ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ދޮންމަންމަ، އަވަށްޓެރި ސްރީ ލަންކާއަށް އުފަން، ޖީ ސްކީލާން ހުސެއިން، ރާއްޖެއަށް އެތެރެ ނުވެވޭ ގޮތަށް ބްލެކްލިސްޓުކޮށް ޑީޕޯޓުކޮށްފައި ވަނީ ނުފޫޒު ބޭނުންކޮށްގެން، ގާނޫނާ ހިލާފަށް ކަމަށް ކުރެވޭ ތުހުމަތަށް މުއިއްޒު ޖަވާބުދާރީވާން ޖެހޭނެ ކަމަށް ގދ. ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ރޭ ވިދާޅުވެއްޖެ އެވެ.

އެމްޑީޕީގެ ކެންޑިޑޭޓު، ރައީސް އިބްރާހިމް މުހައްމަދު ސޯލިހު ގދ. ތިނަދޫއަށް ވަޑައިގެން ބޭއްވި ޖަލްސާގައި ސަނީފު ވަނީ، ސްކީލާން ބްލެކްލިސްޓުކުރި މައްސަލައިގައި މުއިއްޒަށް ވަރަށް ބޮޑަށް ފާޑުވިދާޅުވެފަ އެވެ. ބިދޭސީއަކު ޑީޕޯޓުކޮށްލިޔަސް، އޭނާއަށް އެކަމުގެ ސަބަބު ނޭނގި ޑީޕޯޓްކޮށްލެވިގެން ނުވާނެ ކަމަށް ވެސް އޭނާ ވިދާޅުވި އެވެ.

"ވަލިއްޔުލްއަމްރުކަން ހަވާލުކުރަން ބޭނުންވާ މީހާއަކީ އެ މީހާއަށް ލިބިފައި އޮތް ކުޑަކުޑަ ބާރަކުން އެ މީހާގެ މަސްލަހަތު ހިމާޔަތްކުރުމަށްޓަކައި އެހެން މީހެއްގެ އިންސާނީ ހައްގާއި ކަރާމާތަށް އަރައިގެންފައިވާ މީހަކަށް ވެއްޖިއްޔާ އެފަދަ މީހަކަށް މި ގައުމުގެ ހިންގުން ހަވާލުކޮށްފިއްޔާ، އަޅުގަނޑުމެންގެ ކުރީ ރޭގެ ކަންމަތީ ބައްދަލުވުމުގައި ބުނިހެން ފަށްޓަރު ބައި ވެސް ގެއްލިގެންދާނެ،" މުއިއްޒަށް ނިސްބަތް ކުރައްވައި ސަނީފު ވިދާޅުވި އެވެ.

ބްލެކްލިސްޓްކުރި ކަމުގެ ތުހުމަތު ސްކީލާން ކުރަނީ އޭނާގެ ދޮންދަރި، މުއިއްޒުގެ މައްޗަށެވެ.

މިފަދަ ތުހުމަތެއް ކުރެވުމުން އެކަން ހިނގައިދިޔަ ގޮތް މުއިއްޒު ރައްޔިތުންނަށް ސާފުކޮށްދޭން ޖެހޭނެ ކަމަށް ސަނީފު ވިދާޅުވި އެވެ.

މުއިއްޒުގެ ބައްޕަ، ޝެއިޚް ހުސައިން އަބްދުއްރަހުމާން 2015 ވަނަ އަހަރު އަވަހާރަ ވުމަށް ފަހު، ހުވަފަތް އަނބިކަނބަލުން ސްކީލާން ރާއްޖެ ދޫކޮށް ދާންޖެހުނު ގޮތާއި އޭނާ ބްލެކްލިސްޓްކުރި ގޮތް، ހެއްކާއި، އިންޓަވިއުއާއެކު އަދަދު ނޫހުން ރިލީޒުކުރި ތަހުގީގީ ޑޮކިއުމެންޓަރީގައި ހިމަނާފައިވެ އެވެ.

އެ ޑޮކިއުމެންޓަރީއަށް ފަހު އިމިގްރޭޝަނުން ބުނެފައިވަނީ ސްކީލާން ބްލެކްލިސްޓްކޮށްފައި ވަނީ ގާނޫނާ ހިލާފަށް ކަމަށާއި އެހެންވެ އެ މައްސަލަ ހިނގައިދިޔަ ގޮތް ބަލާނެ ކަމަށެވެ.

ސްކީލާން ރާއްޖޭން ފުރީ ޖެނުއަރީ 12، 2016 ގަ އެވެ. އެނބުރި ރާއްޖެ އައީ މާޗް 4، 2016 ގަ އެވެ. އޭގެ ދެ ދުވަސް ކުރިން މާޗް 2، 2016 ގައި އޭނާ ބްލެކްލިސްޓްކޮށްފައި އޮތުމުގެ ސަބަބުން، ރާއްޖެއަށް އެތެރެ ނުވެވި އެނބުރި ދާން ޖެހުނީ ސްރީ ލަންކާއަށެވެ.

ސްކީލާން ބްލެކްލިސްޓުކުރީ އިންސާނީ ވަގުފާރީގެ ތުހުމަތުގަ އެވެ. ނަމަވެސް އެއްވެސް މައްސަލައެއް ޕޮލިހުން، އަދި އިމިގްރޭޝަނުން ވެސް ބަލާފައި ނެތްކަން އަދަދު ނޫހުގެ ތަހުގީގުން ފާހަގަވި އެވެ. ހަމައެކަނި އިމިގްރޭޝަންގެ ސިސްޓަމުން ފެންނަން އޮތީ އެ މައްސަލައާ ގުޅޭ މެމޯ ނަންބަރަކާއި މީޓިން ބޭއްވި ނަންބަރެކެވެ. މައްސަލައާ ގުޅޭ އެއްވެސް ލިޔުމެއް އުފައްދައި، ފައިލްކޮށްފައި ވެސް ނެތެވެ. ޔައުމިއްޔާ އެއްވެސް ނެތެވެ.