ޕީޕީއެމް/ޕީއެންސީގެ ސަރުކާރެއް ވާނީ އަދުލުވެރި ސަރުކާރަކަށް ކަމަށާއި އެހެން ނަމަވެސް ގިނައިން ކަންތައްތައް ކޮށްދޭނީ އާބާދީ ބޮޑު ތަންތަނަށް ކަމަށް އެ ކޯލިޝަނުގެ ރިޔާސީ ކެންޑިޑޭޓް، މާލޭގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބަށް ކެމްޕޭން ކުރަން ޕީޕީއެމް/ޕީއެންސީން ހދ. ނޮޅިވަރަމްގައި މިއަދު ބޭއްވި ޖަލްސާގައި މުއިއްޒު ވިދާޅުވީ އަދުލުވެރިވުމަކީ ނިސްބަތުން ކުރެވޭ ކަމެއް ކަމަށެވެ. އަދި ޕީޕީއެމް/ޕީއެންސީ ކޯލިޝަނަށް ރައްޔިތުން އިތުބާރުކޮށް ވެރިކަން ހަވާލުކޮށްފި ނަމަ އެ އަދުލުވެރިކަން ގާއިމްކޮށްދެއްވާނެ ކަމަށް ވެސް އޭނާ ވިދާޅުވި އެވެ.

"ހުރިހާ ރައްޔިތުންނަކީ ހަމަހަމަ ބައެއްކަން ގާނޫނުއަސާސީ ކަށަވަރުކޮށްދޭ. އޭގެ އިތުރަށް ގިނަ ރައްޔިތުން ތިބި ތަނަކަށް އިސްކަންދިނުން. އެންމެ ގިނަ މީހުން ތިބި ތަނަކަށް ކޮށްދޭން ޖެހޭ ކަންތައްތަކަށް ދިނުން. މިކަމަކީ ކޮންމެހެން ކޮށްދޭން ޖެހޭނެ ކަމެއް. އަދުލުވެރިވުމަކީ ނިސްބަތުން ކުރެވޭ ކަމެއް،" މުއިއްޒު ވިދާޅުވި އެވެ.

މިސާލެއްގެ ގޮތުގައި މުއިއްޒު ނެންގެވީ ގާތްގަނޑަކަށް 3،000 މީހުންގެ އާބާދީއެއް އޮތް ނޮޅިވަރަމެވެ. އޭނާ ވިދާޅުވީ ހދ. އަތޮޅުގައި ކުޅުދުއްފުށި ފިޔަވާ އެންމެ އާބާދީ ބޮޑީ އެރަށުގައި ކަަމަށާއި އެހެންވީމާ ސަރުކާރަކުން ކަންތައްތައް ކޮށްދިނުމުގައި އެރަށަށް ވުރެ އިސްކަން ދޭން ޖެހޭ އެހެން ރަށެއް އޮތް ކަން ގަބޫލުނުކުރައްވާ ކަމަށް ވެސް އޭނާ ވިދާޅުވި އެވެ. ކުޅުފުއްފުށި އޭނާ އިސްތިސްނާ ކުރެއްވީ އެއީ ސިޓީއެއް ކަމަށްވާތީ އެވެ.

ނޮޅިވަރަމް މީހުންނާ ހަވާލާދެއްވައި މުއިއްޒު ވިދާޅުވި ގޮތުގައި މިހިނގާ ފަސް އަހަރު ދުވަހުގެ ތެރޭގައި ސަރުކާރުން ވަނީ އެރަށާ މެދު އިހުމާލުވެފަ އެވެ.

"އަޅުގަނޑު ދަންނަވަން ބޭނުންވާ ވާހަކައަކީ އަޅުގަނޑުމެން ވަރަށް އިހުލާސްތެރިކަމާ އެކީގައި އެކަންކަމަށް، [ތަރައްގީގެ މަޝްރޫއުތައް ހިންގަން ނޮޅިވަރަމް ރައްޔިތުން ކުރާ ކުރާ ޑިމާންޑަށް] އިޖާބަދޭނެ ވާހަކަ،" މުއިއްޒު ވިދާޅުުވި އެވެ.

ނޮޅިވަރަމްގެ މަގުތައް ނުހެދި ހުރި އިރު އެއަށް ވުރެ މާ އާބާދީ މަދު ރަށްތަކުގެ މަގުތައް ސަރުކާރުން ހަދަމުން އަންނަ ކަމަށާއި އެކަމުގައި ތަރުތީބުގެ އޮޅުމެއް އެބަ އޮތް ކަމަށް ވެސް އޭނާ ވިދާޅުވި އެވެ.