ލަންޑަން (ނޮވެމްބަރު 7) - ވީޑިއޯ އެސިސްޓަންޓް ރެފްރީ (ވީއޭއާރް) އިން ގިނަ ނިންމުންތަކެއް ނިންމި "ޑްރާމާ" ބޮޑު މެޗުން ގައި ޗެލްސީ އަތުން 4-1 އިން ބަލިވެ، މި ސީޒަނުގައި ޓޮޓެންހަމުން މެޗަކުން ބަލިނުވެ ދަހަމައްޓަމުން އައި ރެކޯޑު ނިމުމަކަށް އަތުވެއްޖެ އެވެ.

ރޭގެ މެޗާ ހަމައަށް ލީގުގައި ޓޮޓެންހަމް ކުޅުނު 10 މެޗުންވެސް އެޓީމް ބައްޔެއް ނުވެ އެވެ. މި މެޗާ ހަމައަށް ލީގުގައި ބަލިނުވެ އޮތް ހަމައެކަނި ޓީމަކީވެސް ޓޮޓެންހަމެވެ. ނަމަވެސް ޗެލްސީ އަތުން އިން ބަލިވެ އެ ޓީމަށް ވަނީ ލީގުގެ އެއް ވަނަ މަގާމް ވެސް ގެއްލިފަ އެވެ.

ވީއޭއާރުން ގިނަ ނިންމުންތަކެއް ނިންމި މި މެޗުގައި ފުރަތަމަ ގޯލު ޖެހީވެސް ޓޮޓެންހަމުންނެވެ. މިއީ މެޗުގެ ހަ ވަނަ މިނެތުގައި ޓޮޓެންހަމުން އުފެއްދި ކައުންޓާ އެޓޭކެއްގައި އެޓީމްގެ ޑެޖާން ކުލުސްވެސްކީ ޖެހި ގޯލެކެވެ.

މި ގޯލަށް ފަހު ދެން ފެނުނީ ފުރަތަމަ ހާފުގައި އެކަނިވެސް ނުވަ ނިންމުމެއް ވީއޭއާރުން ނިންމިތަނެވެ. ބަހުސްކުރެވޭ ގިނަ ނިންމުންތަކެއް ނިންމިކަންވެސް ފާހަަގަކޮށްލެވެ. މުޅި މެޗަށް ބަލާއިރު ވީއޭއާރުން ވަނީ ދެ ޓީމުން ޖެހި ފަސް ގޯލެއް ގޯސްކަމަށް ނިންމައި، ދެ ރަތްކާޑެއް ދައްކަން ޖެހޭކަމަށް ބުނެފަ އެވެ.

މެޗުގެ ދެ ވަނަ ގޯލު ޖެހީ ޓޮޓެންހަމްގެ ކެޕްޓަން ސަން ހުއެން މިން އެވެ. ވީއޭއާރުން ނިންމީ މި ގޯލު އޮފްސައިޑް ކަމަށެވެ. އޭގެ ފަހުން ޗެލްސީން ޖެހި ދެ ގޯލެއް ވީއޭއާރުން ގޯސްކަމަށް ނިންމި އެވެ. ރަހީމް ސްޓާލިން ޖެހި ގޯލު ގޯސްކަމަަށް ނިންމީ އޭނާގެ އަތުގައި ބޯޅަ ޖެހުމުންނެވެ. މޮއިސެސް ކައިސޭޑޯ ޖެހި ގޯލު ގޯސްކަމަށް ނިންމީ ކީޕަރާ ދިމާލުގައި އޮފްސައިޑް މަގާމެއްގައި ނިކޮލަސް ޖެކްސަން ހުރުމުންނެވެ.

އޭގެ ފަހުން ވީއޭއާރުން ވަނީ ކްރިސްޓިއަން ރޮމޭރޯ ކުރި ފައުލަކަށް އޭނާއަށް ރަތްކާޑު ދައްކަން ޖެހޭކަމަށް ނިންމާފަ އެވެ. ރޮމޭރޯ އަށް ދެއްކި ރަތްކާޑާއިއެކު ޗެލްސީ އަށް ޕެނަލްޓީ އެއް ލިބި، އެޓީމުން މި ޕެނަލްޓީ ކާމިޔާބުކޮށް ނަތީޖާ ހަމަހަމަކުރި އެވެ. މި ގޯލު ޖަހައިދިނީ ކޯލް ޕާލްމާ އެވެ.

ދިހަ ކުޅުންތެރިންނާ އެކު ކުޅުނު ޓޮޓެންހަމަށް އުނދަގޫތައް ދިމާވީ ދެވަނަ ހާފަށް ނުކުތުމުގެ ކުރިން މުހިންމު ދެ ކުޅުންތެރިއަކަށް އަނިޔާވެ ބަދަލުކުރަން ޖެހުމުންނެވެ. މިގޮތުން ޖޭމްސް މެޑިސަން އާއި ޑިފެންޑަރު މިކީ ވެންޑެވެން އަށް އަނިޔާވެ ހާފް ޓައިމްގައި ބަދަލުކުރި އެވެ.

އުނދަގޫ ހާލަތުގައި އޮތް ޓޮޓެންހަމް މައްސަލަތައް އިތުރުވީ ދެވަނަ ހާފުގެ ކުރީކޮޅު ދެވަނަ ރީނދޫ ކާޑާ އެކު ރަތް ކާޑެއް ޑިފެންޑަރު ޑެސްޓިނީ އުޑޯގީ އަށް ދެއްކި ހިސާބުންނެވެ. އޭގެ ފަހުން ޗެލްސީ އިން ލީޑު ނެގީ ރަހީމް ސްޓާލިން ތަނަވަސްކޮށްދިން ފުރުސަތަކުން ނިކޮލަސް ޖެކްސަން އެވެ.

ނުވަ ކުޅުންތެރިންނާއިއެކު ކުޅުނު ނަމަވެސް ޓޮޓެންހަމުން ގޯލެއް ޖަހައި އެއްވަރުކުރި އެވެ. މެޗުގެ 79 ވަނަ މިނެޓުގައި އެރިކް ޑަޔާ ޖެހި ގޯލު ވީއޭއާރުން ނިންމީ އޮފްސައިޑް ކަމަށެވެ.

ދެ ކުޅުންތެރިން މަދުކޮށް ކުޅުނު ޓޮޓެންހަމް ކޮޅަށް ޗެލްސީގެ ފަހު ދެ ގޯލު ޖެހީ މެޗުގެ އިތުރު ވަގުތުގަ އެވެ. މި ދެ ގޯލު ޖަހައި ނިކޮލަސް ޖެކްސަން ވަނީ އޭނާގެ ހެޓްރިކް ފުރިހަމަކޮށްފަ އެވެ.

ރެފްރީންގެ ނިންމުންތަކަށް އަމާޒުވަމުން އަންނަ ފާޑުކިޔުންތައް ގިނަވެފައިވާއިރު، މިއީ އެކަމަށް އިތުރު ބާރެއްދޭ މެޗެއްގެ ގޮތުގައި ގިނަ ބަޔަކު ސިފަކުރެ އެވެ. ބައެއް ފުޓްބޯޅަ އެނަލިސްޓުން ސިފަކުރާ ގޮތުގައި މިއީ ޕްރިމިއާ ލީގުގެ ތާރީހުގައިވެސް ފެނުނު ގިނަ ހާދިސާތައް ހިނގި "ޑްރާމާ" ބޮޑު އެއް މެޗެވެ.

ރޭގެ މެޗުން ބަލިވުމުން ޓޮޓެންހަމްވަނީ ލީގުގެ ދެ ވަނައަށް ވެއްޓިފަ އެވެ. އެއް ވަނައިގައި އޮތީ 27 ޕޮއިންޓާއިއެކު ޗެމްޕިއަން މެންޗެސްޓާ ސިޓީ އެވެ. ދެ ވަނައިގައި އޮތް ޓޮޓެންހަމަށް ލިބެނީ 26 ޕޮއިންޓެވެ. ތިން ވަނައިގައި އޮތް ލިވަޕޫލާއި ހަތަރުވަނައިގައި އޮތް އާސެނަލަށް ލިބެނީ 24 ޕޮއިންޓެވެ.