ކެނެޑާގެ ބްރިޓިޝް ކޮލަމްބިއާގެ ޖަންގަލީގައި ރޯވެ 15،000 ގޭބިސީއިން މީހުން އިވެކުއޭޓް ކުރަން އަމުރުކޮށްފި އެވެ.

އޮފިޝަލުން ބުނީ ވެސްޓް ކެލޯވްނާ ސިޓީގެ އިމާރާތްތަކުގައި ރޯވެފައިވާ ކަމަށާއި 2،600 ގެއިން މީހުން އިވެކުއޭޓް ކުރި ކަމަށެވެ. އެއީ 36،000 މީހުން ދިރިއުޅޭ ސިޓީއެކެވެ.

ބްރިޓިޝް ކޮލަމްބިއާ ޕްރޮވިންސްގައި ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ޖަންގަލީގެ އެކި ހިސާބުތަކުގައި ރޯވެފައިވެ އެވެ.

ބްރިޓިޝް ކޮލަމްބިއާގެ އެތައް މޭލެއް އުތުރުން ޔެލޯނައިފް ސިޓީއާ ދިމާލަށް ވެސް އަލިފާންގަނޑު ދަނީ ފެތުރެމުންނެވެ. އެ ސިޓީ ވެސް އިވެކުއޭޓް ކުރަން އަމުރުކުރި އެވެ.

އިވެކުއޭޓް ކުރަން ދިން މުއްދަަތު ހުކުރު ދުވަހު ހަމަވި އިރު، އޮފިޝަލަކު ބުނީ އެ ސިޓީގެ ގާތްގަނޑަކަށް ހުރިހާ ރައްޔިތުން ކާރު ނުވަތަ ކުދި ޕްލޭންތަކުގައި ގޮސްފައިވާ ކަމަށެވެ. އެއީ 20،000 މީހުން ދިރިއުޅޭ ތަނެކެވެ.

ކޮންމެ އަހަރަކު ވެސް ހޫނު މޫސުމުގައި ކެނެޑާގެ ޖަންގަލިތަކުގައި ރޯވެ އެވެ. އެކަމަކު މި އަހަރު އެހެން އަހަަރުތަކާ ހިލާފަށް ރިކޯޑު އަދަދަކަށް 1000 އަށް ވުރެ ގިނަ ތަނުގައި ރޯވެ ދަނީ އަނދަަމުންނެވެ.