ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މޯލްޑިވިއަން ޑިމޮކްރެޓިކް ޕާޓީއާ ދެމެދު އުފެދިފައި އޮތީ ވަރަށް ހައްސާސް ކީމިޔާއެއް ނުވަތަ ކެމިސްޓްރީއެކެވެ.

ނަޝީދަކީ، އެމްޑީޕީ އުފެއްދުމުގެ އެންމެ ބޮޑު ބާނީ އެވެ. އެ ޕާޓީގެ މެމްބަރެއްގެ ހައިސިއްޔަތުން ދިވެހިރާއްޖޭގެ ރައީސުލްޖުމްހޫރިއްޔާގެ މަގާމަށް ވެސް ފުރަތަމަ ވަޑައިގެންނެވީ އެމަނިކުފާނެވެ. އެމްޑީޕީގެ އާންމު މެމްބަރުންނާއި ވެރިން ވެސް "އަންނި" އަށް ހާއްސަ އިހުތިރާމަކާއި ލޯތްބެއް ދިނެވެ.

އެކަމަކު، ނަޝީދުގެ މިއަދުގެ ވައުދަކީ، އެމަނިކުފާނު ވެވަޑައިގަންނަވާނީ އެމްޑީޕީ ރޫޅާލައްވާނެ ބޭފުޅާ ކަމަށެވެ. އެ ޕާޓީގެ އާންމު މެމްބަރުންގެ ހަނދާނުގައި މިހާރަކު ނަޝީދެއް ނެތެވެ. އެ ޕާޓީގެ ލީޑަރުން މިއަދު ސިޔާސީ ގޮތުން އެންމެ ނުރުހުން ވަނީ ނަޝީދު ދެކެ އެވެ.

އެމްޑީޕީ ލީޑު ކުރެއްވުމުގެ ޒިންމާ މިއަދު އުފުއްލަވަމުން ގެންދަވާ ރައީސް ސޯލިހު ގަބޫލު ކުރައްވަނީ، ރިޔާސީ އިންތިހާބުން އެމަނިކުފާނު ބަލިވުމުގައި ވެސް ނަޝީދާއި އެމަނިކުފާނު އަލަށް އުފެއްދެވި ދަ ޑިމޮކްރެޓްސްގެ ދައުރު ބޮޑު ކަމަށެވެ. އެމްޑީޕީގެ ގައުމީ މަޖިލީހުގެ ގިނަ މެމްބަރުން އެދޭ ނަމަ އަލުން ޕާޓީއާ ގުޅިވަޑައިގަންނަވާނެ ކަމަށް ނަޝީދު ވިދާޅުވުމުން، ރައީސް ސޯލިހުގެ ޖަވާބަކަށްވީ "ވަކި މީހަކު ޕާޓީގައި ހުރުން މުހިން ނޫން" ކަމަށެވެ.

ނަޝީދާއި އެމްޑީޕީގެ ގުޅުން އެފަދަ ގޮތަކަށް އޮތް އިރު، ވެރިކަން ކުރާ ޕާޓީން މިވަގުތު އަނެއްކާ ވެސް މަސައްކަތް ކުރަަނީ ނަޝީދުގެ އިތުބާރު ނެތް ކަމުގެ ވޯޓެއް ނަގައި، ރައްޔިތުންގެ މަޖިލީހުގެ ރިޔާސަތުން އެމަނިކުފާނު ބޭރުކޮށްލުމަށެވެ. މީގެ ކުރިން ވެސް އެ މަސައްކަތް އެމްޑީޕީން ކުރި އެވެ. އެކަމަކު، ރިޔާސީ އިންތިހާބާ ޖެހެންދެން، ސިޔާސީ އެކި އުކުޅުތައް ބޭނުން ކުރައްވައި ނަޝީދު އެ މައްސަލަ މަޑުޖައްސާލި އެވެ.

ރިޔާސީ އިންތިހާބުގެ ފުރަތަމަ ބުރުން ރައީސް ސޯލިހަށް ނާކާމިޔާބުވުމުން އެމްޑީޕީން ބެލީ ގުޅެވެން ހުރި ޕާޓީއަކާ ގުޅުމެވެ. އެ ދަނޑިވަޅު ޑިމޮކްރެޓްސްގެ ޖަވާބަކަށްވީ އެއްވެސް ވާހަކައެއް ދެއްކޭނީ އިތުބާރު ނެތް ކަމުގެ މައްސަލަ ބޭރުކޮށްލުމުން ކަމަށެވެ. އެގޮތަށް އެއްބަސްވެ، މައްސަލަ އަނބުރާ ގެންދިޔުމުން އެމްޑީޕީއަށް ކަތިވަޅި ގެއްލި، މަރިޔަނބު ގެއްލި އަދި ކޮށި ދަނޑު ވެސް ގެއްލުނީ އެވެ. އެވަރަށް ދޫދިނުމުން ވެސް ނަޝީދު އަދި ޑިމޮކްރެޓްސް ބުނީ ބޭނުމީ "ރައީސް ސޯލިހު ނޫން ގޮތެއް" ކަމަށެވެ.

ނަޝީދުގެ އިތުބާރު ނެތް ކަމުގެ މައްސަލަ އަންނަ އާދީއްތަ ދުވަހަށް އެޖެންޑާ ކުރާނެ ކަމަށް ރައްޔިތުންގެ މަޖިލީހުގެ އަމީންއާންމު ފާތިމަތު ނިއުޝާ ވަނީ އެ މަޖިލީހުގެ މެމްބަރުންނަށް އަންގައިފަ އެވެ. ނަމަވެސް ކުރީގެ މައްސަލައިގެ ތަޖުރިބާއަށް ބަލާފައި، މައްސަލަ ކުރިއަށް ގެންދެވޭނެ ކަމާމެދު ޝަައްކެވެ. އަދި ޖަލްސާ ކުރިއަށް ގެންދެވުނު ނަމަވެސް އޮމާންކަމާއެކު އެކަން ކުރެވުމަކީ ނާދިރު ކަމެކެވެ.

މަޖިލީހުގެ ގަވާއިދުގައި ބުނާ ގޮތުން، އެ މަޖިލީހުގެ ރައީސް ވަކި ކުރުމުގެ ގަރާރެއް އިއްވައިފި ނަމަ، އިތުރު ކަމަކަށް ބަހުސް ކުރެވޭނީ ނުވަތަ ގޮތެއް ނިންމޭނީ، އިތުބާރުގެ މައްސަލައާމެދު ފުރަތަމަ ގޮތެއް ނިންމުމަށްފެހެވެ. އެހެން އެ މާއްދާ އޮއްވައި، ގާނޫނު އަސާސީގައި ބުނަނީ، ރައީސުލްޖުމްހޫރިއްޔާ ހުވާ ކުރަން ޖެހޭނީ ރައްޔިތުންގެ މަޖިލީހުގެ ޖަލްސާއެއްގަ އެވެ.

އެމްޑީޕީ މެމްބަރުން މިހާރު ބުނަނީ، ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންގޮސް، އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރުމަށް ބާއްވަންޖެހޭ ޖަލްސާ ނުބޭއްވޭނެ ކަމަށެވެ. ނަމަވެސް ޑިމޮކްރެޓްސްގެ ހިޔާލު ތަފާތެވެ. އެ ޕާޓީން ބުނަނީ، ނަޝީދުގެ މައްސަލަ ކުރިއަށް ނުގެންދެވުނު ނަމަވެސް ގާނޫނު އަސާސީ ލާޒިމް ކުރާ މަސައްކަތެއް ކޮންމެވެސް ގޮތަކުން ކުރަންޖެހޭނެ ކަމަށެވެ.

އެމްޑީޕީ އާއި ނަޝީދުގެ ހަނގުރާމައިގެ މެދަށް މިފަހަރު މި ވަނީ އިންތިހާބީ ރައީސް ހުވާ ކުރުމުގެ މައްސަލަ އެވެ. ރައްޔިތުންގެ މަސްލަހަތާ ގުޅުން ހުރި، ބޮޑު މައްސަލައެކެވެ. އިހަކަށްދުވަހު ރައްޔިތުން ނުކުމެ އިންތިހާބު ކުރި ރައީސަށް ގާނޫނީ ހައިސިއްޔަތު ދިނުމުގެ މުހިންމު މައްސަލައެކެވެ.

ޑިމޮކްރެޓްސް އެދެނީ އިތުބާރުގެ މައްސަލަ ނުބާއްވައި ހުވާގެ ޖަލްސާ ކުރިއަށްގެންދަން

ފުރަތަމަ ކަމަކަށް، ޑިމޮކްރެޓްސް ގަބޫލު ކުރާ ގޮތުގައި ނަޝީދުގެ އިތުބާރު ނެތް ކަމުގެ މައްސަލަ މަޖިލީހުގެ މި ދައުރުގައި ދެ ވަނަ ފަހަރަށް ނުވެސް ވެއްދޭނެ އެވެ. އެއް ދައުރެއްގައި، އެއް މައްސަލައެއް ދެ ފަހަރަށް ނުވެއްދޭނެ ކަމަށް ލިޔެކިޔުމުގައި ބަަޔާންކޮށްފައި ނެތް ނަމަވެސް އެކަން ގާނޫނުތަކުގެ ރޫހާއި ބެސްޓް ޕްރެކްޓިސްއާ ހިލާފު ކަމަށް ޑިމޮކްރެޓްސް ގަބޫލު ކުރެ އެވެ.

"އަޅުގަނޑުމެން ގަބޫލެއް ނުކުރަން ފެށުނީއްސުރެ ވެސް އެ މައްސަލަ ރައްޔިތުންގެ މަޖިލީހަށް ހުށަހެޅޭނެ ކަމަކަށް. އެންމެ ބޮޑު އެއް މައްސަލައަކީ ތަހުޒީބީ މުޖްތަމައުތަކުގައި ކަންތައް ކުރާ ގޮތެއް ނޫން އެއީ މިއަދު އިތުބާރު އޮވެފަ، މާދަމާ އަނެއްކާ މައްސަލަ ވައްދާ އުސޫލު. އެހެން ހެދީމާ އެބަ އޮތް ފުރުސަތެއް ރައްޔިތުންގެ މަޖިލިސް ސެބަޓާޖް ކުރުމުގެ،" ޑިމޮކްރެޓްސްގެ ޕާލަމެންޓަރީ ގްރޫޕުގެ ލީޑަރު އަދި މަޖިލީހުގެ މެދު ހެންވޭރު ދާއިރާގެ މެމްބަރު "އަދަދު" އަށް ދެއްވި އިންޓަވިއުއެއްގައި ވިދާޅުވި އެވެ.

އާޒިމް ވިދާޅުވީ އިތުބާރު ނެތް ކަމުގެ މައްސަލަ ވައްދައިގެން އުޅެނީ ނަޝީދުގެ މައްސަލައެއް ހުރެގެން ނޫން ކަމަށެވެ. އޭނާ ތުހުމަތު ކުރަނީ ނަޝީދުގެ މައްސަލަ މަޖިލީހަށް ވައްދައިގެން އުޅެނީ، ރައީސް ސޯލިހުގެ ހިތްޕުޅުގައި ނަޝީދާމެދު ޒާތީ މައްސަލައެއް އޮތުމުން، އެކަން ހަމަޖެއްސުމަށެވެ.

"މި އުޅެނީ ރައީސް [ނަޝީދު] ގެ މައްސަލަތަކެއް ހުރެގެން ނޫންކަން އެނގެނީ އިހަށްދުވަހަކު މައްސަލަ ނެގީމަ. މައްސަލަތަކެއް އުޅޭ ނަމަ ހަމަ އެ މައްސަލަ އޯވާނައިޓެއްގައި ރަނގަޅެއް ނުވާނެ، ގޯހެއް ވެސް ނުވާނެ. މި އުޅެނީ ޒާތީ ކަމެއް. މިއީ ރައީސުލްޖުމްހޫރިއްޔާގެ ހިތަށް ތަސައްލީއެއް، ހިތްހަމަޖެހުމެއް ގެންނަން ކުރާ ކަމެއް،" އާޒިމް ވިދާޅުވި އެވެ.

ނަޝީދުގެ އިތުބާރު ނެތް ކަމުގެ މައްސަލަ ހުއްޓުވަން ޑިމޮކްރެޓްސް އިން ކުރެވެހެން ހުރި ހުރިހާ މަސައްކަތެއް ކުރާނެ ކަމަށް އާޒިމް ވިދާޅުވި އެވެ.

"ޖަލްސާއެއް ނުބޭއްވޭނެ، ބޭއްވިޔަކަ ނުވެސް ދޭނަން"

"މިކަމަކީ ކުރެވޭނެ ކަމެއް ނޫން. އަޅުގަނޑުމެން ނެތިން ފުރުސަތެއް ވެސް ދޭކަށް އެހާ އަން-ޑިމޮކްރެޓިކްކޮށް މިކަން ކުރާކަށް. އެއް ބަޔަކު ހަޑިކޮށް އުޅެންޏާމު، އަޅުގަނޑުމެން ވެސް ހަޑިކޮށް އުޅެގެން ވެސް މިކަން ވިޔަ ނުދޭނެ. އެބޭފުޅުން ވެސް އެ އުޅެނީ ރީތިކޮށެއް ނޫން މިވަގުތަކު. އެހެންވީމާ އަޅުގަނޑުމެން ވެސް އުޅޭނީ ރީތިކޮށެއް ނޫން،" އާޒިމް ވިދާޅުވި އެވެ.

ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއް ހުށަހަޅާފައި އޮއްވާ އެހެން މަސައްކަތެއް ނުކުރެވޭނެ ކަމަށް ގަވާއިދުގައި އޮޮތް ނަމަވެސް އެކަން ލިޔެފައި އޮތީ ކަނޑައެޅިގެން އެގޮތަށް ނޫން ކަމަށް އާޒިމް ދެކެ އެވެ. އަދި އެހެން ލިޔެފައި އޮތް އެ ގަވާއިދުގެ 205 ވަނަ މާއްދާގެ ރ. ލިޔެފައި އޮތީ އެހާ ސާފުކޮށް ނޫން ކަމަށް ވެސް އާޒިމް ގަބޫލު ކުރައްވަ އެވެ.

"ދެން މި އޮތީ މި މައްސަލަ ހުށަހަޅާފައި އޮއްވާ އެހެން ކަމެއް ކުރެވޭނެތޯ ނޫންތޯ. މަޖިލީހުގައި އެބަ ތިބި އެކި ވަރުވަރުން ލަފާ އަރުވާނެ ފަރާތްތައް. އެމީހުން ދެއްވާނެ ލަފާ އެކަމަށް. އަޅުގަނޑު ދެކޭ ގޮތުގައި، އެކަން ކަނޑައެޅިގެން ނުކުރެވޭނެ ކަމަށް، ސާފުކޮށް ލިޔެފައެއް ނެތް. ލިޔެފައި ނެތް ކަންކަން ދެން މި އޮންނަނީ ބެސްޓް ޕްރެކްޓިސްއަށް ކުރާ ގޮތަށް،" އޭނާގެ ހިޔާލު ހިއްސާ ކުރައްވަމުން އާޒިމް ވިދާޅުވި އެވެ.

"ހުވާ ކުރުމުގެ ޖަލްސާ ކުރިއަށްގެންދެވޭނެ"

ގަވާއިދުގެ 205 ވަނަ މާއްދާގެ ރ. ލިޔެފައި އޮތް ގޮތުން، އެފަދަ ގަރާރެއް ހުށަހެޅުމަށްފަހު، ރިޝެޑިއުލް ވެސް ކުރެވިދާނެ ކަމަށް އާޒިމް ގަބޫލު ކުރައްވަ އެވެ. އެއިރުން މަޖިލީހުގެ އެހެން މަސައްކަތްތައް ކުރަން ހުރަސް ނޭޅޭނެ ކަމަށް އާޒިމް ވިދާޅުވި އެވެ.

"ރައްޔިތުންގެ މަޖިލީހަށް [މުއްދަތު ހަމަވުމުން ގަރާރު] ހުށަހަޅަންޖެހޭނެއޭ، ދެން [އެއަށްފަހު] އެހެން މަސައްކަތެއް ނުކުރެވޭނެއޭ. އޯކޭ، އެހެން ކަމެއް ނުކުރެވޭނެއޭ އޭގެ މާނައަކީ މި މަސައްކަތް ނިންމަންޖެހޭނެ ވަކި ތާރީހެއް ވެސް ދެވިދާނޭ. އެހެންވީމާ މި މަސައްކަތް ނިންމަން ރައްޔިތުންގެ މަޖިލީހުގެ ރިޔާސަތުން ނިންމީއޯ ދެން މަޖިލިސް ބަންދުވެފަ، ހުޅުވޭއިރަށް. އޭގެ މާނައަކީ މިހާރު އެ އޮތީ މަސައްކަތް ކުރަންވީ ގޮތް ސެޓުވެފައޭ. ދެން އެހެން ވީމަ އެހެން މަސައްކަތްތައް ކުރެވެންޖެހޭނެ،" އާޒިމް ވިދާޅުވި އެވެ.

އެމްޑީޕީން ދެކޭ ގޮތަކީ، ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ނުގެންގޮސް، އިންތިހާބީ ރައީސް ހުވާ ކުރުމުގެ ޖަލްސާ ވެސް ނުބޭއްވޭނެ ކަމަށެވެ. ސަބަބަކީ، އެ ޖަލްސާ ވެސް ހިމެނެނީ މަޖިލީހުގެ މަސައްކަތުގެ ތެރޭގައި ކަމަށްވާތީ އެވެ. ނަމަވެސް އާޒިމްގެ ހިޔާލު އެއާ ތަފާތެވެ. އިތުބާރު ނެތް ކަމުގެ މައްސަލަ ބާއްވާފައި ވެސް "ކޮންމެވެސް ގޮތަކުން" ހުވާ ކުރުމުގެ ޖަލްސާ ކުރިއަށްގެންދެވޭނެ ކަމަށް އާޒިމް ގަބޫލު ކުރައްވަ އެވެ.

"ގާނޫނު އަސާސީ ލާޒިމް ކުރާ ކަމެއް ރައްޔިތުންގެ މަޖިލީހަށް، ރައްޔިތުން ހޮވާ ރައީސެއް ފަސް އަހަރުވީމާ ހުވާ ކުރުން. އެއީ ގާނޫނު އަސާސީން ހަވާލުކޮށްފައިވާ މަސައްކަތެއް. އެ މަސައްކަތް ކޮންމެވެސް ގޮތަކުން ކުރެވޭނެ. އެކަން ކުރާނީ ރައްޔިތުންގެ މަޖިލީހުގެ ރައީސްތޯ ނައިބު ރައީސްތޯ އެހެން މީހެއްތޯ، އެއީ އަދި މުޅިން އެހެން ވާހަކައެއް. އެކަން ކުރާނެ، އެކަން ކުރެވޭނެ، އެ މަސްއޫލިއްޔަތު އަދާ ކުރާނެ ރައްޔިތުންގެ މަޖިލީހުން،" އާޒިމް ވިދާޅުވި އެވެ.

އެމްޑީޕީ ދެކެނީ ނަޝީދުގެ މައްސަލަ ޕާކުކޮށްފައި ހުވާގެ ޖަލްސާ ނުބޭއްވޭނެ ކަމަށް

ރައްޔިތުންގެ މަޖިލީހުގެ ގަވާއިދު ބުނާ ގޮތުން، އެ މަޖިލީހުގެ ރައީސް އިތުބާރު ނެތް ކަމުގެ ގަރާރެއް ހުށަހަޅައިފި ނަމަ ވަކި މުއްދަތެއްގެ ތެރޭގައި އެ ގަރާރު އިއްވުމުގެ ޖަލްސާ ބާއްވަންޖެހެ އެވެ. ގަވާއިދުގައި ދީފައިވާ ތާރީހުތަކަސް ބަލާއިރު އެ ދުވަހަކީ އަންނަ އާދީއްތަ ދުވަހެވެ.

އެމްޑީޕީން ގަބޫލު ކުރަނީ، ނަޝީދުގެ އިތުބާރު ނެތް ކަމުގެ މައްސަލަ އާދީއްތަ ދުވަހު ބާއްވައި، އިތުބާރާމެދު ގޮތެއް ނުނިންމާ އެއްވެސް މަސައްކަތެއް ނުކުރެވޭނެ އެވެ. އޭގެ ފަހުން ކުރާ އެއްވެސް މަސައްކަތަކަށް ގާނޫނީ ބުރަދަން ނުދެވޭނެ ކަމަށް އެ ޕާޓީން ގަބޫލު ކުރެ އެވެ.

"އެމްޑީޕީގެ ޕާލަމެންޓަރީ ގްރޫޕުގެ ސްޓޭންޑަކީ އެ ދުވަހުގެ ވޯޓު ނެގުމަށްފަހު ނޫނީ މަޖިލީހުގައި އެއްވެސް ކަމެއް ކުރިއަށް ގެންދާކަށް އަޅުގަނޑުމެން އެއްބާރުލުމެއް ނުލިބޭނޭ. އަދި އަޅުގަނޑުމެން އެ ދުވަހުން ފެށިގެން މަޖިލީހުގެ ރައީސަކީ ލެޖިޓިމޭޓް ރައީސް ކަމަށް ބަލައެއްނުގަންނާނަން. ދެން އޭގެ ފަހުން ކުރެވޭ އެއްވެސް ކަމެއް އެއީ ގާނޫނީ ހަމަތަކުގެ މަތިން ކުރެވޭ ކަމެއް ކަމުގައި އަޅުގަނޑުމެން ނުބަލާނަމޭ،" އެމްޑީޕީގެ ޕާލަމެންޓަރީ ގްރޫޕުގެ ރައީސް އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް "އަދަދު" އާ ވާހަކަ ދައްކަވަމުން ވިދާޅުވި އެވެ.

"އީވާ ވަޑައިނުގަތަސް ޖަލްސާ ބޭއްވޭނެ"

ނަޝީދުގެ އިތުބާރު ނެތް ކަމުގެ މައްސަލަ އާދީއްތަ ދުވަހު ކުރިއަށް ގެންދަން ކޮންމެ ގޮތަކުން ނަމަވެސް އެމްޑީޕީން ބޭނުންވެ އެވެ. އެކަމަކު ގަވާއިދު ބުނާ ގޮތުން ރައީސްގެ އިތުބާރު ނެތް ކަމަށް ހުށަހަޅާ ޖަލްސާއެއްގެ ރިޔާސަތު ބަލަހައްޓަންޖެހެނީ އެ މަޖިލީހުގެ ނައިބު ރައީސެވެ. އެއީ ޑިމޮޮކްރެޓްސްގެ މެމްބަރު އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އެވެ. ބަލިވެ އުޅުއްވާތީ ބުދަ ދުވަހު ބޭއްވި ޖަލްސާއަށް އީވާ ވަޑައިނުގަންނަވަ އެވެ. އާދީއްތަ ދުވަހު ވެސް އީވާ އުޅުއްވާނީ ބަލިކޮށް ކަމަށް މިވަގުތު ވަނީ އަޑުފެތުރިފަ އެވެ.

"އަޅުގަނޑުމެންނަށް އެބަ އަޑު އިވޭ އީވާ ވަޑައިނުގަންނަވާނެ ކަމަށް. ޖަލްސާ ޗެއާ ނުކުރައްވާނެ ކަމަށް. ޗެއާ ނުކުރައްވާ ކަމަށްވާ ނަމަ ޗެއާ ކުރެއްވޭނެ ގޮތެއް ވެސް ހޯދަންޖެހޭ. އެކަމެއް ވެސް ނުކުރައްވާ. މިއަދު ވެސް އާލާސްކަންފުޅާ އުޅުއްވާ ކަމަށް ވިދާޅުވެ ވަޑައިނުގަންނަވާ. އާދީއްތަ ދުވަހު ވެސް އެހެން ކަމަށް ހައްދަވާނީ އެބަ އަޑު އިވޭ،" އަސްލަމް ވިދާޅުވި އެވެ.

އާދީއްތަ ދުވަހުގެ ޖަލްސާއަށް އީވާ ވަޑައިނުގެންނެވި ނަމަވެސް އެ ޖަލްސާ ކުރިއަށްގެންދެވޭނެ ކަމަށް އަސްލަމް ގަބޫލު ކުރައްވަ އެވެ. އެކަމަށް ބޭނުންވާ ގާނޫނީ ލަފާ ވެސް އެމްޑީޕީން ދަނީ ހޯދަމުންނެވެ. މަޖިލީހުގެ ރައީސްގެ އިތުބާރު ނެތް ކަމުގެ ގަރާރު އިއްވާ ޖަލްސާގެ ރިޔާސަތު ބަލަހައްޓަންޖެހޭނީ ނައިބު ރައީސް ކަމަށް ގަވާއިދުގައި އޮތަސް އެ މާއްދާ ގާނޫނު އަސާސީގެ ރޫހާ ހިލާފު ކަމަށް އަސްލަމް ދެކެވަޑައިގަންނަވަ އެވެ.

ގާނޫނު އަސާސީގެ 82 ވަނަ މާއްދާގެ ޅ. ގައި ބަޔާން ކުރަނީ އެފަދަ ޖަލްސާގެ ރިޔާސަތު ނުބެލެހެއްޓޭނީ އެ ހުށަހެޅިފައިވާ މީހަކަށް ކަމަށް. ރައީސްގެ މައްޗަށް ހުށަހެޅިފައި އޮތިއްޔާ ރައީސްއަށް ނުބެލެހެއްޓޭނީ. އެހެން ނަމަވެސް މަޖިލީހުގެ ގަވާއިދުން މި އޮންނަނީ ވަރަށް ބޮޑަށް ލިމިޓުކޮށްފަ. އެކަމަކު ގާނޫނު އަސާސީ ނުކުރާ ލިމިޓެއް ގާނޫނު އަސާސީއާ ތައާރަޒުވާ ގޮތަށް އުސޫލެއްގެ ގޮތުން ނުކުރެވޭނެ،" އަސްލަމް ވިދާޅުވި އެވެ. "ގާނޫނު އަސާސީގައި ބަޔާން ކުރާ އުސޫލުތަކާއި ހަމަތަކަށް އެ ގަވާއިދު ތަބާވާންޖެހޭނެ."

"ހުވާ ކުރި ނަމަވެސް ސަރުކާރު އަދި ކެބިނެޓު ވެސް ބަލައެއްނުގަންނާނަން"

އަސްލަމް ވިދާޅުވީ، ނަޝީދުގެ އިތުބާރު ނެތް ކަމުގެ މައްސަލަ ބާއްވާފައި، އިންތިހާބީ ރައީސް ހުވާ ކުރައްވައިފި ނަމަ އެމަނިކުފާނުގެ ގާނޫނީ ގޮތުން ބަލައިނުގަނެވޭނެ ކަމަށެވެ. އެފަދަ ހާލަތެއްގައި، އެމަނިކުފާނުގެ ސަރުކާރު ވެސް ކެބިނެޓު ވެސް ބަލައިނުގަނެވޭނެ ކަމަށް އަސްލަމް ވިދާޅުވި އެވެ.

"އިތުބާރު އޮތް ކަމަށްވާ ނަމަ ހަމަ ކުރިއަށް ގެންދަވަންވީ. އިތުބާރު ނެތް ކަމަށް ވަނީ ނަމަ މަޖިލީހުގެ ގަވާއިދުގައިވާ ގޮތަށް ރިޔާސަތު ބަދަލުކޮށްގެންނޭ ކުރިއަށް ގެންދެވޭނީ. ހުވާ ކުރުމުގެ ރަސްމިއްޔާތު އެ ނޫން ގޮތަކަށް ކުރިއަށްގެންދަވާ ކަމަށް ވަނީ ނަމަ އަޅުގަނޑުމެންނަށް ވަރަށް ދައްޗޭ ގާނޫނީ ގޮތުން ހުވާ ކުރައްވައިގެން ހުންނެވި ރައީސެއް ކަމުގައި ބަލައިގަންނަން، ލެޖިޓިމޭޓު ރައީސެއް ކަމުގައި ބަލައިގަންނަން. އެހެންވެއްޖެއްޔާ ސަރުކާރުން ކުރާ ހުރިހާ ކަމެއް ވެސް އެންމެ ކުޑަމިނުން ކެބިނެޓު ވެސް ބަލައިގަންނަން ވަރަށް ދަތިވާނޭ. ބަލައިނުގަންނާނަން، ސާފުކޮށް ދަންނަވަންޏާ،" އަސްލަމް ވިދާޅުވި އެވެ.

ގާނޫނު އަސާސީގައިވާ ބަޔާން ކުރާ ރައީސުލްޖުމްހޫރިއްޔާގެ ހުވާ، އިންތިހާބީ ރައީސް ޑރ. މުހައްމަދު މުއިއްޒު ގާނޫނީ ހަމަތަކުގެ މަތިން ކުރުން އިންތިހާއަށް މުހިންމެވެ. އެއީ އެމްޑީޕީ އަދި ނަޝީދަށް ވުރެ ބޮޑު މައްސަލައެކެވެ. އެއީ ހުރިހާ ރައްޔިތުންނާ ގުޅޭ މައްސަލައެކެވެ. އެމަނިކުފާނުގެ ހުވާ ކުރުން އަދި ހުވާގެ ގާނޫނީ ސައްހަކަމާމެދު ސުވާލު އުފެދޭނެ ހާލަތެއް މެދުވެރިނުވުން ވެސް ހަމަ އެހާ މުހިންމެވެ. އެކަން ޔަގީން ކުރަންޖެހޭނީ ރައްޔިތުންގެ މަޖިލީހުންނެވެ.