ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަކިކުރަން އެމްޑީޕީން ހުށަހެޅި ގަރާރުގެ މަސައްކަތް މާދަމާ ކުރިއަށް ގެންދާނެ ކަމަށް މަޖިލީހުގެ ނައިބު ރައީސް ވިދާޅުވެފައި ވަނިކޮށް، މިއަދު ހަވީރު 4:00 ގައި ޖަލްސާއެއް ބާއްވަން ހަމަޖައްސައި، ނަޝީދުގެ މައްސަލަ އެޖެންޑާ ކޮށްފި އެވެ.

މަޖިލީހުގެ އިދާރާއިން އާންމުކުރި އެޖެންޑާގައި ހިމަނާފައިވަނީ ނަޝީދު ވަކިކުރުމުގެ ގަރާރު އެކަންޏެވެ. މިއަދު 11:00 ގައިވެސް އެ ގަރާރު ކުރިއަށް ގެންދިއުމަށް ޖަލްސާއެއް ފެށި އެވެ. އެޖެންޑާކުރި މައްސަލަ ކުރިޔަށް ނުގެންދެވުނަސް، 2:30 ވަންދެން އީވާ ރިޔާސަތު ގޮނޑީގައި އިންނެވި އެވެ.

އާންމުކޮށް މަޖިލީހުގެ ޖަލްސާތައް 2:30 ގައި ނިންމާލާތީވެ، އީވާ ވެސް މިއަދުގެ ޖަލްސާ ނިންމާލުމަށް ފަހު، ވިދާޅުވީ މާދަމާ ޖަލްސާ ބާއްވާނެ ކަމަށެވެ.

ނަމަވެސް އެ ޖަލްސާ ނިންމާލިކަން އީވާ އިއުލާނު ކުރެއްވިތާ ކުޑައިރުކޮޅެއްގެ ތެރޭގައި އާ ޖަލްސާއެއް އެެޖެންޑާކުރި އެވެ. ހަވީރު 4:00 ގައި ބާއްވާ އެ ޖަލްސާ އެޖެންޑާކުރީ އީވާގެ ލަފައާ އެއްގޮތަށް ކަމެއް ނުވަތަ ނޫން ކަމެއް ނޭނގެ އެވެ.

ނަޝީދުގެ އިތުބާރު ނެތްކަމުގެ މައްސަލަ އެޖެންޑާކުރަން ޖެހެނީ މަޖިލީހުގެ އަމީން އާންމު ފާތިމަތު ފިލްޒާ އެވެ. ނަމަވެސް އީވާ މިއަދު ތަކުރާރުކޮށް ވިދާޅުވަމުން ގެންދެވީ ޖަލްސާތައް އެޖެންޑާކޮށް، މެމްބަރުންނަށް އެކަން އަންގާނީ އޭނާ ކަމަށެވެ.

މަޖިލީހުގެ މެޖޯރިޓީ ޕާޓީން ބުނާ ގޮތުގައި އީވާ މަޖިލީހުގެ ޖަލްސާ ހުއްޓުވާފައި ވަނީ މަޖިލީހުގެ ގަވާއިދާ ހިލާފަށެވެ. އެއީ ނަޝީދު ވަކިކުރަން ހުރަސް އެޅުމުގެ ގޮތުން ކަމަށް އެ މެމްބަރުން ދެކެވަޑައިގަންނަވަ އެވެ. ނަޝީދު އާއި އީވާއަކީ ދެބޭންގެދެދަރި ބޭފުޅުންނެވެ.