އއ. މަތިވެރީގެ ފަޅުތެރެއިން ބައެއް ހިއްކައިގެން އެއާޕޯޓެއް އަޅަން ޕީއެންސީގެ ރިޔާސީ ކެންޑިޑޭޓް، މާލޭގެ މޭޔަރު ޑރ. މުހައްމަދު މުއިއްޒު މިއަދު ވައުދުވެވަޑައިގެންފި އެވެ.

އަންނަ ހޮނިހިރު ދުވަހު ބާއްވާ ރިޔާސީ އިންތިހާބަށް ކެމްޕެއިންކުރަން ޕީޕީއެމް/ޕީއެންސީން މަތިވެރީގައި މިއަދު ބޭއްވި ޖަލްސާއެއްގައި މުއިއްޒު ވިދާޅުވީ އަރި އަތޮޅަކީ ޓޫރިޒަމްގެ ގިނަ ފުރުސަތުތަކެއް އޮތް ސަރަހައްދެއް ކަމަށް ވިޔަސް އެ ސިނާއަތު އެ ސަރަހައްދުގައި އިތުރަށް ފުޅާކުރަން ޖެހޭ ކަމަށެވެ. އެ ކަމަށް ޓަކައި ކުރަން ޖެހޭ އެންމެ މުހިއްމު އެއް ކަމަކީ އޭނާ ވިދާޅުވި ގޮތުގައި އެ ސަރަހައްދުގައި އެއާޕޯޓެއް ހެދުމެވެ.

"އެހެންވީމާ މި ފަޅުތެރޭގައި، އިރާދަކުރެއްވިއްޔާ މިރަށާ ގުޅިގެން، [ބިން ހިއްކައި] އެއާޕޯޓެއް އަޅާނަން." އަދި [އެއީ] ވަރަށް އަވަހަށް ކުރިއަށް ގެންދާ މަޝްރޫއުކަށް ހަދާނަން،" މުއިއްޒު ވިދާޅުވި އެވެ.

އެއާޕޯޓް އަޅަން ބިން ހިއްކާއިރު މަތިވެރީގެ ރައްޔިތުންނަށް ބޯހިޔާވަހިކަން ދޭން ބޭނުންވާ ބިން އިތުރުކުރަން ވެސް އޭނާ ވައުދުވެވަޑައިގެންނެވި އެވެ.

މުއިއްޒަށް ރާއްޖޭގެ ވެރިކަން ލިބިވަޑައިގެންފި ނަމަ ސަރުކާރުން މިހާރު ފަށާފައިވާ މަޝްރޫއުތައް ހުއްޓުވާނެ ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހާއި އެމްޑީޕީގެ އިސް އެހެން ބޭފުޅުން ތުހުމަތުކުރައްވަ އެވެ. މަތިވެރީގައި ބޭއްވި ޖަލްސާގައި އެ ތުހުމަތުތަކަށް ވެސް މުއިއްޒު ރައްދުދެއްވި އެވެ.

"ހުއްޓިފައި މިއޮތީ މި ފަސް އަހަރު، މި ފަސް އަހަރު މިދިޔައީ ހުއްޓިގެން. އަޅުގަނޑުމެން މި އަންނަނީ ފަށްޓައިގެން ބާރަށް ކުރިއަށް ގެންދަން،" އޭނާ ވިދާޅުވި އެވެ.

މުއިއްޒު ވިދާޅުވީ އިންތިހާބު ވެއްޖެ ނަމަ، މިހާރު ފަށާފައިވާ ހުރިހާ މަަޝްރޫއެއް ވެސް ކުރިއަށް ގެންދަވާނެ ކަމަށާއި އެހެން ނަމަވެސް އެ މަޝްރޫއުތައް ކުރިއަށް ގެންދަވާނީ ރައްޔިތުން ބޭނުންވާ ބަދަލުތައް ގެނެސްގެން ކަމަށެވެ. މިހާރު ހަމަ އެކަނި ސޮއިކޮށްފައިވާ މަޝްރޫއުތައް ކުރިއަށް ގެންދަވާނެ ކަމަށާއި "އިންތިހާބަށް ކަޑަޖަހަން" ސޮއިކުރި މަޝްރޫއަކަށް ވިޔަސް ކުރިއަށް ގެންދަވާނެ ކަމަށް އޭނާ ވިދާޅުވި އެވެ.