވެ.

ގާތްގަނޑަކަށް 70 އެއްހާ ފޮޓޯ ކްރައިމް ސީންގެ ރިޕޯޓުގައި ހިމަނާފައިވާ އިރު "އެވިޑެންސް ބޭގް" ގެ ފޮޓޯއެއް ވެސް ރިޕޯޓުގައި ހިމަނާފައެއް ނުވެ އެވެ.

އެ ކަންކަމާ ގުޅޭ ގުޅިގެން ޝަރީއަތުން ވެސް ވަނީ ހެކިވެރިޔާއާ ސުވާލުކޮށްފަ އެވެ.

އޭނާ ބުނި ގޮތުގައި ފޮޓޯތައް ނެގީ ދަބަހުން ބޭސްތައް ނެގުމަށް ފަހު، މޭޒު މަތީގައި އެ ބޭސްތައް ބެހެއްޓުމަށް ފަހު އެވެ. ފޮޓޯ ނަގަން އެއިރު ވިސްނާފައި އޮތީ އެ ގޮތަށް ކަމަށް އޮފިސަރު ބުންޏެވެ.

އާންމު ގޮތެއްގައި ފުރަތަމަ ނަގާނީ ކުށުގެ ވެށީގެ ފޮޓޯތަކެވެ. އަދި ކުށުގެ ވެށީން ހެކި ހޯދުމަށް ފަހު، ހޯދޭ ހެކިތަކުގެ ފޮޓޯ އެވެ. ހެކިތައް ނެގުމުގެ މަސައްކަތަކީ އޭގެ ފަހުގެ މަސައްކަތެކެވެ.

މައްސަލައިގެ ފަސްފަހަތް؛

މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. ފިލިޕީންސްގައި ވަރިކުރުމަކީ މަނާކަމެއް ގޮތުގައި އޮތް އިރު، ލަމްހާއާއި މާވިން އުޅުނީ ސިއްރު ލޯބީގެ ގުޅުމެއް ބާއްވައިގެން ކަމަށް ތުހުމަތު ކުރެ އެވެ.

އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.

އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.

މާވިންގެ މައްޗަށް އެނގި ހުރެ މީހަކު މަރާލުމުގެ ކުށުގެ ދައުވާ އުފުލާފައިވާއިރު، ލަމްހާގެ މައްޗަށް ކުރަނީ އެނގި ހުރެ މީހަކު މަރާލުމުގައި ބައިވެރިވުމުގެ ކުށުގެ ދައުވާ އެވެ.

އޭގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ ވެސް ލަމްހާގެ މައްޗަށް ކުރެ އެވެ.

އެ ދައުވާތައް ލަމްހާގެ މައްޗަށް ކުރަނީ އައިޖީއެމްއެޗުން ހުއްދަ ނުނަގައި، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.