މެޑްރިޑް (ސެޕްޓެމްބަރު 18) - ސްޕެނިޝް ލީގުގައި ރޭ ފަހަތުން އަރައި، ރެއާލް ސޮސިއެޑާޑް އަތުން 2-1 އިން މޮޅުވެ، ރެއާލް މެޑްރިޑުން އަލުން ލީގުގެ އެއް ވަނަ އަށް ޖެހިލައިފި އެވެ.

ލީގުގައި ހޮނިހިރު ދުވަހުގެރޭ ބާސެލޯނާ އިން ކުޅުނު މެޗުން ހޯދި މޮޅާ އެކު، އެ ޓީމު އެއް ވަނަ އަށް އެރި އެވެ. އެކަމަކު، ރޭ ރެއާލުން ވަނީ އަލުން އެއް ވަނަ އަށް ޖެހިލައިފަ އެވެ. ސައްތަ އިން ސައްތަ ރެކޯޑަކާ އެކު ސީޒަން ފަށައިގެން ކުރިއަށްދަމުން އަންނަ ރެއާލް ވަނީ ކުޅުނު ފަސް މެޗުން ވެސް މޮޅުވެ، 15 ޕޮއިންޓް ހޯދައިފަ އެވެ. ދެ ވަނައިގައި އޮތް ބާސެލޯނާ އަށް ފަސް މެޗުން ލިބިފައިވަނީ 13 ޕޮއިންޓެވެ.

ރެއާލް ދަނޑުގައި ރޭގެ މެޗުގެ ފަސް ވަަނަ މިނިޓްގައި ސޮސިއެޑާޑުން ލީޑުނެގީ އެންޑާ ބަރެންޓެސްކާ ޖެހި ގޯލުންނެވެ. މިއީ އޭރިއާތެރެއިން ލިބުނު ރީބައުންސް ފުރުސަތެއްގައި ބަރެންޓެސްކާ ޖެހި ގޯލެކެވެ. ސޮސިއެޑާޑްގެ ޓަކެފޫސާ ކޫބޯ އެ ޓީމަށް ދެ ވަނަ ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ އެ ގޯލު ބަަލައިނުގަންނާށެވެ. އެއީ އޮފްސައިޑްގައި ހުރި ކުޅުންތެރިއަކު ރެއާލްގެ ކީޕަރު ކެޕާ އަރިއްޒަބަލާގާ އަށް ހުރަސް އަޅާފައިވާތީ އެވެ.

މެޗުގެ ނަތީޖާ އަނބުރާލުމަށް ރެއާލުން ދެ ގޯލު ޖެެހީ ދެ ވަނަ ހާފުގެ ކުރީކޮޅުގަ އެވެ. އެ ގޮތުން ދެ ވަނަ ހާފުގެ ކުޅުން ފެށިގެން މިނިޓެއް ވެސް ނުވަނިސް ރެއާލަށް ނަތީޖާ ހަމަހަމަކޮށްދިން ގޯލު ޖެހީ ފެޑޭ ވަލްވޭޑޭ އެވެ. ފްރަން ގާސިއާ ދިން ބޯޅައެއް ފެޑޭ ވަލްވޭޑޭ ވަނީ ދަނޑީގައި ޖައްސާފައި ގޯލަށް އަމާޒުކޮށްލައިފަ އެވެ. ރެއާލް މޮޅުކޮށްދިން ގޯލު ޖެހީ ފްރަން ގާސިއާ ނެގި ހުރަހަކުން ހޮސޭލޫ ބޮލުންނެވެ.