ޖުޑީޝަލް ސާވިސް ކޮމިޝަނުން ނިކުމެވަޑައިގެން، "އަޅުގަނޑުމެންގެ ރިޔާސީ ކެންޑިޑޭޓަކީ ރައީސް [އަބްދުﷲ] ޔާމީން" ކަމަށް އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ވަގުތީ ލީޑަރު އަބްދުއްރަހީމް އަބްދުﷲ އާދީއްތަ ދުވަހު ވިދާޅުވިއިރު، އޭނާގެ ވައަތުން ފަހަތުގައި މާލޭގެ މޭޔަރު ޑރ. މުހައްމަދު މުއިއްޒު ހުންނަވައި، އެ ވިދާޅުވި ވާހަކައަށް އެއްބަސްވުމުގެ ގޮތުން ބޮލުގެ އިޝާރާތެއް ދެއްވި އެވެ.

ބޭރުފުށަށް ފެންނަ ފެނުމުގައި، މުޅި ޕީޕީއެމް އޮތީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން އަންނަ އެ ޕާޓީގެ ރިޔާސީ ކެންޑިޑޭޓު ޔާމީންގެ ފަހަތްޕުޅުގަ އެވެ. ޕީޕީއެމްގެ ވެރިން އަބަދުވެސް ބުނަމުން ދިޔައީ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ޔާމީނަށް ވާދަ ކުރެއްވޭނެ ކަމަށެވެ.

އެކަމަކު، ފަރުދާގެ ފުރަގަހުގައި މީހުން އެއްކޮށް، ކެމްޕެއިނަށް ތައްޔާރުވެ، ރޭވުންތައް ރާވައި، ޔާމީންގެ އަތުން ރިޔާސީ ޓިކެޓު އަތުލުމުގެ ވަރުގަދަ، ސީރިއަސް މަސައްކަތްތަކެއް އެ ޕާޓީގެ ބައެއް ލީޑަރުން ދަނީ ހިންގަމުންނެވެ.

އެތައް ދުވަހެއް ވަންދެން އަޑު ފެތުރުނު ގޮތަށް، ޔާމީން އަތުން ރިޔާސީ ޓިކެޓު ހޯދުމަށް ކެމްޕެއިން ކުރައްވަމުންދަނީ މޭޔަރު މުހައްމަދު މުއިއްޒެވެ. އޭނާއާ ވާދަ ކުރައްވާ ބޭފުޅުން ކަމަށް މިހާރު އެންމެ ގަދަޔަށް އަޑު ފެތުރެނީ ރައީސް ޔާމީނަށް ބޮޑުބޭބެ ވިދާޅުވާ ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން މުހައްމަދު ޣައްސާން މައުމޫނެވެ.

ޕީޕީއެމްގެ ތެރޭގައި މިހާރު ހިނގަމުންދާ ކަންތައްގަނޑު އެ ޕާޓީގެ ސެނެޓުގެ ދެ ނައިބު ރައީސުން ހިމެނޭ ގޮތަށް އެ ސެނެޓުގެ ފަސް ބޭފުޅަކު، ދަނޑިވަޅުގެ ހައްސާސްކަމުން ނޫހުގައި ނަން ނުޖެހުމަށް އެދި "އަދަދު" އާ ހިއްސާކުރި އެވެ. އެ މަސްދަރުތަކުން ލިބުނު މައުލޫމާތުގެ މައްޗަށް ބިނާކޮށް މި ލިޔުމުގައި މި ބަލައިލަނީ ރިޔާސީ ޓިކެޓު ހޯދުމަށް ޕީޕީއެމްގެ އެތެރޭގައި މިވަގުތު ކުރަމުންދާ ސިޔާސީ މަސައްކަތަށެވެ.

ޔާމީން ގޮތުގައި ހިފެހެއްޓެވުން

ރިޔާސީ އިންތިހާބަށް ކުރިމަތިލާ ކެންޑިޑޭޓުން ފޯމު ހުށަހަޅަން ލިބޭ 14 ދުވަހުގެ ފުރުސަތު އަންނަ އާދީއްތަ ދުވަހު އިލެކްޝަންސް ކޮމިޝަނުން ހުޅުވާލާނެ އެވެ. އެކަމަކު، މިވަގުތު ޖިނާއީ ހުކުމެއް ތަންފީޒު ކުރައްވަމުންދާތީ، އެ ހާލަތު ބަދަލުވެގެން މެނުވީ ރައީސް ޔާމީނަށް ރިޔާސީ އިންތިހާބުގައި ވާދަ ނުކުރެއްވޭނެކަން ޔަގީނެވެ.

އެކަމަކު، ޕީޕީއެމްގެ އެހެން ކެންޑިޑޭޓަކު އާންމުންނަށް ދައްކަން ރައީސް ޔާމީން ބޭނުންފުޅެއްނުވެ އެވެ. ޑިސެމްބަރު 25، 2022 ގައި އެމަނިކުފާނުގެ މައްޗަށް ސާބިތުވި ރިޝްވަތު ނެގުމާއި ކަޅު ފައިސާ ލޯންޑާ ކުރުމުގެ ކުށުގެ އަދަބު ތަންފީޒު ކުރައްވަން މާފުށި ޖަލަށް އެމަނިކުފާނު ވަޑައިގެންނެވީ، އެހެން ޕާޓީތަކާ މަޝްވަރާ ކުރުން ވެސް މަނާ ކުރައްވައިފަ އެވެ.

"އަޅުގަނޑުމެންނާއެކު އެއްވެސް މަޝްވަރާއެއް ކުރެވޭނީ ރައީސް ޔާމީނާއެކު. ސިޔާސީ އެއްވެސް ލީޑަރަކަށް ވެސް ސިޔާސީ އެއްވެސް ޕާޓީއަކަށްވެސް ޕީޕީއެމް/ޕީއެންސީ އާ ދައްކަންޖެހޭ އެއްވެސް ވާހަކައެއް ދެވަނަ ފަރާތަކާ ނުދެއްކޭނެ. ރައީސް ޔާމީން މޭޒު ކައިރީގައި ބައިންދަވައިގެން އެމަނިކުފާނާ ނޫނީ ނުކެރޭނެ ދައްކާކަށް،" ޑިސެމްބަރު، 2022، ގައި އަބްދުއްރަހީމް ވިދާޅުވި އެވެ.

ޕީޕީއެމްގެ ވާހަކަތައް ރަސްމީކޮށް އެގޮތަށް ހުރި ނަމަވެސް ޔާމީނަށް އިންތިހާބުގައި ވާދަ ނުކުރެއްވޭނެކަން އެ ޕާޓީގެ މަތީ ފަޑީގެ ހުރިހާ ބޭފުޅުން ވެސް ގަބޫލު ކުރެ އެވެ. އޭގެ ތެރެއިން ބައެއް ބޭފުޅުން ބަލަނީ ޔާމީން ނިންމަވާ ގޮތަކަށެވެ. އެހެން ބޭފުޅުން ބަލަނީ ޔާމީންއާ ނުލައި ޕީޕީއެމަށް ރިޔާސީ އިންތިހާބުގައި ވާދަ ކުރެވޭނެ މަގެއް ހޯދުމަށެވެ.

"ކޮންމެވެސް ގޮތެއް ނިންމަވާފައި އަންގަވަންވީ ނޫންތޯ؟ ކޮންމެ ބޭފުޅަކު ދެއްކިޔަސް އަޅުގަނޑުމެން މި ތިބީ ފަހަތުގައި ތިބޭ ގޮތަށް. އެކަމަކު ކެންޑިޑޭޓަކު އެނގުނީމަތާ މަސައްކަތް ވެސް ކުރެވޭނީ،" ޕީޕީއެމްގެ ލީޑަރަކު ވިދާޅުވި އެވެ.

ޣައްސާން މައުމޫން މަންޒަރަށް ވަންނަނީ ކީއްވެ؟

މައުލޫމާތު ލިބޭ ގޮތުގައި ޣައްސާން މިވަގުތު ހުންނެވީ ޕީޕީއެމްގެ މައްސަލަތަކާ ދުރަށް ވަޑައިގަތުމަށް ގަސްތު ކުރައްވައިގެނެވެ. ޕާޓީގެ ބައެއް އިސް ބޭފުޅުން ވިދާޅުވީ ޣައްސާން މިވަގުތު ހުންނެވީ ސިންގަޕޫރުގައި ކަމަށާއި އެ ގައުމަށް ވަޑައިގަތީ ޔާމީން އަންގަވައިގެން ކަމަށެވެ.

ޕީޕީއެމްގެ ރިޔާސީ ޓިކެޓް ހޯދުމަށް މުއިއްޒު ރާވަމުން ގެންދަވާއިރު އޭނާގެ ޓީމު ގަބޫލު ކުރަނީ ވާދަވެރިޔަކީ ޣައްސާން ކަމަށެވެ. މުއިއްޒުގެ ޓީމަށް ލަފާ ކުރެވެނީ ޔާމީނަށް ކުރިމަތިނުލެވޭނެ ގޮތަށް ނިންމުމުން އެމަނިކުފާނުގެ ފުރަތަމަ ޗޮއިސްއަކަށްވާނީ ޣައްސާން ކަމަށެވެ. އެގޮތަށް ގަބޫލު ކުރެއްވޭ ސަބަބުތަކެއް ވެސް އެބަހުއްޓެވެ.

އެއް ކަމަކީ ނިމިދިޔަ ޖޫން މަހުގެ ތެރޭގައި ޣައްސާން މާފުށީ ޖަލަށް ވަޑައިގެން ޔާމީންއާ ބައްދަލު ކުރެއްވުމެވެ. އަނެއް ސަބަބަކީ ރިޔާސީ ކެމްޕެއިނަކަށް ޣައްސާން ތައްޔާރުވާ ކަމަށް މުއިއްޒުގެ ޓީމަށް ގަބޫލު ކުރެވުމެވެ.

"ޣައްސާން ވަރަށް ބޮޑަށް ތައްޔާރުވޭ އެބަ. އޭނަ ހުރީ ވަރަށް ބޮޑަށް އުއްމީދުކޮށްގެން،" މުއިއްޒުގެ ޓީމުގައި އިސްކޮށް ހަރަކާތްތެރިވާ މީހަކު ބުންޏެވެ.

އޭގެ އިތުރުން ރިޔާސީ ރޭހަށް ޣައްސާން ވަދެވަޑައިގަންނަވާނެކަމުގެ އަޑު ގަދަވަނީ ހަމަ އެފަދަ އަޑުތައް ނިސްބަތްވި އެހެން ބޭފުޅުންނާމެދު ދެކެވޭ ވާހަކަތައް މިވަގުތަށް ނަމަވެސް މަދުވުމެވެ. ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކާއި ޑރ. މުހައްމަދު ޝަހީމް އަލީ ސައީދަކީ އޭގެ ތެރެއިން ބައެއް ބޭފުޅުންނެވެ.

ޕީޕީއެމްގެ ބައެއް މެމްބަރުންނާ ވާހަކަ ދައްކާލުމުން އެނގޭ އެއްޗަކީ އެއިން ކޮންމެ ބޭފުޅަކާ މެދު ވެސް ޕާޓީގެ ތެރޭގައި ކޮންމެވެސް ކަހަލަ ޝައްކުތަކެއް ހުރުމެވެ.

މުއިއްޒުގެ ބޮޑު ރޭވުމަކީ މިއީ

ޕީޕީއެމްގެ މުހިންމު ހުރިހާ ނިންމުމެއް ނިންމުމުގެ ބާރު އޮންނަނީ ޕާޓީގެ ސެނެޓަށެވެ. ޕާޓީގެ ސެނެޓުގައި ޕީއެންސީގެ މެމްބަރުންނާއެކު ޖުމްލަ 130 މެމްބަރުން ތިބެ އެވެ. މުއިއްޒުގެ ޓީމުން ބުނަނީ، ވަގުތާއި ހާލަތު އައިސް ޖެހުމުން އެ ސެނެޓުގެ 79 މެމްބަރުންގެ އަގުލަބިއްޔަތުން މުއިއްޒަށް ރިޔާސީ ޓިކެޓު ދިނުމަށް ފާސް ކުރާނެ ކަމަށެވެ.

"އެއްވެސް މައްސަލައެއް ނޫން އެއީ. ސެނެޓުގެ 79 މެމްބަރުން ތިބީ އަހަރުމެންނާއެކީ. މުއިއްޒަށް ވޯޓު ދޭނެ އެމީހުން،" ކުރިން ވާހަކަ ދެއްކި މުއިއްޒު ޓީމުގެ މީހާ ބުންޏެވެ.

އެ ވިދާޅުވީ 79 މެމްބަރުންގެ ތާއީދު މުއިއްޒަށް ލިބޭ ނަމަ އެއީ ސެނެޓުގެ 60 ޕަސެންޓެވެ.

ނަމަވެސް ޕާޓީގެ އަސާސީ ގަވާއިދުގައި ބުނެފައިވާ ގޮތުން ޕީޕީއެމްގެ ރިޔާސީ ޓިކެޓު އާންމު އުސޫލެއްގެ ގޮތުން ލިބޭނީ ޕްރައިމަރީއަކުންނެވެ. ނަމަވެސް ފަސް އަހަރުގެ ދައުރެއް ފުރިހަމަކޮށްފައިވާ ނަމަ އެބޭފުޅަކަށް ޓިކެޓު ދޭން ސެނެޓުގެ ތިންބައިކުޅަ ދެބައިގެ އަގުލަބިއްޔަތުން ނިންމިދާނެ އެވެ. އޯގަސްޓް، 2022، ގައި ރައީސް ޔާމީނަށް ޕީޕީއެމުން ރިޔާސީ ޓިކެޓު އެރުވީއެ ގޮތަށެވެ.

އެ ނޫން ގޮތަކަށް ރިޔާސީ ޓިކެޓު ދެވޭނެ މަގެއް ޕީޕީއެމްގެ އަސާސީ ގަވާއިދުގައި ބުނެފައެއް ނޯވެ އެވެ. އެކަމަކު މުއިއްޒުގެ ޓީމަކަށް އެއީ މައްސަލައެއް ނޫނެވެ. ސެނެޓު މެދުވެރިކޮށް އަސާސީ ގަވާއިދު އިސްލާހުކޮށްގެން ނަމަވެސް މޭޔަރަށް ޓިކެޓު ހޯދަން އޭނާގެ ޓީމުން ދަނީ މަސައްކަތް ކުރަމުންނެވެ.

"ކެންޑިޑޭޓަކު ނުނެރެ ތިބުމަކީ ޕީޕީއެމުން ކޮށްގެން ވާނެ ކަމެއް ނޫން. މިއީ ރާއްޖޭގެ އެންމެ ބޮޑު ޕާޓީ. ރިޔާސީ އިންތިހާބަށް ކުރިމަތިލާން ހުޅުވައިލުމުގެ ކުރިން އެކަމުގައި ގޮތެއް ނިންމަން ޖެހޭނެ. އެކަމަށް ބާރު އަޅާނަން،" ޕީޕީއެމް ސެނެޓުގައި ހިމެނޭ ނައިބު ރައީސަކު ވިދާޅުވި އެވެ.

މުއިއްޒުގެ ރޭވުމުގެ އަޑުތައް ޖަލުގައި ހުންނެވި ޔާމީނަށް ވެސް ވަނީ އިވިވަޑައިގެންފަ އެވެ. އަދި އެއާއެކު އެ މަސައްކަތަށް ހުރަސް އަޅުއްވަން ޔާމީން މަސައްކަތް ފައްޓަވާފައިވާ ކަމަށް ޕީޕީއެމްގެ ބައެއް އިސް މީހުން ބުނެ އެވެ. މާލޭ ސިޓީ ކައުންސިލްގެ ޖަލްސާތަކުގެ ކޯރަމް ގެއްލުވާލުމަކީ ވެސް އެއާ ގުޅޭ "ސިޔާސީ މަސައްކަތެއް" ކަމަށްވެ އެވެ. އޭގެކުރިން ވަނީ މުއިއްޒުގެ އެންމެ އަރިސް އެކަކު ކަމުގައިވާ ސިޓީ ކައުންސިލްގެ މެމްބަރު އާދަމް ރަމީޒު ޕާޓީން "ބޭރުކޮށްފަ" އެވެ.

"އެ ގޮތަށް މަސައްކަތް ކުރާތީ ފިއްތުންތައް ކުރިމަތިކުރޭ. އެކަމަކު ޕާޓީން ކެންޑިޑޭޓަކު ނުނެރެ ދޫކުރާ ގޮތަކަށް ނޫން މި ހުރީ. ޕާޓީއަށް ރަނގަޅީ އެގޮތެއް ނޫން. އެއީ ރައީސް ޔާމީނަށް އެންމެ ރަނގަޅު ގޮތް،" އޭނާ ވިދާޅުވި އެވެ.

މުއިއްޒުގެ މިޝަން ކާމިޔާބު ވެދާނެ ކަމަށް ބައެއް ފަރާތްތަކުން ޝައްކު އުފައްދަ އެވެ.

"ރިޔާސީ އިންތިހާބުގެ ކެންޑިޑެސީ ހުޅުވާލަން މަދު ދުވަސްކޮޅަކަށް ވެފައިވާއިރު [މުއިއްޒު] ތިޔަ ކުރައްވަން އުޅުއްވާ ކަމެއް ކާމިޔާބު ވާނަމަ އޮންނާނީ ވެފައި. ޕާޓީގެ ޓިކެޓު ދޭނީ ޔާމީން ބޭނުންފުޅުވާ ބޭފުޅަކަށް. ޕާޓީގެ ޓިކެޓު އޮތީ ޔާމީންގެ އަތްޕުޅުގައި އަގުލަބިއްޔަތުން ދީފަ. އެއީ ޔާމީންގެ ހައްގެއް. ޔާމީން ބޭނުންފުޅު ބޭފުޅަކަށް ދެވޭނެ،" ޔާމީނަށް ވަރަށް ބޮޑަށް ތާއިދު ކުރައްވާ، އަދި އެ މަނިކުފާނުގެ ވަރަށް އަރިސް މީހަކު މި ނޫހަށް ކިޔައި ދިނެވެ.

ކެންޑިޑޭޓަކު ނެރުމަށް ޔާމީނަށް ފިއްތުން ކުރިމަތި ކުރުމުގެ މަސައްކަތްތައް ވެސް މުއިއްޒުގެ ޓީމު ފަހަތުގައި އޮވެ ފެށި އެވެ. ނަމަވެސް ސަލަފު ޖަމިއްޔާއިން ބަޔާނެއް ނެރުން ފިޔަވައި އެހެން ފަރާތަކުން ބަޔާނެއް ވެސް ނުނެރުނެވެ. އެކަން މުއިއްޒުގެ ޓީމުން މަޑުޖައްސާލީ ލީޑަޝިޕްގެ ބައެއް ބޭފުޅުންގެ އެދިވަޑައިގަތުމަށެވެ.

ޕީޕީއެމްގެ ކެންޑިޑޭޓަކު ރިޔާސީ އިންތިހާބުގައި ވާދަ ކުރުމަކީ އެ ޕާޓީއަށް ސަޕޯޓު ކުރާ އެތައް ބަޔަކު އެދޭނެ ކަމެކެވެ. އެ ކެންޑިޑޭޓަކީ ޔާމީން ނޫންކަން ޔަގީނެވެ. ޔާމީންގެ މަގާމު ހޯއްދަވަން ޕާޓީގެ އެތެރެއިން ލީޑަރުންތަކެއް އެ ދަނީ މަސައްކަތް ކުރަމުންނެވެ. އަންނަ އާދީއްތަ ދުވަހުގެ ކުރިން ޕާޓީގެ ކެންޑިޑޭޓަކު ދައްކަން އެ ދަނީ މަސައްކަތް ކުރަމުންނެވެ. އެމީހަކަށް ވާނީ އެތެރޭގެ ކޯޅުންގަނޑުން ކުރި ލިބޭ މީހާ އެވެ. ނަމަވެސް އެވަރުގެ ބޮޑު ހެލުމެއް އަދި ނުފެނެ އެވެ.