ކެނެޑާގައި އުޅުނު ސީކް ދީނުގެ މީހަކު މަރާލުމުގައި އިންޑިއާ ސަރުކާރުގެ ބައިވެރިވުމެއް އޮވެދާނެ ކަމަށް ކެނެޑާއިން ކުރި ތުހުމަތު "ސީރިއަސްކޮށް ނެގުމަށް" ކެނެޑާގެ ބޮޑު ވަޒީރު ޖަސްޓިން ޓްރޫޑޯ އިންޑިއާއަށް އިންޒާރު ދެއްވައިފި އެވެ.

ކެނެޑާއިން އެ ތުހުމަތު ކުރުމަށް ފަހު އެ ގައުމުގައި ޑިޕްލޮމެޓެއްގެ ގޮތުގައި ހުރި އިންޑިއާގެ ޖާސޫސީ އޮފިޝަލަކު ގައުމަށް ފޮނުވާލި އެވެ. ރައްދުގައި އިންޑިއާއިން ވަނީ ނިއު ދިއްލީގައި ހުރި ކެނެޑާގެ އިސް ޑިޕްލޮމެޓަކު ގައުމަށް ފޮނުވާލައިފަ އެވެ.

"އިންޑިއާއިން މިކަން ސީރިއަސްކޮށް ނަގަން ޖެހޭ. އަޅުގަނޑުމެން ވެސް މި މައްސަލަ މި ނަގަނީ ވަރަށް ސީރިއަސްކޮށް. މި ވާހަކަ މި ދައްކަނީ މައްސަލަ ގޯސްކުރަން ނުވަތަ ރުޅިއަރުވާކަށް ނޫން،" ޓްރޫޑޯ ނޫސްވެރިންނަށް ވިދާޅުވި އެވެ.

ކެނެޑާގެ ރައްޔިތެއް ކަމުގައިވާ ހަރްދީޕް ސިންގް ނިއްޖާރް މަރާލީ ޖޫން 18 ވަނަ ދުވަހު ވެންކޫވާގައި ސީކް ދީނުގެ ސަގާފީ ސެންޓަރެއްގެ ކުރިމަތީގަ އެވެ.

ކެނެޑާއިން ހޯމަ ދުވަހު ބުނީ އިންޑިއާ ސަރުކާރާ ގުޅުން ހުރި އޭޖެންޓުންނާ އޭނާގެ މަރާ ގުޅުން އޮތް ކަމަށް ބެލެވޭ "ސައްހަ ތުހުމަތުތަކެއް" ކުރެވޭ ކަމަށެވެ.

އިންޑިއާ ސަރުކާރުން ބުނީ ކެނެޑާއިން ކުރާ ތުހުމަތުތައް "އެއްގޮތަކަށް ވެސް ބަލައިނުގަންނަ" ކަމަށް ބޮޑު ވަޒީރު ނަރެންދްރަ މޯދީ ވިދާޅުވެފައިވާ ކަމަށެވެ.

"ކެނެޑާގައި ހިންގި އަނިޔާވެރި އެއްވެސް އަމަލެއްގައި އިންޑިއާ ސަރުކާރުގެ ބައިވެރިވުމެއް އޮތް ކަމަށް ކުރާ ތުހުމަތަކީ އެއްވެސް ހަގީގަތެއް ނޫން،" އިންޑިއާގެ ފޮރިން މިނިސްޓްރީގެ ބަޔާނުގައި ބުންޏެވެ.

އެހެން ނަމަވެސް، މި މައްސަލައިގައި އެމެރިކާއިން ވަނީ ކެނެޑާގެ ވާހަކައަށް ތާއީދުކޮށް، ހަރްދީޕް ސިންގްގެ މަރާ ގުޅޭ ގޮތުން އިންޑިއާއަށް އެނގޭ ހުރިހާ އެއްޗެއް ހާމަކުރުމަށް ގޮވާލައިފަ އެވެ.

"ބޮޑު ވަޒީރު ޓްރޫޑޯ އިޝާރާތް ކުރެއްވި ތުހުމަތުތަކާ ގުޅިގެން އަޅުގަނޑުމެން ނުހަނު ކަންބޮޑުވޭ،" އެމެރިކާގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު އެޑްރިއެން ވޮޓްސަންގެ ބަޔާނެއްގައި ވިދާޅުވި އެވެ.

"ކެނެޑާގެ ބައިވެރިންނާ އެކު އަޅުގަނޑުމެން މި ދަނީ ހުއްޓުމެއް ނެތި މުއާމަލާތް ކުރަމުން. ކެނެޑާގެ ތަހުގީގު ކުރިއަށް ގޮސް، ކުށްވެރިން އިންސާފުގެ ކުރިމައްޗަށް ގެނައުން މުހިއްމު."

ހަރްދީޕް ސިންގްއަކީ ސީކް ދީނުގެ މީހުންގެ ވަކި ދައުލަތެއްގެ ގޮތުގައި އިންޑިއާގެ އުތުރުގައި ހަލިސްތާން ގާއިމްކުރަން ވަކާލާތު ކުރަމުން ދިޔަ އެކްޓިވިސްޓެކެވެ. އިންޑިއާގެ ފުލުހުން ވަނީ އޭނާގެ މައްޗަށް ޓެރަރިޒަމާއި މީހުން މަރަން ރޭވުމުގެ ތުހުމަތުކޮށްފަ އެވެ.

އެކަމަކު އޭނާ އެ ތުހުމަތުތައް ދޮގުކުރި އެވެ. އިންޑިއާ ސަރުކާރުން ބުނީ ކެނެޑާގައި ސީކް ދީނުގެ ހަރުކަށި މީހުން ހިންގާ އަމަލުތަކަށް ކެނެޑާގެ އިދާރާތަކުން އަޅާ ނުލާ ކަމަށެވެ.